Babala na dapat labanan ang pagka-inip dahil ‘di safe maglakwatsa

ni Seigusmundo Del Mundo - @Panaginip, salamin ng inyong buhay | July 10, 2020

Salaminin natin ang panaginip ni Loida na ipinadala sa Facebook Messenger.

Dear Professor,

Sumakay ako ng jeep papunta sa Cubao. Nagtataka ako dahil ang jeep ay hindi sumunod sa regulasyon na may mga plastic divider sa mga upuan. ‘Yung jeep sa panaginip ko, ‘yung dating hitsura ng jeep.

Bumaba ako dahil kinabahan ako at sabi ko, baka holdaper ‘yung driver, pero nang bababa na ako, nabosesan ko siya. Taga sa amin pala siya at mabait na tao, kaya lang, nasa baba na ako kaya hindi na ako sumakay ulit.

Ano ang kahulugan ng panaginip ko?

Naghihintay,

Loida

Sa iyo Loida,

Masyadong kang nainip dahil sa matagal na hindi paglabas ng bahay o matagal-tagal ka na ring hindi nakakapunta sa Cubao. Ito ang dahilan kung bakit napanaginipan mo na nasa jeep ka papunta sa Cubao.

Labanan mo ang iyong pagkainip. Baka hindi makabuti sa iyo na pumunta sa Cubao dahil mas maraming may sakit sa Cubao kaysa sa mga ibang bayan o siyudad.

Kung hindi naman gaanong mahalaga ang gagawin mo, mas magandang sumunod ka pa rin sa utos ng mga awtoridad na “stay at home” kahit na parang niluwagan ang pagpapatupad ng quarantine sa mga bayan.

Ang niluwagan o nagluwag ay para lang sa mga maghahanapbuhay dahil kailangan nang mabuhay ang ekonomiya. Ibig sabihin, ang stay at home pa rin ang dapat na gawin.

Ang kapitbahay mong mabait na sa panaginip mo ay naging driver ng jeep ay nagsasabi na ang relasyon ng magkakapitbahay sa inyong lugar ay nasa magandang kalagayan.

Ibig sabihin, maraming mababait at isa na rito ang driver sa iyong panaginip.

Mapalad ka dahil sa ibang lugar, ang mga tao ay nabubuhay nang kani-kanya at parang hindi magkakakilala. Sa barangay na mababait ang mga tao, kakaunti ang krimen dahil ang gumawa ng hindi maganda ay nakararanas ng “isolation.”

Hindi ito ‘yung ia-isolate tulad ng may COVID-19 para hindi makahawa, ito ay ang hindi nakikitang sistema sa mga komunidad na kapag hindi matino ang isang tao, walang kumikibo sa kanya.

Hanggang sa muli,

Professor Seigusmundo del Mundo

Kahulugan ng nasa dagat at nakasakay sa barko

ni Seigusmundo Del Mundo - @Panaginip, salamin ng inyong buhay | July 9, 2020

Salaminin natin ang panaginip ni Abe na ipinadala sa Facebook Messenger.

Dear Professor,

Madalas akong managinip na nasa dagat ako at nakasakay sa barko. Minsan, sa isang malaki at mahabang bangka na may motor. Noong bata pa lang ako, palaging may dagat sa panaginip ko.

Ano ang ipinahihiwatig ng mga ito?

Naghihintay,

Abe

Sa iyo Abe,

Ang dagat sa panaginip ay simbolo ng pangarap o dreams in life. Kaya ang nanaginip ng dagat ay pinaniniwalaang may pangarap. Dahil dito, siya rin ay may malayong mararating sa kanyang buhay.

Sa biglang tingin, ito ay magagandang panaginip pero bilang pagtatapat sa iyo, kailangan mong lumayo sa iyong lupang sinilangan. Dahil kapag ayaw mo, nagdadalawang-isip ka o may mga bagay o taong ayaw mong iwanan, makararanas ka ng mga susunod na kapalaran:

Ang udyok ng kapalaran na ang ibig sabihin ay uudyukan ka ng iyong kapalaran na lumayo o iwanan ang iyong bayan at mga mahal sa buhay. Mahirap gawin ang ganu’n, kaya maaaring hindi ka magpaudyok sa iyong kapalaran kaya lang, ang susunod mong mararanasan ay ang tulak ng kapalaran kung saan makararanas ka ng ilang maliliit na kabiguan at ikaw ay itutulak palayo sa mahal mo sa buhay.

