Pahiwatig na makapag-aabroad 'pag safe na ang mundo vs. COVID-19

ni Seigusmundo Del Mundo - @Panaginip, salamin ng inyong buhay | September 9, 2020

Salaminin natin ang panaginip ni Zelly na ipinadala sa Facebook Messenger.

Dear Professor,

Kausap ko ‘yung hinahangaan kong manghuhula. Sabi ko sa kanya, “‘Di ba, lahat ng hula mo ay nagkakatotoo?” Sagot niya, “Oo.” Inulit ko pa, pero iisa lang ang sinasabi niya.

Dumating na ‘yung bisita ng dati kong amo. Nag-impake ako at paalis na sa bahay. Nakakita ako ng malaking itim na maleta, pero hindi ko ‘yun dinala dahil kaunti lang naman ang dadalhin ko. Pinakita ko ‘yung laman ng bag ko sa katulong.

Nakita nu’ng katulong na may pulang bulaklak at singsing na puti. Sabi niya, sa kanya raw ‘yun, sagot ko naman, “Akin ‘yan.” ‘Yung pendant ‘yung sa kanya at parang kristal na puti ‘yung singsing.

Pakiramdam ko, aalis talaga ako sa bansa, pero hindi ko matiyak kung kailan. Sana ay ma-interpret n’yo ang panaginip ko dahil mas mahusay kayo sa ganitong larangan. Salamat at God bless!

Naghihintay,

Zelly

Sa iyo, Zelly,

Magkakatotoo ang pangarap mong makapag-abroad dahil ito mismo ang sinabi sa iyo ng hinahangaan mong manghuhula. Kaya mo siya hinahangaan ay dahil ang kanyang mga hula ay tama at nagkakatotoo.

Pero hindi pa ito mangyayari ngayon, kaya ‘yung pakiramdam mo na aalis ka at malapit na malapit na ay wish mo lang. Ibig sabihin, kung puwede ay makaalis ka na ngayon din.

Ang bakuna kontra COVID-19 para sa mga Pilipino ay sa susunod na taon pa darating. Hindi lahat ay sabay-sabay na mababakunahan, kumbaga, unti-unti lang ang pagbabakuna.

Kaya ang karamihan ay sa 2022 pa matuturukan. Ikunsidera pa ang nakasanayan dito sa atin na palakasan—mauuna ang mga namumuno o opisyales ng gobyerno.

‘Yung mga nasa korte, payag kaya sila na mahuli? Siyempre, hindi!

Ang mga magbabakunang taga-health department, papayag din ba sila na hindi sila ang mauna? Siyempre, hindi!

Sinabi na uunahin ang mga militar at pulis, ibig sabihin, mahuhuli ang mga pangkaraniwang mamamayan. Baka nga maubusan pa sila at sabihin na lang ng gobyerno na may paparating pa.

Hindi naman kayang pigilan ng gobyerno na mauna sa pagkuha ng bakuna ang mayayaman. Kung iiral ang nakasanayan na palakasan, siyempre, kasama sa mauuna ang kaanak at empleyado ng mga opisyal ng pamahalaan.

Dahil dito, hindi dapat umasa ang mga pangkaraniwang mamamayan na sila ang uunahin, kahit ang dahilan ay mag-aabroad na siya. Sa new normal, hindi gugustuhin ng mga bansang papasukan ng mga Pinoy na hindi nabakunahan ang tatanggapin nilang manggagawa, lalo na ang mga caregiver at domestic helper.

Ayon sa iyong panaginip, makapag-aabroad ka, pero muli, hindi pa sa malapit na hinaharap.

Hanggang sa muli,

Professor Seigusmundo del Mundo

Paalala na mag-rosaryo at maniwalang may diyos na tagapagligtas

ni Seigusmundo Del Mundo - @Panaginip, salamin ng inyong buhay | September 6, 2020

Salaminin natin ang panaginip ni Megumi na ipinadala sa Facebook Messenger.

Dear Professor,

Ano ang kahulugan panaginip ko tungkol kay Mama Mary na nakuha ko siya sa tubig at may rosaryo nakasabit sa kanya?

