Youth Programs na lilinang sa talento at galing ng kabataan, sana paglaanan ng pondo ng gobyerno

ni Sonny Angara - @Agarang Solusyon | February 12, 2022

Kamakailan, pinangunahan ng isa nating komite sa Senado, ang Committee on Youth ang isang pagdinig na sa tingin natin ay napakahalaga para sa kabataan. Dalawang taon na rin ngayon na halos karamihan sa kanila ay nasa bahay lang at hindi na nakakasalamuha ng kanilang mga kaibigan o kaklase dahil sa pandemya.

Sabihin na nating hindi pa nga siguro agaran ang pagbabalik-normal ng buhay natin.

Pero dahil sa masigasig ng programa ng gobyerno sa pagbabakuna at mas epektibong gamutan ng COVID-19, nakakita tayo ng pag-asa na darating din sa lalong madaling panahon ang inaasam nating pagbabalik-normal. Kaya naman, pinili nating itaguyod sa Senado ang mga panukalang batas na magpapalakas sa mga programa ng gobyerno na magsisilbing extracurricular activities ng kabataan ngayon hanggang sa mga susunod na henerasyon.

Isa sa mga panukalang ito ang pagtatalaga sa National Competitions for Young Artists (NAMCYA) bilang Philippine National Youth Development Program in Music. Ito ay bilang pagkilala sa magandang nagawa ng NAMCYA sa pagpapaunlad at pagsusulong ng himig Pilipino bilang isang uri ng sining at ang mahusay na pagsasanay sa mga kabataan mula sa iba’t ibang panig ng bansa bilang musical prodigies.

Halos limang dekada na sa industriya, nagsasagawa ang NAMCYA ng taunang kompetisyon upang mapili ang pinakamagagaling na Filipino musicians mula sa hanay ng kabataan.

Sa katunayan, aabot na sa 130 accomplished musicians ang dumaan sa pagsasanay ng NAMCYA at karamihan sa kanila ay music professors na sa bansa o kaya naman ay sa ibayong dagat.

Marami rin sa kanila, nagwagi sa international competitions at nakapag-perform sa harap ng mga dayuhang manonood. Mayroon naman, naging miyembro ng mga kilalang orchestra sa buong mundo.

Banggitin lamang natin ang ilan sa kanila, tulad ni Jonathan Velasco na choral conductor at miyembro ng Philippine Madrigal Singers; Alfonso “Coke” Bolipata, isang concert violinist; Dr. Renato Lucas na sa kasalukuyan ay nagsisilbing pangulo ng NAMCYA at propesor sa UST Conservatory; at ang Loboc Children’s Choir na nagwagi sa iba’t ibang international competitions.

Sa laki ng nagagawang ito ng NAMCYA para linangin ang talento at kakayahan ng kabataang may kakaibang galing sa musika, nararapat lamang na paglaanan sila ng pondo ng gobyerno na maaari nilang magamit sa pagpapaayos ng mga pasilidad at iba pang suporta para sa organisasyon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Panukalang batas na nagpapalakas sa SK Reform Act, ratipikado na ng Senado at Kamara

ni Sonny Angara - @Agarang Solusyon | February 05, 2022

Araw-araw, ang laman ng balita ay halos puro na lang negatibo, puro nakababahala sa tao. Pero ngayon, gusto naman nating maghatid ng maganda-gandang balita, lalo na sa mga miyembro ng Sangguniang Kabataan (SK).

Nitong Miyerkules ng hapon, ratipikado na ng Senado at ng Kamara ang Senate Bill 2124 at ang House Bill 10698, ayon sa pagkakasunod. Layunin ng mga panukalang ito na isabatas ang pagbibigay ng honoraria sa mga miyembro ng SK.

Bilang chairperson ng Committee on Youth sa Senado, tayo ang tumayong sponsor ng panukalang ito. Naniniwala tayo na sa pamamagitan ng pagkilala sa kontribusyon ng mga batang opisyal sa nation building, natutulungan din natin silang maging mas dedicated at epektibo sa kanilang tungkulin.

Malaki ang pagpapahalaga natin sa kabataang opisyal ng SK dahil sila ang nagsisilbing ehemplo ng kabataan pagdating sa disiplina at pagkalinga sa komunidad.

At upang mahikayat pa ang ibang kabataan para maging kinatawan ng kanilang sektor sa pamamagitan ng SK, nararapat lamang na ipakita rin natin sa kanila na ang pagsisikap na makatulong sa lipunan ay talaga namang naa-appreciate natin. Munting bagay na maibalik sa kanila ang kawanggawa, malaking pagsisilbi naman ang kanilang gagawin para sa atin.

