Paalala na kailangang maging matatag kahit takot sa panganib ng COVID-19

ni Seigusmundo Del Mundo - @Panaginip, salamin ng inyong buhay | August 7, 2020

Salaminin natin ang panaginip ni Meriam na ipinadala sa Facebook Messenger.

Dear Professor,

Tuwing ala-1:00 ng hapon, natutulog ako kasabay ng mga anak ko. Noong mga nakaraang araw, dalawang beses akong nanaginip na nagising ako sa aking pagtulog na madilim ang langit. Kakaiba sa panaginip ko dahil alam kong hapon nu’n, kaya nagtataka ako kung bakit madilim ang langit. Ano’ng ibig sabihin nito?

Naghihintay,

Meriam

Sa iyo Meriam,

Kapag ang tao ay nabubuhay sa panahon ng matinding agam-agam o sobrang pag-aalala dahil sa mga nakakatakot na kaganapan, na walang nakikitang kaliwanagan kung kailan magtatapos ang mga araw ng pag-aalala, siya ay mananaginip ng tulad ng panaginip mo na madilim ang langit kahit tanghaling-tapat.

Ibig sabihin, masyado kang naaapektuhan ng COVID-19. Hindi mo man aminin, ito ay masasalamin na nasa iyong kalooban. Bagama’t nakakatakot ang panahon ngayon dahil sa pandemya, panatilihin mo ang iyong katatagan dahil may mga anak ka at kailangan ka nila.

Sa panahon ng pagkabagabag o ang mga tao ay ninenerbiyos, magandang maalala ang nakasulat sa Banal na Kasulatan na nagsasabing, “There are three that bear in heaven, Hope, Faith and Love.”

Kaya, panatilihin mong buhay ang ningas ng iyong hope o pag-asa nang sa gayun ay hindi ka maging negatibo. Ang pag-asa ay ang nakatingin ang tao sa dako pa roon ng kanyang landas na tinatahak ay may positibong kapalarang naghihintay.

Alam mo rin, ayon sa mga sikolohista, kapag ang tao ay positibo, lumalakas ang kanyang immune system na higit kailanman ay kailangan ng lahat ng tao.

Hanggang sa muli,

Professor Seigusmundo del Mundo

Kahulugan ng namimitas ng bulaklak sa bukirin

ni Seigusmundo Del Mundo - @Panaginip, salamin ng inyong buhay | August 6, 2020

Salaminin natin ang panaginip ni Laiza na ipinadala sa Facebook Messenger.

Dear Professor,

Namimitas ako ng mga bulaklak sa bukirin, du’n sa taniman ng gulay namin, pero may mga tanim din kaming halaman na namumulaklak.

Tuwang-tuwa ako at masayang naglalakad na para akong sumasayaw habang namimitas ng mga bulaklak. Ayaw ko nang umuwi, pero halos gabi na kaya umuwi na rin ako.

Naghihintay,

Laiza

Sa iyo Laiza,

Maaaring hindi mo aminin, pero ang katotohanan ay masasalamin sa iyong panaginip na ngayon ay hindi maganda ang iyong kalagayan.

Bukod pa rito, nakita rin sa iyong panaginip na malungkot at parang sinasabi mong bigo ka sa mga pangarap mo. Gayunman, ikaw lang naman ang nag-iisip ng ganu’n dahil sinasabi rin ng iyong panaginip na “bukas” o sa hinaharap ay matutupad ang lahat ng iyong pangarap.

Kaya mas magandang tumingin ka sa marami pang bukas na darating sa iyong buhay na ang ibig sabihin ay hindi mawawala ang magagandang oportunidad na mapaangat mo ang iyong buhay.

Maaaring hindi mo rin paniwalaan, pero ito ay mangyayari kung saan ang kabuuan ng mensahe ng iyong napanaginipan ay ikaw ay tiyak na yayaman.

Hanggang sa muli,

Professor Seigusmundo del Mundo

Pasaherong namigay ng P5K, simbolo na mapagpala si god

ni Seigusmundo Del Mundo - @Panaginip, salamin ng inyong buhay | August 5, 2020

Salaminin natin ang panaginip ni Rodney na ipinadala sa Facebook Messenger.

Dear Professor,

Suki ako ng BULGAR at nalungkot ako nang mawala ang BULGAR dahil sa Covid-19 pandemic. Jeepney driver ako at napanaginipan ko na pumasada ako at may pasahero akong babae. Ang suot niya ay pangkaraniwan lang, tapos nang bumaba siya, binigyan niya ako ng P5,000.

Laking-gulat ko at hindi ko agad tinanggap ‘yung pera, pero sabi niya, “Sa iyo na lang ‘yan, tulong ko sa pamilya mo.” Binilang ko ‘yung pera na ibinigay sa akin, tapos umalis na ‘yung babae, nakangiti ako nang binibilang ko ‘yung pera.

Sa totoong buhay, may asawa at tatlong anak ako. Napakahirap ng buhay at nabaon na kami sa utang. Kapag kumakain kami, kahit ano lang dahil wala namang trabaho.

Pero si misis ay nagtitinda ng pagkain sa umaga tulad ng pansit, sopas, tapos minsan ay spaghetti. Mayroon din siyang tinda na samalamig, na kumikita rin naman kahit paano.

Ano ang kahulugan ng panaginip ko?

Naghihintay,

Rodney

Sa iyo Rodney,

Ngayong panahon ng COVID-19 pandemic, walang katiyakan ang lahat kung ano ang mangyayari dahil hindi naman bumaba ang bilang ng nagkakasakit, bagkus, dumarami pa kaysa dati.

Puwedeng bukas, sobrang higpit ulit, puwede ring biglang magluwag. Ano’t anuman, kahit paano ay nakaka-survive kayo ng pamilya mo, kumbaga, para-paraan lang naman ang buhay sa panahon ng kalamidad.

Ang tunay na dahilan kung bakit napanaginipan mo na binigyan ka ng P5,000 ng iyong pasahero ay dahil gusto mong magkapera ng nasa libong piso. Kaya sa iyong panaginip, ito ay nagkatotoo.

Ang tanong sa tunay na buhay, magkatotoo rin kaya ito? Ang sagot ay oo dahil ang babae sa panaginip mo, sa totoo lang ay simbolo na mapagpala at maaawain si God.

Nagtataka ka siguro kung bakit babae Siya, gayung ang alam ng marami, si God ay lalaki.

Mali ang ganu’ng paniniwala, si God ay hindi lalaki o babae, walang gender ang spirit at dahil si God ang Holy Spirit, wala rin Siyang gender, as in, hindi Siya babae o lalaki.

Pero si God, tulad ng nasabi na may maamong kalooban at maawaing puso kung saan ang katangiang ito ay para sa feminine personality kaya si God sa panaginip mo ay nag-anyong babae. Baka magtakaka ulit, para malinaw, kahit ano’ng porma ay magagawa ni God, puwedeng Siya ay nasa anyong bata, matanda at anyong kasing-edad mo lang.

Minsan nga, si God, ayon kay Moses ay nasa anyong puno, nagliliyag na puno na siya ay kinakausap. Minsan naman, ang Holy Spirit nasa anyong ng kalapati.

Dahil si God ang nasa panaginip mo, mahirap lang paniwalaan pero sure na ikaw ay makakahawak ng libu-libong piso at puwedeng lagpas pa ito sa P5,000.

Hanggang sa muli,

Professor Seigusmundo del Mundo