Kahulugan ng nagpagupit ng buhok

ni Seigusmundo Del Mundo - @Panaginip, salamin ng inyong buhay | September 12, 2020

Salaminin natin ang panaginip ni Zenny na ipinadala sa Facebook Messenger.

Dear Professor,

Bakit ko napanaginipan na nagpagupit ako ng buhok, eh, maiksi naman ‘yung buhok ko sa totoong buhay?

Naghihintay,

Zenny

Sa iyo, Zenny,

Ginugupitan din ang maiksi ang buhok kapag may mga lumagpas na sa orihinal na haba. Ito ay para ma-maintain ang ganda ng short hair.

Gayunman, ang kahulugan ng iyong panaginip na nagpagupit ka ng buhok ay nagsasabing mahaharap ka sa pakikipagsapalaran kung saan ikaw ay magiging sobrang abala at ang sipag at lakas mo ay matutuon sa iisang layunin.

Kaya ang iyong panaginip ay nagpapayo na ihanda mo ang iyong sarili sa buhay na palaging busy, pero masaya ka at dumarami ang iyong kaban-yaman.

Mas maganda nang nakahanda kapag dumating ang nasabing pagkakataon dahil kung hindi, parang nabigla at hindi ka makapaniniwala.

Kapag nakapaghanda ka, mapabibilis ang mga pangyayari at mararanasan mo na ang buhay ng mga taong tuluy-tuloy na umaasenso.

Hanggang sa muli,

Professor Seigusmundo del Mundo

Kinagat ng aso, pahiwatig na may kaibigang mantatraydor

ni Seigusmundo Del Mundo - @Panaginip, salamin ng inyong buhay | September 11, 2020

Salaminin natin ang panaginip ni Elsa na ipinadala sa Facebook Messenger.

Dear Professor,

Napanaginipan ko na kinagat ako ng aso. Hindi naman masakit, pero may marka ng kagat. Pumunta ako sa health center, tapos binakunahan ako ng anti-tetanus, at sabi roon, i-report ko sa kanila kung ano ang kondisyon ng aso. Ano ang kahulugan nito?

Naghihintay,

Elsa

Sa iyo, Elsa,

Ang nangyari sa iyong panaginip ay parehong-pareho ng nangyayari sa tunay na buhay kung saan dapat bantayan at i-report kung nagbabago ang kilos ng asong nakakagat.

‘Yung pagbabakuna ng anti-tetanus sa iyong panaginip ay ganundin sa tunay na buhay –ang mga nakagat ng aso ay bibigyan ng anti-tetanus shot.

Sa iyong panaginip, dapat obserbahan ng nakagat ng aso ang kanyang mga kaibigan at kakilala na nagsisilapit sa kanya dahil ang isa sa mga ito ay mapagkunwari na mabait, pero may masamang motibo pala.

Ang asong nangagat sa panaginip ay simbolo ng traydor na tao. Ito ay ang mga taong sisiraan ang kapwa at minsan ay gugulangan, iisahan at aagawan ng mahal sa buhay sa pamamagitan ng paninira sa nanaginip. Kaya ang payo ng iyong panaginip, palagi kang mag-ingat.

Hanggang sa muli,

Professor Seigusmundo del Mundo

Pahiwatig na magkadugtong ang buhay ng nanaginip at BFF

ni Seigusmundo Del Mundo - @Panaginip, salamin ng inyong buhay | September 10, 2020

Salaminin natin ang panaginip ni Corlyn na ipinadala sa Facebook Messenger.

Dear Professor,

Pumunta rito sa amin ang best friend ko, pero sa totoong buhay, nasa Cagayan De Oro siya ngayon. Sa panaginip, parang nandito talaga siya. Masaya kaming nagkukuwentuhan at nagluto pa kami ng spaghetti na pang-merienda. Dati na naming ginagawa ito sa amin o sa kanila kung napapasayal kami sa bahay ng isa’t isa.

Naghihintay,

Corlyn

Sa iyo, Corlyn,

Masasalamin na ikaw din ay napanaginipan ng best friend mo. Minsan, ang ganitong klase ng panaginip ay nagsasabing sabay, as in, the same time, ikaw at siya ay nananaginip.

Nangyayari lamang ang ganitong mahirap paniwalaang katotohanan sa mundo ng mga panaginip sa pagitan ng dalawang taong tunay na magkadugtong ang buhay.

Sa pagmamahalan, ito ay “twin hearts”, ang twin hearts ay hindi lang sa relasyon sa pagitan ng babae at lalaki kundi maging sa mga mag-best friend.

Para malaman mo kung totoo, makipag-ugnayan ka sa kanya gamit ang social media o text at tawag. Sasabihin niya sa iyo na gabi at araw, umaga at tanghali, ikaw ang laman ng kanyang isip.

Hanggang sa muli,

Professor Seigusmundo del Mundo