Produktong Pinoy, makikilala na sa buong mundo

ni Sonny Angara @Agarang Solusyon | November 11, 2023

Lumusot na sa Senado ang isa sa mga pinakamahahalaga nating panukalang batas – ang Tatak Pinoy Bill (Proudly Filipino), na ang pangunahing layunin ay mapalakas at maisulong ang mga produktong Pinoy at makilala sa iba’t ibang panig ng mundo.

Kabuuang 23 kasamahan nating senador ang bumoto sa pagpasa ng ating panukala (Senate Bill 2426 or the Tatak Pinoy Act) na inisponsor din natin bilang chairman ng Senate Committee on Finance.

Ang totoo nito, taong 2019 pa natin sinimulang isulong ang Tatak Pinoy dahil alam nating makatutulong sa ekonomiya ng Pilipinas kung mapalalakas ang mga produktong Pinoy at tangkilikin hindi lamang dito sa ating bansa kundi maging sa ibayong dagat.

Sa pamamagitan din nito, lalakas din ang mga lokal na negosyo at industriya, at ang kakayahan nating makapag-produce ng mga unique at sophisticated goods and services.

Sakaling tuluyang maging batas, ito rin ang magpapalakas sa ugnayan ng gobyerno at pribadong sektor lalo na sa pagpapatupad ng mga proyekto, maging ito man ay imprastraktura o mga inisyatibong huhulma sa talento at kakayahan ng Philippine workforce. Isa pa, mas magiging paborable ito sa private sector.

Uulitin lang natin ang pasasalamat sa Pangulo, gayundin sa ating Senate President at kay House Speaker Martin Romualdez dahil ibinilang nila ang ating panukala sa Legislative Executive Development Advisory Council priority bills. Ibig sabihin, malaki ang posibilidad na sa lalong madaling panahon ay tuluyan nang maging batas ang Tatak Pinoy bill.

Isa sa mahahalagang kakayahan ng ating proposed bill ay naaayon ito sa nilalayon ng Philippine Export Development Plan 2023-2028 na gawing globally competitive at mas marami pa ang mga bansang tatangkilik sa mga produktong Pinoy.

Saan nga ba natin nakuha ang ideya sa paglikha ng Tatak Pinoy bill?

Ito ay inspired ng Atlas of Economic Complexity developed by Dr. Ricardo Hausmann ng Harvard University at ni G. Cesar Hidalgo ng University of Toulouse. Sa kanilang pag-aanalisa, nalaman nila kung bakit mas malakas ang ekonomiya ng ibang bansa kumpara sa iba.

Sa pagtatasa ng Atlas, pang-33 ang Pilipinas sa 128 bansa na nagiging mabilis ang economic growth dahil sa malaking kakayahan ng mga bansang ito na mas malinang pa, kung mapalalawak lamang ang market reach nito hanggang sa pandaigdigang merkado.

Kung magkakagayon, malaking tulong ang ganitong development sa mga bansang mabilis ang economic growth at tiyak na magiging daan upang magkaroon ng malaking oportunidad ang kani-kanilang mamamayan.

Ilang taon ding naligwak ang Pilipinas, alam naman natin ‘yan. Dala ‘yan ng mahigit dalawang taong pandemya na talagang nagpabagsak sa mga negosyo at industriyang Pilipino.

Ang Tatak Pinoy Bill ay tiyak na makatutulong sa pagsisikap nating makabawi. Bagaman medyo umangat na tayo kahit paano mula sa pandemya, mas lalo pa tayong lalakas kung may malinaw tayong hakbang para mas lalo pang pabilisin ang paglusog ng Philippine economy. Kaya pakiusap natin sa Kamara, sana’y aksyunan na rin nila sa lalong madaling panahon ang panukalang ito na sigurado namang makatutulong sa ating lahat lalo na sa ating bansa.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Early voting for seniors and PWDs, dapat nang maisabatas

ni Sonny Angara @Agarang Solusyon | November 4, 2023

Bagaman may ilang ulat ng karahasan, partikular sa ilang rehiyon sa bansa, ang nagdaang Barangay and Sangguniang Kabataan Elections o BSKE ay naging tagumpay sa kabuuan, ayon sa Commission on Elections. Naiproklama na rin ang mga naihalal na opisyal.

