Bawas buwis para sa middle class workers, kasado na sa Enero 2023

ni Sonny Angara - @Agarang Solusyon | July 16, 2022

Bago ang pagtalakay natin sa main issue sa column natin ngayon, nais lang natin ibahagi ang ating katayuan sa kasalukuyan bilang chairman ng Senate finance committee. Sa isa kasing panayam, tayo ay natanong kung tayo ba ay mananatiling chairman ng finance committee sa pagsisimula ng ika-19 na Kongreso bago matapos ang kasalukuyang buwan.

Sa ating pagtataya, maaaring positibo ito pero makukumpirma lamang ito sa sandaling magbukas na ang panibagong Kongreso. Bagaman, 'yan na ang napag-usapan sa pamunuan ng Senado, magiging opisyal lamang ito sa pagsisimula ng sesyon, isang araw matapos ang State of the Nation Address ng ating Pangulo.

At sa kabuuan nga ng panayam na ito, napag-usapan ang isyu tungkol sa mga ayuda dahil sa patuloy na krisis na pinagdaraan natin sa kasalukuyan. Ang pagtaas ng presyo ng krudo dahil sa patuloy na sigalot sa pagitan ng Ukraine at Russia, paglobo ng presyo ng mga pangunahing pangangailangan o bilihin. Inalam sa atin kung makatatanggap din ba ng ayuda ang mga kababayan nating itinuturing na nasa middle class.

Hindi man tulad ng pinakamahihirarp nating kababayan na tumatanggap ng cash bilang ayuda, ang middle class earners ay magiginhawahan naman sa kanilang binabayarang income tax sa susunod na taon.

Ang tax relief ay napapaloob sa Tax Reform for Acceleration and Inclusion (TRAIN) Law o RA 10963. Sa pagpasok po ng Enero 2023, muling makatatanggap ang ating middle class earners ng tapyas-buwis.

Sinu-sino ba itong mga sinasabi nating middle class? Kasama riyan ang ating mga guro at empleyadong kinakaltasan ng tax sa kanilang suweldo.

Para sa mas maliwanag na eksplanasyon, isinasaad ng TRAIN Law na ang mga empleyadong kumikita ng P250,000 taun-taon at hindi hihigit sa P8 milyon ay may lower tax rates na mula 15% hanggang 30 percent. Magsisimula 'yan sa January 2023.

At kaugnay ng tanong kung tayo ba ay pabor na bigyan ng tulong-pinansiyal ang mga middle class families na apektado na rin ng taas-presyo, bukas tayo sa ideyang 'yan.

Pero sa ngayon, prayoridad ng gobyerno na tulungan ang pinakamahihirap nating kababayan — 'yung mga talagang walang-wala. Pero kung may paraan para maisali ang mga middle class sa financial assistance, bakit naman hindi? Lahat apektado talaga ng krisis. Ang pangunahing kailangan para maisakatuparan natin ito ay kaukulang pondo, pero titingnan natin kung may mga posibleng paraan o mekanismo para mapagaan ang financial status ng middle class sector.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Panahon na para itaas ang suweldo ng mga guro

ni Sonny Angara - @Agarang Solusyon | July 9, 2022

Sa pagsisimula ng bagong Kongreso (19TH Congress), agad tayong nagsumite sa Senado ng ating 20 pangunahing panukalang batas na inaasahan nating mabibigyan ng pagkakataong pumasa sa ilalim ng bagong administrasyon.

Nangunguna pa rin sa ating mga panukala ang pagpapaunlad sa sistema ng edukasyon sa bansa, partikular ang pagbibigay ng kaukulang-pansin sa kapakanan ng ating mga guro at mag-aaral.

Isa sa mga ito ang pagpapataas sa sahod ng mga guro sa pampublikong paaralan. Alam ninyo, congressman pa lamang tayo noong 2004 ay itinutulak na natin ang panukalang ito.

Sa ating panukala, itinutulak nating mula Salary Grade 11 ay gawing Salary Grade 19 ang sahod ng mga teachers. Panahon na para naman gawing well-paid ang mga guro. Sa mga bansang Finland at Singapore, isa ang mga guro sa mga tumatanggap ng mataas na suweldo, kaya't sana nama'y magawa rin natin ito sa ating bansa.

Layunin natin na gawing interesante sa mga guro sa mga pampublikong paaralan ang pagtuturo at maging tulay sila para sa isang maaasahan, at dekalidad na edukasyon para sa ating mga estudyante sa public schools.

Sa ngayon, kapag sinabing public school teachers, mababa lang ang sinasahod. Napakababa ng suweldo pero tambak ang mga trabaho na kadalasa'y dahilan ng kanilang stress at dumaragdag pa sa mga binabalikat nilang problema.