Sa sandaling tuluyan itong maging batas, lahat ng SK members sa buong bansa, kasama na ang chairperson, kagawad at appointed officials ay makatatanggap na ng buwanang honorarium. Ang halagang ilalaan dito ay hindi lalagpas sa 25 porsiyento ng SK funds at hindi rin tataas sa sinasahod ng SK chairperson.

At sa sandaling maisabatas, magpapalabas ang Department of Budget and Management ng mga kaukulang alituntunin para sa tuluyang implementasyon nito.

Sa ilalim ng reconciled version ng panukalang ito, iniaatas na ang lahat ng SK members na pormal nang naitatag bilang mga opisyal ng organisasyon ay kailangang makapagtalaga rin agad ng kanilang Ingat-Yaman o Treasurer.

Nakasaad din na ang itatalang treasurer ay kailangang nakapagtapos ng kursong may kinalaman sa business administration, accountancy, finance, economics o bookkeeping.

Umaasa tayo na sa lalong madaling panahon, magiging ganap na batas ang ating panukala dahil lagda na lang ni Pangulong Rodrigo Duterte ang kulang para tuluyan na itong mapagtibay.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Tandaan, “Kabataan ang pag-asa ng bayan”... ‘Wag pabayaan ang edukasyon sa bansa

ni Sonny Angara - @Agarang Solusyon | January 29, 2022

Kamakailan ay nagpaabot ng pasasalamat sa Mataas na Kapulungan ang Coordinating Council for Private Educational Associations of the Philippines (COCOPEA) dahil sa pagpasa natin ng RA 11635 or the Act Amending Sec. 27(B) of the National Internal Revenue Code of 1997.

Dahil sa nasabing batas, naisalba natin ang private schools sa posibleng pagsasara o pagtigil ng operasyon. Maging ang Philippine Association of State Universities and Colleges (PASUC) ay nagpasalamat din sa Senado dahil itinaas natin ang pondo para sa state universities and colleges (SUCs). Malinaw na sa mga pasasalamat na natatanggap ng Senado mula sa sektor ng edukasyon, malinaw na hindi tayo nagpapabaya para itaas ang sistema ng ating edukasyon.

Pero sa totoo lang, hindi pa tapos ang laban para talagang tuluyang maiangat natin ang edukasyon sa bansa. Napakarami pang dapat gawin para masiguro ‘yan.

Kaya noong Miyerkules, sa ating sponsorship speech, ibinigay natin ang solidong suporta sa EDCOM 2 o itong second congressional commission on education.

Mababatid na itong panukalang ay mula sa joint resolution No. 10 na isinulong noong Disyembre 2019 na naglalayong itatag ang EDCOM 2. Nanguna sa pagsusulong niyan, sina Minority Leader Frank Drilon, Senators Win Gatchalian at Joel Villanueva na chairmen ng Basic and Higher Education Committee ng Senado. Kasama rin natin sa nagsulong ng joint resolution sina Senators Imee Marcos at Grace Poe.

Alam ba ninyo kung ano ang nagtulak sa inyong mga senador na isulong ang resolusyon na ito?

Dahil sa mga lumabas na resulta mula sa iba’t ibang assessment surveys, kung saan kasama ang Pilipinas. Sadsad ang ating bansa sa mga survey na may kinalaman sa edukasyon.

Noong 2018, sa kabuuang 79 countries na sumailalim sa Program for International Student Assessment (PISA), tayo ang nasa panghuli. Ibig sabihin, nakuha natin ang lowest score sa reading. Sa Trends in International Mathematics and Science Study (TIMSS) survey, tayo na naman ang kulelat sa 58 assessed countries. Bagsak na nga tayo sa reading, bagsak pa sa Math and Science. At noong 2019 sa Southeast Asia Primary Learning Metrics Study, kung saan sumailalim ang 6 ASEAN country members, ang isinabak nating Grade 5 students, sadsad sa halos lahat ng utilized metrics.

Nakakaawa naman pala talaga ang Pilipinas kung edukasyon ang pag-uusapan. Ito ang dapat tutukan sa mga problema natin sa education sector. Hindi biro ang problemang ito – nangangailangan ito ng malawakang reporma.

Palasak na kasabihan, “Kabataan ang pag-asa ng bayan.” Paano natin maaabot ‘yan kung plakda tayo sa karunungan, kumpara sa estado ng edukasyon sa iba’t ibang panig ng mundo?

Sa puntong ito natin nakikita ang kahalagahan ng EDCOM 2. Ang pananaw na naglalayong bigyan ng maayos na kinabukasan ang kabataan sa pamamagitan ng mas pinalakas at pinaunlad na sistema ng edukasyon sa bansa.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com