Cellphone ni Alex Gonzaga, na-snatch sa EDSA, snatcher huli

ni Ronalyn Seminiano Reonico | August 26, 2021

Inaresto ng awtoridad ang lalaking nang-snatch ng cellphone ng actress-vlogger na si Alex Gonzaga sa Makati City, ayon sa kanyang social media post ngayong Huwebes.

Ayon kay Alex, ang kasama niyang si Sofie ang may hawak ng cellphone niya nang mahablot ito ng snatcher.

Aniya, “Si Sofie po ang may hawak ng phone ko at mabagal ang takbo ng trapiko kaya nu’ng may pina-picture ako sa kanya, biglang nahablot agad ang cellphone ko habang hawak n’ya.”

Laking pasasalamat din ni Alex sa kanyang driver na si Arvi dahil hinabol nito ang snatcher at marami rin umanong mga motorista ang nakihabol.

Sey pa ng aktres, “Got my phone back after mahablot sa EDSA!!! Thank you so much sa Guadalupe Nuevo Police Sub-Station 7 for helping us.

“Grabe, taas dalawang kamay namin sa galing at bilis ng action n’yo mga sir.”

Nagpasalamat din naman si Alex sa asawa ng snatcher ng cellphone niya dahil aniya, “Subscriber daw pala sila!”

Higit 362K doses ng Pfizer, dumating na

ni Ronalyn Seminiano Reonico | August 26, 2021

Dumating na sa bansa ang 362,700 doses ng Pfizer COVID-19 vaccine noong Miyerkules.

Lumapag sa Ninoy Aquino International Airport (NAIA) Terminal 3 ang Air Hongkong flight LD456 lulan ang mga naturang bakuna.

Ayon sa National Task Force Against COVID-19, ang 50,310 doses ng Pfizer ay dumating sa Cebu City bandang alas-5 nang hapon at 50,310 doses din ang nakatakdang dalhin sa Davao City ngayong Huwebes.

Ang iba pang Pfizer vaccines ay dinala naman sa PharmaServ Express cold-chain storage facility sa Marikina City, ayon sa NTF.

Ayon naman kay Assistant Secretary Wilben Mayor, head ng National Task Force Against Covid-19 (NTF) sub-task force, ang mga bakuna ay dadalhin sa mga lugar na nakakapagtala ng pagtaas ng kaso ng Coronavirus.

Aniya pa, "Though meron na tayo ngayong tinatawag na from the spot, nagkakaroon agad ng inoculation. Dinadala na agad doon sa area and pagdating doon, ini-inject na kaagad.

"But, again, we leave it to the Vaccine Cluster to decide on whether to which particular area that they will distribute or allocate this Pfizer vaccine."

Storage area ng FDA sa Muntinlupa, nasunog

ni Ronalyn Seminiano Reonico | August 24, 2021

Nasunog ang bahagi ng storage area ng Food and Drug Administration (FDA) sa Muntinlupa City noong Lunes nang gabi.

Ayon sa Bureau of Fire Protection-Muntinlupa, itinaas ang unang alarma bandang alas-7:35 at idineklarang under control na bandang alas-7:55 nang gabi. Alas-8 naman nang ideklarang fire out na.

Wala naman umanong nasugatan o nasaktan sa insidente ngunit patuloy pa ring iniimbestigahan ng BFP Muntinlupa ang pinagmulan ng sunog.