Naghihintay,

Megumi

Sa iyo Megumi,

Sa panahon ngayon na ang tao ay takot na takot, labis na nag-aalala at walang katiyakan kung ano ang hinaharap dahil sa COVID-19 pandemic, marami ang mananaginip sa mga banal na nilalang at isa na rito si Mama Mary.

Ang taong walang Diyos ay walang maaasahan sa kasalukuyang sitwasyon. Kaya sa tanong na may Diyos ba o wala, ang sagot ay mayroon dahil kung wala kang Diyos, para kang nasa mga sitwasyong hindi mo kontrolado.

Sa iyong panaginip, ipinaaalala ni Mama Mary na kapag may Diyos ka, may tagapagligtas ka. Kapag may Diyos ka, may tagapagtanggol ka at kapag may Diyos ka, may maglalayo sa iyo sa masama at kapag may sakit ka, pagagalingin ka ni Healing God.

Sabi ni Mama Mary, pray your rosary o mag-rosaryo ka. Sa pamamagitan ng pagrorosarayo, naaalala mo na si Mama Mary ay may espesyal na prebilehiyo na mag-request kay Lord ng mga kahilingang mahirap matupad.

Sa pagrorosaryo, maaalala mo na sabi ni God kay Mama Mary, “Ikaw ang babaeng bukod na pinagpala.” Oo, siya lang at wala nang ibang “bukod na pinagpala,” ‘yan mismo ang sinabi ni God, kaya tiyak na si Mama Mary ay bukod na pinagpapala.

Muli, magrosaryo ka. Ito ang mensahe ng iyong panaginip.

Hanggang sa muli,

Professor Seigusmundo del Mundo

Babala na may mga pagkukulang bilang asawa

ni Seigusmundo Del Mundo - @Panaginip, salamin ng inyong buhay | September 5, 2020

Salaminin natin ang panaginip ni Vannah ipinadala sa Facebook Messenger.

Dear Professor,

Palagi akong nananaginip na may relasyon ‘yung kapatid at asawa ko. Sa panaginip, iniwanan na ako ng asawa ko, tapos hindi ko matanggap ‘yung nangyari hanggang sa sinundo ako ng ex ko, pero bigla niya akong iniwanan habang naghahanap kami ng daan. Tapos walang daanan hanggang sa umalis na lang siya.

Ano ang kahulugan nito? Maraming salamat!

Naghihintay,

Vannah

Sa iyo Vannah,

Kapag ang nanaginip ay may pagkukulang sa kanyang asawa o karelasyon, siya ay mananaginip na iniwanan o ipinagpalit siya.

Dahil dito, suriin mo ang iyong sarili. Subukan mong hanapin kung may mga pagkukulang ka sa mister mo.

Ang mga pagkukulang sa buhay may-asawa ay puwedeng ang mga sumusunod:

• Sarili mo lang ang pinahahalagahan mo.

• Nakalimutan na ang mag-asawa ay pantay lang. Kumbaga, ang mister o misis ay hindi dapat umaasta na mas magaling siya sa kanyang asawa.

• Nakalilimutan mo ang obligasyon mo sa iyong asawa.

• Ikaw lang ang masaya at siya ay hindi.

• May bago kang damit, tapos siya ay wala.

• Gusto mo ay ikaw palagi ang masusunod.

• Nakalimutan mo ang mga pangangailangan ng iyong asawa.

Marami pang iba, pero ikaw na ang maghanap ng mga pagkukulang at pagkakamali mo. Huwag kang matakot dahil hindi naman totoo na may relasyon ang iyong asawa at kapatid. Kaya mo lang ito napanaginipan ay dahil may mga pagkukulang ka bilang misis.

Kapag naayos mo na ang iyong mga pagkakamali, mauunawaan mo na rin na ang kapatid mo sa panaginip at ikaw ay iisa, kumbaga, ikaw ang karelasyon ng mister mo.

Hanggang sa muli,

Professor Seigusmundo del Mundo