Added haha una sa Tipsters ng 3-YO Race

ni Green Lantern @Renda at Latigo | Pebrero 2, 2024

Patok sa karera tipsters sa programa si Added Haha pagsalang nito sa 3-Year-Old & Above Maiden race na ilalarga ngayong araw sa Metro Turf, Malvar sa Tanauan City, Batangas.

Rerendahan ni reigning Philippine Sportswriters Association, (PSA) - Jockey of the Year awardee John Alvin Guce, makakalaban ni Added Haha ang anim na tigasing kabayo na kasali sa nasabing event.

Paglalabanan ang added prize na P22,000 para sa winning horse owner, ang ibang kasali ay sina Summerlin, Tanging Ikaw, Unconditional Love, Golden Jaraywa, Moment Like This at Road Safety.

May distansiyang 1,200 meter race sa event na suportado ng Philippine Racing Commission, (PHILRACOM) ni Chairman Reli de Leon.

Base sa komento ng mga karerista, posibleng maging hadlang kay Added Haha sa asam nitong panalo ay ang kalahok na Road Safety at Golden Jaraywa. Kukubrahin ng breeder ng nanalong kabayo ang P4,500 habang tig-P1,000 at P500 ang second at third ayon sa pagkakasunod.

Pakakawalan ang nasabing karera sa unang race sa alas-5 ng hapon, simula rin ito ng Pick 5.

Samantala, walong races ang inihain ng Metro Manila Turf Club Inc. (MMTCI) ngayong araw ng Biyernes kaya naman tiyak na masaya ang mga karerista sa kanilang paglilibang.

Mga Pili ni Green Lantern:

Race 1 - Added haha (1), Road Safety (7), Unconditional Love (4)

Race 2 - Black Star (5), American Dream (7), Artsev (3)

Race 3 - Queen Margaux (7), Maki Boi (1), Sunny Side (6)

Race 4 - Sun Dance (6), Eyeshot (5), Money For Biffany (2)

Race 5 - Work from Home (6), Magnolia Yana/Lucky Noh Noh (10/10A), Take A Chance (11)

Race 6 - Tell Bell (1), Streisand (10), Magandang Dilag (3), Runway ten (5)

Race 7 - Spoiled Brat (8), Kentucky Rain (6), Iris (5), Rhaegal (4)

Race 8 - Grand Monarch (10), La Republika (11), Noir (4), Go Gee Go (8)

Darleb Paparada at Kakasa 6 sa Japan Cup

ni Green Lantern @Renda at Latigo | Pebrero 1, 2024

Nakatakdang pumarada sa pista si Darleb laban upang kasahan ang anim na kabayong nagsaad ng pagsali sa 2024 PHILRACOM "Japan Cup"na ilalarga sa Metro Turf, Malvar sa Tanauan City, Batangas sa darating na Linggo.

Maliban kay Darleb ang ibang naghayag ng paglahok ay sina Bombay Nights, In The Zone, Kazachan, Pharoahs Treasure, Senshi Spirit at Speed Fantasy.

Magtutulungan naman sina In The Zone at Speed Fantasy upang harapin ang tikas ni Darleb at masungkit ang inaasam na titulo sa event na suportado ng Philippine Racing Commission, (PHILRACOM) ni Chairman Reli de Leon. May nakalaan ang P1-M guaranteed prize na ikakalat sa unang apat na kabayong tatawid sa meta sa distansiyang 1,800 meter race.

Susungkitin ng mananalong kabayo ang P600,000, mapupunta sa second placer ang P225,000 habang tig- P125,000 at P50,000 ang third at fourth ayon sa pagkakasunod.

Base sa komento ng karerista sa social media, posibleng magpakitang-gilas ang matulin sa largahan na si Senshi Spirit na sasakyan ni former Philippine Sportswriters Association, (PSA) - Jockey of the Year awardee Patricio Ramos Dilema.

Rerendahan ni jockey NC Lunar si Darleb, tiyak na naghahanda na ang mga ito para maging kondisyon sa araw ng karera. May regular races din ang pakakawalan ng Metro Manila Turf Club Inc. (MMTCI) kaya tiyak na masisiyahan ang mga naglilibang na karerista sa araw ng Linggo.

Samantala, malalaman bukas kung sinu-sino ang opisyal na lineup sa nabanggit na event.

Gameir Winner wagi sa 3-YO Turf

ni Green Lantern @Renda at Latigo | Enero 30, 2024

Makapigil-hiningang bakbakan ang napanood ng mga karerista matapos manalo ni Gameir Winner sa 3-Year-old Maiden na nilarga noong Linggo sa Metro turf, Malvar sa Tanauan City, Batangas.

Nagmasid sa segundo puwesto si Gameir Winner, humarurot ang matulin sa largahan na si Feet Bell para hawakan ang bandera, habang nasa tersero-puwesto si Sunshine Jeune.

Mabilis ang pacing ni Feet Bell dahil tinutukan siya ni Gameir Winner kaya naman hindi sila nadikitan ng kanilang mga katunggali sa kalagitnaan ng karera at lalo pang lumayo.

Mas uminit ang aksyon sa unahan, bakbakang umaatikabo ang Feet Bell at Gameir Winner pagpasok ng huling kurbada kung saan ay lamang pa ng isang kabayo ang una.

Naglabas ng latigo si Mark Angelo Alvarez upang hatawin ang sinasakyan nitong Feet Bell sa rektahan.

Hindi naman nagpadaig si former Philippine Sportswriters Association, (PSA) - Jockey of the Year awardee Jonathan Basco Hernandez, pinitik din nito ng latigo ang Gameir Winner kaya naman bigla itong umigkas upang ungusan si Feet Bell at tawirin ang meta ng may isang kabayo ang agwat.

Inilista ng Gameir Winner ang tiyempong 1:28.2 minuto sa 1,400 meter race sapat upang sikwatin ang P22,000 added prize sa event na suportado ng Philippine Racing Commission, (PHILRACOM) ni Chairman Reli de Leon.

Segundo ang Feet Bell, tersero ang American Ford habang pang-apat ang Sunshine Jeune.

Naibulsa ng breeder ng winning horse owner ang P4,500 habang tig-P1,000 at P500 ang second at third ayon sa pagkakasunod.