Kung sakaling hindi mo pa rin tutulan ang tulak ng iyong kapalaran, this time, ang mapasasaiyo ay ang batok ng kapalaran.

Maaaring alam mo na ang ibig sabihin ng “batok ng kapalaran” at ito ay hindi magandang kaganapan dahil ikaw mismo ay masasaktan dahil sa totoo lang, ang lahat ng nabatukan ay nasaktan.

Kung sakaling matigas pa rin ang ulo mo, ang huling mararanasan mo ay hulaan mo kung ano. Ano kaya ito?

Mararanasan mo ang tinatawag na “bitbit ng kapalaran” na ang ibig sabihin, sa ayaw o sa gusto mo, ikaw ay dadalhin ng iyong kapalaran sa malalayong lugar dahil doon ay makakaharap mo nang personal o mukhaan ang mga suwerte mo sa buhay.

Ito ang ibig sabihin ng dagat kapag madalas na mapanaginipan.

Hanggang sa muli,

Professor Seigusmundo del Mundo

Inilabas ang mga laruan noong bata, senyales na kailangang magsaya kahit minsan

ni Seigusmundo Del Mundo - @Panaginip, salamin ng inyong buhay | July 8, 2020

Salaminin natin ang panaginip ni Flora na ipinadala sa Facebook Messenger.

Dear Professor,

Inilabas ko ‘yung mga dolls na laruan ko noong bata pa ako, pero sa totoong buhay, wala na ang mga ‘yun at itinapon na namin dahil sobrang luma na.

May mga panaginip din ako na may mga kalaro akong bata, tapos masaya kami na naghahabulan at nagtataya-tayaan. Madalas, ako ang natataya dahil mabagal akong tumakbo, pero masayang-masaya kaming lahat.

Ano ang ibig sabihin ng mga panaginip kong ito?

Naghihintay,

Flora

Sa iyo Flora,

Mukhang mabilis kang nagkaka-edad. Baka naman sobrang seryoso ka sa paghahanapbuhay dahil nakakatanda ang buhay na seryoso dahil halos hindi na siya makatawa o makangiti.

Ang pagtawa at pagngiti ay pumipigil sa pagtanda, kaya ang masayahin ay nananatiling mas mukhang bata.

Sabi ng iyong panaginip, minsan, masarap maging bata. Kumbaga, kahit seryoso ka sa buhay mo, paminsan-minsan ay kumilos at mabuhay ka na parang bata. Pero wala ka namang makakalaro ngayon dahil kapag niyaya mo ang mga kasing-edad mo, baka matawa lang sila sa iyo.

Gayunman, kapag sinabi mo sa kanila na sa buhay ng tao, minsan ay masarap maging bata, ayain mo agad ng jack-en-poy ang maniniwala sa iyo at kayo ay biglang sasaya at uulit-ulitin n’yo ang larong ito.

Maganda rin kung puwede kayong pumunta sa bukirin o pasyalan ng mga bata kung saan makikita n’yong malayang naghahabulan ang mga bata. Pero malabo na may ganitong lugar ngayon dahil bawal lumabas ang mga bata.

Mag-isip ka ng mga larong pambata at ito ay iyong laruin. Puwedeng-puwede rin at tiyak na iyong magugustuhan na harangin ‘yung tindero ng sorbetes, bumili ka at ubusin.

Puwede rin ang pagkain ng mga sitsirya, pero lagyan mo ng limitasyon.

Minsan, masarap maging bata, lalo na kapag ang tao ay sobrang seryoso sa buhay nila. Ito ang tandaan mo habang nagsisikap kang umasenso.

Hanggang sa muli,

Professor Seigusmundo del Mundo