Iba ang dedikasyon ng mga atletang Pinoy – seryoso, dibdiban at buhos-lakas

ni Sonny Angara - @Agarang Solusyon | May 23, 2022

Kung kayo ay sumusubaybay sa takbo ng 31st Southeast Asian Games, makikita natin ang patuloy na pamamayagpag at pagkamit ng mga medalya ng mga atletang Pinoy.

Sa kasalukuyan nga, habang isinusulat natin ang kolum na ito, patuloy pa rin ang paghakot ng mga medalya.

Napakalaking karangalan nito para sa Pilipinas. Dito natin makikita kung paanong ibinibigay ng ating mga atleta ang lahat ng kanilang makakaya, talento at galing, makasiguro lang ng karangalan para sa ating lahat.

Tayo po sa Senado ay may isinusulong na panukalang batas para sa kanila - ang pagpapataas ng cash incentives na natatanggap nila sa tuwing sila ay nagwawagi ng medalya sa mga internasyonal na palakasan.

Sa ating Senate Bill 1225, ipinanukala nating itaas sa P400,000 ang kasalukuyang P300,000 cash incentive na natatanggap ng ating gold medalists; P200,000 naman mula sa kasalukuyang P150,000 para sa sa silver medalist at; P100,000 mula sa kasalukuyang P60,000 para sa makasusungkit ng bronze medal.

Kabilang din sa ating panukala ang pagpapataas sa cash incentives na matatanggap ng mga atletang magwawagi sa Asian Beach Games at Asian level competitions na idinaraos kada dalawang taon at nilalahukan ng 25 bansa.

Panukala natin dito na mula P500,000 cash rewards sa gold medalist ay itaas ito sa P600,000; P350,000 naman para sa silver medalist mula sa dating P250,000 at; P150,000 para sa bronze medalist mula sa dating P100,000.

Ang ating mga atleta, para sa kaalaman ng lahat, dumaraan sa napakatindi at 'di birong pagsasanay bago tuluyang sumuong sa laban.

Sa training pa lang, matindi na ang pinagdaraanan nila kaya isipin na lang natin 'yung mas mabigat pang susuungin nila sa mismong araw ng kompetisyon; ang pagbibigay ng lahat ng kakayahan nila, maiuwi lang ang karangalan sa Pilipinas.

Ang hinihiling nating dagdag na insentibo, sa totoo lang, napakaliit na bagay lang n'yan, kumpara naman sa hirap at pagsisikap nilang manalo sa laban. Kaya't bilang pagkilala naman sa pagsisikap nilang ito, dapat ay suklian kahit sa simpleng paraan.

Iba ang dedikasyon ng mga atleta – seryoso, dibdiban at talagang buhos-lakas.

Simpleng rekognisyon at pagpaparangal na tiyak na may positibong epekto sa ating palakasan, at para na rin makahikayat pa tayo ng mga bago pang henerasyon ng manlalaro para sa Pilipinas.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Institutionalized health allowance and benefits para sa HCWS, batas na!

ni Sonny Angara - @Agarang Solusyon | May 7, 2022

Tapos na ang mga araw na "nangangapa sa dilim" ang ating healthcare workers (HCWs) tuwing tayo ay nahaharap sa krisis pangkalusugan – 'yung tila may agam-agam kung may suportang pinansiyal ba silang matatanggap sa mga alanganing araw na ito na ibinubuwis nila ang sariling buhay, masiguro lang ang kaligtasan ng kanilang kababayan.

Tapos na, dahil pirmado na ni Pangulong Rodrigo Duterte ang RA 11712, ang batas na nagbibigay ng institutionalized allowance and benefits sa HCWs tuwing may public health emergency.

Ang batas na ito ang nagpapatunay na hindi kailanman pababayaan ng gobyerno ang ating mga health frontliners sa mga panahong nasa ganitong krisis ang buong bansa at kailangang bigyan ng kaukulang atensyong medikal ang publiko.

Nang isulong ang batas na ito sa Senado, isa po ang inyong lingkod sa mga nagsilbing co-author. At dahil dito, tiniyak natin na may sapat na allowance at benefits ang HCWs tuwing tayo ay sasailalim sa public health emergency na idedeklara ng Pangulo.

Sa pamamagitan ng batas na ito, wala nang balakid sa pagkakaloob ng emergency allowances and benefits sa ating healthcare workers. Tulad ng Bayanihan Law na nag-expire nitong nakaraang taon, nakatuon din ito sa kapakanan ng ating HCWs na walang kapagurang naglilingkod sa atin kung tayo ay nangangailangan ng medical care.

Sa totoo lang, napakaliit na bagay lamang ng tulong pinansiyal na ito kumpara naman sa serbisyo nila sa atin. Sila po kasi, kahit buhay na nila ang kapalit, makapaglingkod lang at matupad ang sinumpaang tungkulin, tutulong at tutulong sila sa mga nangangailangan ng medical attention.

Halos lahat naman siguro, nakaalam na naging biktima rin tayo ng COVID noong 2020 – kasagsagan 'yan ng pandemya. Nu'ng tayo po ay nasa ospital, nasaksikhan natin nang personal kung paano tumutupad sa kanilang tungkulin ang ating doctors and nurses. Wala kang maririnig na reklamo, 'di mo makikita na para silang susuko. Dahil dun, mas lalong nabuo ang kagustuhan kong maisulong naman ang kanilang kapakanan. Hindi naman yata tama na hindi man lang natin sila bibigyan ng kaunting pagkilala sa mga panahong tulad ng COVID pandemic, dahil kalahating katawan nila, nakabaon na rin sa lupa habang inililigtas ang buhay ng iba.