At pakiusap natin sa mga nagwagi, sana’y maging makatotohanan sila sa kanilang mga ipinangako noong kampanya. Kung ano ang nakalagay sa kanilang plataporma, sana, yun ang maging pundasyon nila sa pagsisilbi. At para naman sa ating mga kabataang lider, ang SK, maging kaakibat sana kayo ng ating barangay officials sa pagsusulong ng pagbabago sa inyong mga respetadong komunidad.

Ang inyong lingkod ang author ng Republic Act 11768 na nagpapalakas sa kapangyarihan ng SK upang mas maging progresibo ang kanilang ginagampanang papel sa lipunan. Sa ating nilikhang batas, mas binigyan natin ng responsibilidad ang SK members upang mas makilala sila sa larangan ng pagtulong, kaysa sa mga simpleng sportsfest at pageants.

At mabalik tayo sa usapang eleksyon, liban sa ilang insidente ng kaguluhan sa ilang rehiyon, andu’n pa rin ang reklamo ng ating mga botante lalo na mula sa hanay ng mga senior citizen at mga PWDs.

Sa natanggap kasi nating mga report, maaga pa lamang, dakong alas-5 pa lamang ng umaga, nasa voting precincts na ang mga nakatatanda para makaboto na nang mas maaga at di na makasabay pa sa mahahabang pila. Pero hindi pa rin pala talaga sila makakaaiwas sa mga problema -- hindi raw sila pinayagang bumoto agad. Sabi ng election officers sa kani-kanilang mga lugar, hindi raw sila pumayag sa early voting ng seniors dahil wala naman daw instructions sa kanila ang Comelec.

May nauna mang instruction ng early voting for seniors and PWDs, pero dalawang LGUs lang ang pinayagan: Ang Naga at ang Muntinlupa. At ang siste pa po, naghintay pa rin ng hanggang alas-7 ng umaga ang seniors at PWDs sa dalawang nabanggit na lugar bago pinayagang makaboto.

Nakakaawa ang mga lolo’t lola na kailangang umakyat ng ilang hagdan para puntahan ang mga poll precincts nila. May ibang usapin naman na may mga PWDs at seniors naman na hindi pumayag na iba ang maghuhulog ng kanilang balota sa ballot box, na naiintindihan naman natin.

Mahirap nga namang magtiwala sa mga panahong ito, lalo na ang sagradong boto natin.

Pero sa kabuuan ng pilot implementation ng early voting para sa PWDs and seniors, naging maayos naman daw ito, ayon kay Comelec chair George Garcia. Kaya nga nakiusap si chairman Garcia na kung puwede raw, bago pa dumating ang 2025 elections, magkaroon na ng batas na nagpapatupad nito.

Naghain po tayo ng Senate Bill 777 noon pang Hulyo 2019 at ang pakay nga po natin sa panukala nating ito ay bigyang prayoridad ang seniors at PWDs na makaboto nang mas maaga kaysa mga regular na botante. Bigyan sila ng eksklusibong lugar para makaboto at hindi yung kailangan pa silang umakyat ng ilang palapag o lumakad nang napakalayo.

Sinabi rin natin sa ating panukala na sa loob ng 15 araw bago ang mismong halalan, ibigay sa kanila ang dalawang araw mula rito para mauna nang makaboto.

Marami na tayong naisagawang pagdinig para sa batas na ito. At sana nga, sa mga susunod na buwan ay matalakay na ito sa Senado. Nauna na pong magpasa ng kanilang sariling bersyon ang Kamara kaugnay ng panukalang ito kaya sana naman, maipasa na rin ito sa Mataas na Kapulungan.

Malaking tulong ito sa ating vulnerable voters na muling sasabak sa botohan sa 2025.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Public Employment Service Office, malaking tulong sa mga manggagawa sa loob at labas ng bansa

ni Sonny Angara @Agarang Solusyon | October 28, 2023

Sa higit 23 taon, naging malaking tulong ang Public Employment Service Office (PESO) sa mga kababayan nating naghahanap o gustong makasiguro ng mapapasukang trabaho mapa-lokal man o sa ibayong-dagat.

