Dagat, simbolo ng paglayo para sa ikabubuti ng kabuhayan

ni Seigusmundo Del Mundo - @Panaginip, salamin ng inyong buhay | July 29, 2020

Salaminin natin ang panaginip ni Oneck na ipinadala sa Facebook Messenger.

Dear Professor,

Nasa tabing-dagat ako, tapos namumulot ako ng shells at isda. Nag-iisa lang ako at ‘yung ibang isda ay iniihaw ko. Tapos, muli akong pupunta sa dagat, sisisid, tapos may mga octopus akong nakukuha. Hindi man karamihan, pero iniisip ko na matutuwa si misis ‘pag inuwi ko ang mga nakuha ko dahil sariwa at masarap na ulam.

Malayo ako sa dagat ngayon at nasa Nueva Ecija ko. Rito ako nag-stay at ang negosyo ko ay ang mamili ng mga gulay tapos ibebenta ko sa mga traders. Maliit lang ang kita pero okey naman. Ano ang kahulugan ng panaginip ko?

Naghihintay,

Oneck

Sa iyo Oneck,

Ang dagat ay simbolo ng paglayo kung saan namamalagi ang nanaginip. Mahirap ang malayo sa mga mahal sa buhay. Minsan kahit naman nag-iisa, ang lumayo sa sariling bayan ay mahirap din matanggap ng kalooban.

May mga bagay sa mundo na sadayang mahirap pero kailangang gawin para sa ikabubuti ng buhay o kalagayan.

Sabi ng iyong panaginip, kung nasaan ka ngayon, may suwerte ka. Kaya ang iyong panaginip ay nagpapayo rin na talasan mo ang iyong isipan nang sa gayun ay mapakinabangan mo nang husto ang pagiging malayo mo sa inyo.

Ang pahabol na payo ay maging mapagpahalaga ka sa mga biyayang napasasaiyo.

Huwag kang tutulad sa iba na dahil mahirap sa malayo at malungkot, inuubos ang kinita dahil sinasabing sila ay nagsasaya lang naman.

Palagi mong iisipin na kaya ka nasa malayo ay para maghanapbuhay, kaya dapat lang na ang paghahanapbuhay ang iyong tutukan. Huwag mo ring kaliligtaan na kaya ka naghahanapbuhay ay para magkaroon ng magandang kinabukasan ang iyong mga minamahal.

Hanggang sa muli,

Professor Seigusmundo del Mundo

Kahulugan ng umakyat sa puno ng niyog

ni Seigusmundo Del Mundo - @Panaginip, salamin ng inyong buhay | July 28, 2020

Salaminin natin ang panaginip ni Albert na ipinadala sa Facebook Messenger.

Dear Professor,

Umakyat ako sa puno ng niyog, tapos ang dami kong nakuhang bunga. ‘Yung iba ay hinulog ko sa lupa at ‘yung iba ay hawak ko hanggang makababa ako. Ano ang ibig sabihin nito?

Naghihintay,

Albert

Sa iyo Albert,

Tree of life ang tawag sa coconut tree dahil halos lahat ng parte ng niyog ay napakikinabangan ng tao. Ang iba kasing mga puno, hindi lahat ng parte o bahagi ay may benepisyo para sa tao.

Sa iyong panaginip, ang coconut tree ay tree of success. Oo, iho, ito ay simbolo ng tagumpay ng isang tao.

Sa mundo ng pananagumpay, ito ay aakyatin, kaya maririnig natin, tuktok ng tagumpay, rurok ng tagumpay at bundok ng tagumpay. Ito ay nagpapahiwatig ng pag-akyat.

Samantala, sa mundo ng panitikan o literatura, ang success ay inaakyat ng mga bida kung saan bago makarating sa itaas ay mapapalaban muna sila sa kung anu-anong nilalang, at siyempre, kailangang talunin nila ang mga ito.

Sa ganitong katotohanan nabuo ang isang susi ng tagumpay na sinasabi ng maraming life coaches na “Ang matatapang at buo ang loob ang magiging successful.”

Kaya kapag binalikan natin ang iyong panaginip, nakaakayat at nakababa ka, gayundin, may dala kang mga niyog at sa ibaba, may mga bunga na inihulog at naghihintay sa iyo.

Sa madaling salita, taglay mo ang tapang at lakas ng kalooban para mapabilang sa mga taong magkakaroon ng matagumpay na buhay.

Hanggang sa muli,

Professor Seigusmundo del Mundo

Super-hirap sa buhay at walang matakbuhan, kahulugan ng magandang hardin sa panaginip

ni Seigusmundo Del Mundo - @Panaginip, salamin ng inyong buhay | July 27, 2020

Salaminin natin ang panaginip ni Ms. Kopiko na ipinadala sa Facebook Messenger.

Dear Professor,

Nasa magandang hardin ako at magaganda ang mga bulaklak, tapos may mga butterfly din. May nakita rin akong fountain pero hindi gawa ng tao, nandu’n lang siya, may umaagos at malinaw na tubig.

Magsha-shower sana ako, kaya lang, naisip ko na wala naman ako sa bahay namin. As in, bakit ako magsha-shower du’n, eh, hindi ko naman alam ‘yung lugar na ‘yun?

Naglakad-lakad ako at nakita ko na napakaganda pala talaga ng hardin na naputahan ko. Parang hindi ako napapagod sa kalalakad. Ano ang ibig sabihin nito?

Naghihintay,

Ms. Kopiko

Sa iyo Ms. Kopiko,

Huwag kang mabibigla sa kahulugan ng iyong panaginip dahil ito ay nagsasabing ang buhay mo sa kasalukuyan ay kabaligtaran ng magandang hardin na iyong napuntahan.

Kaya sa reyalidad, ikaw ay hirap na hirap sa iyong kalagayan. Feeling mo, hindi maganda ang dating sa iyo ng mga tao. Gayundin, ramdam mong nag-iisa ka at walang nakakaintindi sa iyo. Maaaring may mga ilang kaibigan ka, pero sila rin ay nabubuhay sa paniniwala na “tayo ay kani-kanya”. Kumbaga, hindi mo naman sila talaga puwedeng asahan at abala sila sa kanilang personal na buhay.

Pero ‘wag kang mag-alala dahil ang iyong panaginip ay nagbibigay ng mensahe na “kapit lang” at sa huli ay liligaya ka rin kung saan matutupad ang mga pangarap mo sa buhay.

Hanggang sa muli,

Professor Seigusmundo del Mundo