Sa batas na ito, ang lahat ng public at private healthcare at non-healthcare workers, anuman ang kanilang employment status ay sakop ng mga benepisyong nakapaloob dito tulad ng P3,000 monthly allowance para sa mga naka-deploy sa low risk areas; P6,000 para sa mga naka-detalye sa medium risk areas at P9,000 para sa mga naka-destino sa "high risk" areas. Makukuha ng ating health workers ang mga nabanggit na halaga sa kanilang personal na pagre-report sa trabaho for at least 96 hours sa loob ng isang buwan.

Liban sa monthly allowances, pinaglaanan din ng kaukulang kompensasyon ang HCWs na tatamaan ng COVID habang aktibong naka-duty. Para sa mild cases, sila ay pagkakalooban ng P15,000; P100,000 para sa severe o critical cases; at P1 milyon sa pamilya ng masasawing HCW.

Ang mga non-medical workers naman at mga personalidad na contract of service at job order basis na naka-assign sa mga health facility at tulad ng health workers ay exposed din sa mga pasyente ng COVID, tatanggap din ng katulad na mga benepisyo.

Maging ang mga barangay health workers na kabilang sa BHW registry system ng DOH at naka-assign din sa mga health facility, swabbing at vaccination sites ay tatanggap din ng nasabing benefits dahil ikinokonsidera rin silang health workers na exposed din sa panganib.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Kompensasyon sa Marawi siege victims, tiyaking umabot sa tunay na benepisyaryo

ni Sonny Angara - @Agarang Solusyon | April 30, 2022

Sabi nga ng mga nakatatanda, sa likod ng itim na ulap sa tanghaling tapat, nariyan lang ang araw at patuloy na sumisikat. Kumbaga, may liwanag na naghihintay.

Sa ganito natin maihahambing ang nangyaring digmaan sa Marawi City, may limang taon na ang nakararaan. Bangungot na kumitil sa napakaraming buhay ng kasundaluhan at mga sibilyan. Trahedya na umagaw sa pangarap ng napakarami nating kababayang Maranao at nagpahina sa kanilang kalooban. Pero ngayon, kumbaga, unti-unti nang nahahawi ang maitim na ulap at sumisilay na ang liwanag dahil dumating na ang pag-asa.

Kamakailan lang, nilagdaan at tuluyan nang isinabatas ni Pangulong Rodrigo Duterte ang Marawi Siege Victims and Compensation Act – isang batas na isinulong at inisponsor natin sa Senado bilang chairman ng Senate committee on Finance.

Napakatagal man nang ipinaghintay ng mga kababayan natin sa Marawi sa tulong na ito – naging daan naman ito ngayon upang mabuhayan sila ng loob at mabigyan ng panibagong pag-asa.

Kaya't sa pamamagitan po ng kolum nating ito, ipinararating natin kay Pangulong Duterte ang isang taos-pusong pasasalamat dahil talagang napakalaking tulong nito sa mga kababayan nating hinagupit ng digmaan sa Marawi.

Marami na ang nagawa sa nakaraang taon sa ilalim ng Marawi Recovery, Rehabilitation and Reconstruction Program (MRRRP) pero hindi makukumpleto ang proseso ng pagbangon ng Marawi kung hindi maibabalik sa normal ang buhay ng mga naapektuhang residente.

Mas mabilis ang pagbangon ng Marawi City kung bibigyan ng kakayahan at kapangyarihan ang kanilang mga residente, at mabigyan din sila ng bayad-pinsala.

Sa ilalim po ng batas na ito, sakop ng tax-free monetary compensation ang mga residente at business owners ng Marawi City na kabilang sa Most Affected Areas o MAA at Other Affected Areas o OAA.

Sa ilalim po ng MAA, mayroon tayong 24 most affected barangays na kinabibilangan ng Lumbac Madaya, South Madaya, Raya Madaya 1, Raya Mdaya 2, Sabala Amanao, Sabala Amanao Proper, Tolali, Daguduban, Norhaya Village, Banggolo Poblacion, Bubong Madaya, Lilod Madaya, Dansalan, Datu sa Dansalan, Sangkay Dansalan, Moncado Colony, Moncado Kadilingan, Marinaut West, Marinaut East, Kapantaran, Wawalayan Marinaut, Lumbac Marinaut, Tuca Marinaut at Datu Naga.

Sa OAA naman, meron tayong walong iba pang barangay na kinabibilangan ng Saduc Proper, Panggao Saduc, Raya Saduc, Lilod Saduc, Datu Saber, Bangon, Fort at Wawalayan Caloocan.

Kasama po sa mga tatanggap ng monetary compensation ang private property owners matapos ma-demolish ang mga pag-aari nilang establisimyento kaugnay ng implementasyon ng MRRRP.

At dahil usapang pinansiyal po ito, kailangang tiyakin na walang magiging aberya at umabot ang tulong sa mga tunay na benepisyaryo. Kaya para po masigurong maayos ang distribusyon ng kompensasyon, itatag ng gobyerno ang isang Marawi Compensation Board.

Layunin ng lilikhaing Board na ma-monitor ang pamamahagi ng kompensasyon at matiyak na magiging maayos ang distribusyon nito sa mga kababayan nating pinag-ukulan ng tulong.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com