Tinatawag natin silang pangalawang magulang ng ating mga anak, tagapaghulma ng kanilang talino, personalidad at talento, pero pagdating sa usapang suweldo, parang napapabayaan sila ng gobyerno.

At maliban sa panukala nating pagpapataas sa salary grade ng teachers, isinumite rin natin ang isa pang proposed bill na lilikha sa Teacher Education for Achievers (TEACH) program. Nilalayon naman natin dito na magkaroon ng mga well-trained teaching workforce. Sa pamamagitan ng programang ito, mabibigyan ng scholarships ang mga nagnanais na magkamit ng Education degree o sumailalim sa mga pagsasanay na may kinalaman sa edukasyon.

Kasama rin sa mga filed bills natin ang panukalang Teaching Supplies Allowance Act para mapataas ang tinatanggap na allowance ng ating mga guro. Kung sa ngayon ay P3,500 ang natatanggap na allowance ng kada guro, gagawin natin itong P5,000 per school year. Sabi nga natin, isa ang mga guro sa mga dumaranas ng krisis sa pinansiyal kahit pa kandakuba sila sa pagtratrabaho, kaya’t sa munting paraan na ito, sana ay makatulong sa kanila.

Patuloy ang mga pagsusulong natin ng iba’t ibang repormang pang-edukasyon dahil isa sa ating mga adhikain na maiangat ang antas ng Philippine education, kasabay ang paniniguro sa kapakanan ng mga mag-aaral at mga guro.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Tiwala at suporta, ibigay natin kay P-BBM

ni Sonny Angara - @Agarang Solusyon | July 2, 2022

Nanumpa na sa kanyang tungkulin ang ika-17 Pangulo ng Pilipinas na si President Ferdinand ‘Bongbong’ Marcos, Jr. Isang makasaysayang kaganapan na nasaksihan ng sambayanang Pilipino na umaasang sa panibagong yugtong ito sa ating bansa ay magtutuluy-tuloy na ang pagbangon natin mula sa krisis na dulot ng pandemya. At sa pagpapalit administrasyon, asahan natin na marami ring isasailim sa mga pagbabago, pagrerepaso at kung ano pang nararapat na proseso.

Sa pagkakataong ito, mas mabuting ibigay din natin ang tiwala sa bagong Pangulo na magagampanan niya nang mahusay ang kanyang tungkulin at maakay tayo tungo sa mas maunlad na Pilipinas.

Nasabi natin ito dahil hindi biro na mahigit 31 milyong Pilipino ang nagtiwala at nagluklok sa kanya sa pinakamataas na posisyon sa gobyerno. Ibig sabihin, napakarami ng ating mga kababayang umaasa na may kakayahan si Pangulong Marcos sa gitna ng dinaranas nating krisis sa kasalukuyan.

Sa panahon ng kampanya, hanggang sa kanyang tuluyang pagkapanalo, ilang ulit na rin namang inilatag ng bagong Pangulo ang kanyang mga nakatakdang programa at proyekto para sa bansa. At umaasa tayong matutupad ang kanyang mga ipinangako.

Kung susuriin natin, makikitang malakas ang napiling mga tauhan ni Pangulong Marcos na bubuo sa kanyang economic team. Mga de-kalibre at sukat na ang kakayahan pagdating sa pagpapalakas ng ekonomiya. Ang ilan sa kanila, nagsilbi sa gobyerno ni dating Pangulong Duterte at dito nila ipinakita ang kanilang galing.

At dahil si Pangulong Marcos din ang mangangasiwa sa Kagawaran ng Pagsasaka, marami ang umaasa na talagang mareresolba niya ang problemang kinahaharap ngayon ng agrikultura, partikular ng ating mga kaawa-awang magsasaka at mangingisda. Sana nga bilang kalihim pang-agrikultura, matiyak ng Pangulo ang seguridad ng pagkain sa bansa.

Ang isa pang sektor na dumaranas ng krisis sa kasalukuyan dahil pa rin sa negatibong epekto ng pandemya ay ang edukasyon. At dahil itinalaga ng Pangulo si Bise-Presidente Sara Duterte bilang kalihim ng Edukasyon, umaasa rin tayong itutuloy niya ang magagandang napasimulan ni Sec. Liling Briones at repasuhin ang mga programang dapat sumailalim sa reporma.

Sa pagkakataong ito, na ang Pangulo at ang Pangalawang Pangulo ay mula sa magkaalyadong partido, sana nama’y ipagpatuloy nila ang pagtutulungan para siguradong tatakbo ang kaunlaran at sama-sama nilang maiangat sa matinding kahirapan ang ating mga kababayan.

Muli, isang mainit na pagbati sa ating bagong Pangulo, Ferdinand Romualdez Marcos, Jr.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com