Ang PESO na matatandaang isinabatas sa ilalim ng RA 8759 ay itinatag sa kapitolyo ng mga lalawigan, maging sa malalaking lungsod at strategic areas sa iba’t ibang panig ng bansa. Sa madaling salita, ang PESO ay makikita sa mga komunidad na pinangangasiwaan ng mga lokal na pamahalaan, gayundin ng ilang NGOs at community-based organizations at SUCs. Konektado ang PESOs sa regional offices ng DOLE na siyang namamahala sa coordination at technical aspects nito, at sa DOLE central office bilang bahagi ng national employment service network.

Bilang pagkilala sa napakahalaga at napakalaking papel na ginagampanan ng PESOs, sumailalim sa pagrebisa ng Kongreso ang RA 8759 noong 2015 sa pamamagitan ng RA 10691 na mas nagpalakas sa sistema ng PESOs at para mapalawak ang sakop nito hanggang sa pinakamababang sangay ng LGUs sa buong bansa.

Bilang chairman ng Committee on Labor Employment and Human Resources nang mga panahong iyon, tumayo tayong sponsor ng naturang batas na pangunahing iniakda ng ating kasamahang si Senador Jinggoy Estrada. At dahil nakita natin ang tagumpay ng PESOs, naging maigting ang ating pagnanasang mas mapalawak ang tulong nito hanggang sa malalayong lugar ng Pilipinas.

Matapos maisabatas ang RA 10691 noong Oktubre 26, 2015, naitatag na ang PESOs sa lahat ng lalawigan, lungsod at munisipalidad sa bansa. Mas maraming bayan ang naabot, at mas maraming Pinoy ang natulungan ng batas, saan mang panig sila ng Pilipinas nagmula.

Naging daan din ang batas na ito upang maging modern public employment service intermediary ang PESO, na nagkakaloob ng multi-dimensional employment facilitation services. At liban sa job facilitation, nagkakaloob din ang PESOs ng labor market trends and information, livelihood, skills and entrepreneurship training, at iba pa.

Ayon sa datos mula sa DOLE, tinatayang 2 milyong Pinoy na naghahanap ng trabaho ang natulungan ng PESOs. At dahil dito, ayon sa ahensya, nakapagtala tayo ng mas maayos na pag-eempleyo.

Sa ulat naman ni DOLE Secretary Bienvenido Laguesma na tumatayong overall administrator at coordinator ng PESOs, sinabi niyang may kabuuang 1,190 job fairs na ang inorganisa ng kanilang ahensya na isinagawa sa iba’t ibang lugar sa bansa mula pa noong July 2022.

Sa mga nasabing job fair, ayon pa rin kay Sec. Laguesma, mahigit 320,000 jobseekers ang nakapagparehistro, kung saan higit 50,000 sa kanila ang aktuwal na nakakuha ng trabaho sa mismong araw ng kanilang aplikasyon.

Malaking tulong din daw sa mga ganitong pagkakataon ang RA 11261, ayon pa kay Sec. Laguesma – ito ang First Time Jobseekers Assistance Act na iniakda natin noong 17th Congress. Nilikha natin ang batas na ito upang mas mapagaan ang paghahanap ng trabaho para sa ating jobseekers.

Nilalayon kasi ng nasabing batas na gawing libre para sa mga first time na naghahanap ng trabaho tulad ng mga fresh grads ang pagkuha ng mga kinakailangang dokumento para sa kani-kanilang job applications.

Kaugnay sa usapin ng unemployment, sa lumabas na datos nitong Agosto 2023, bumaba ang ating unemployment rate sa 4.4 percent mula sa 4.8% noong July. Makikita ang malaking pagbaba mula sa 5.3% rate na naitala sa kaparehong buwan noong 2022.

Maging ang underemployment ay bumaba rin sa 11.7 percent nitong nakalipas na Agosto mula sa 15.9 percent, Hulyo ngayong taon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com