Serbisyo publiko raw, pero kaban ng bayan ang nilimas—DPWH, singilin na!

ni Pablo Hernandez @Prangkahan | December 30, 2025

HINDI LANG P150M INSERTION NG BICOL SARO ANG DAPAT PAIMBESTIGAHAN NI CONG. LEANDRO LEVISTE, KUNDI PATI ANG P1B INSERTION NG MOMMY NIYANG SI SEN. LOREN LEGARDA – Hindi patas ang trato ni Batangas 1st District Rep. Leandro Leviste sa mga mambabatas na iniuugnay niya sa umano’y mga insertions o pagsisingit ng pondo para sa mga proyekto sa 2025 national budget.

Mistulang “ngawngaw” na lang kaysa “ngangaw” ang mga pahayag ni Cong. Leviste kaugnay sa alegasyon niyang may P150 milyong insertion umano ang Bicol Saro Party-list sa 2025 national budget. Dahil dito, hiniling pa niya na imbestigahan ng Kamara ang nasabing isyu at nanawagan pa ng pagpapatalsik kay Cong. Terry Ridon bilang chairperson ng House Public Accounts Committee. Si Cong. Ridon ay kinatawan ng Bicol Saro Party-list.

Gayunman, kapansin-pansin na ang matitinding batikos na ibinabato niya laban kay Cong. Ridon at sa Bicol Saro Party-list ay hindi niya ginagawa sa sarili niyang ina na si Sen. Loren Legarda, na inuugnay naman sa mas malaking insertion na umaabot umano sa P1 bilyon.

Kung tunay na hangarin ni Cong. Leviste ang panagutin ang lahat ng mambabatas na may insertions sa 2025 national budget, hindi dapat tumigil ang kanyang panawagan sa P150 milyong proyekto ng Bicol Saro Party-list. Nararapat din niyang ipanawagan ang imbestigasyon sa P1 bilyong insertion na iniuugnay sa kanyang inang senadora, at igiit din sa Senado ang kaukulang pananagutan—kabilang na ang panawagang tanggalin ito sa kinauukulang komite. Period!

XXX

SA FLOOD CONTROL SCANDAL AT IBA PANG KATIWALIAN SA DPWH, DAPAT LAHAT NG USEC. AT ASEC. NG DEPARTAMENTONG ITO, IMBESTIGAHAN AT ISAILALIM SA LIFESTYLE CHECK – Sa mga dating high-ranking officials ng Department of Public Works and Highways (DPWH), tanging sina former Secretary Manuel Bonoan, former DPWH Undersecretary for Operations Roberto Bernardo, ang yumaong former DPWH Undersecretary for Planning Ma. Catalina Cabral, at ilang DPWH district officials pa lamang ang nabulgar na umano’y dawit sa flood control scandal.

Ang nais nating ipunto: hindi dapat doon nagtatapos ang imbestigasyon. Dapat ding isailalim sa masusing imbestigasyon at lifestyle check ang lahat ng mga nanungkulan bilang undersecretary at assistant secretary ng DPWH mula 2016 hanggang 2025. Imposibleng wala silang nalalaman sa malawakang nakawan sa kaban ng bayan na naganap sa loob ng departamentong ito. Boom!

XXX

KUNG NAIS NI PBBM UMANGAT ANG RATING NIYA SA SURVEY, UTUSAN NIYA ANG ICI NA ISAPUBLIKO IMBESTIGASYON SA FLOOD CONTROL SCANDAL AT IPAKULONG SA YEAR 2026 MGA CORRUPT NA POLITICIANS – Isa sa mga idinadahilan ng mga political analyst kung bakit malaki ang ibinagsak ng survey rating ni Pangulong Ferdinand “Bongbong” Marcos Jr. (PBBM) ay dalawang bagay: una, ang pagsasagawa ng closed-door hearings ng itinatag niyang Independent Commission for Infrastructure (ICI); at ikalawa, mula nang ibinulgar ng Pangulo ang flood control scandal ay wala pa ni isang kurakot na pulitikong naipakukulong na sangkot sa naturang scam.

Kung nais ni PBBM na muling umangat ang kanyang survey rating sa susunod na taon, malinaw ang dapat niyang gawin: atasan ang ICI na isapubliko ang resulta ng imbestigasyon sa mga sangkot sa flood control scandal at tiyaking makukulong ang mga tiwaling pulitikong nanloko at nagnakaw sa kaban ng bayan. Period!

XXX

BUTI HINDI PINATULAN NG MARCOS ADMIN ANG 'HAOSHAO WHISTLE BLOWER' NA SI RAMIL MADRIAGA – Buti na lamang at hindi pinatulan ng Marcos administration ang pagpapanggap na isang “whistle-blower” ng presong kidnaper na si Ramil Madriaga, na nagparatang na madalas daw siyang binibisita sa kulungan ni Vice President Sara Duterte-Carpio. Inangkin pa ni Madriaga na siya raw ay naging bagman umano ng Bise Presidente sa mga Chinese drug lords at sa operasyon ng Philippine Offshore Gaming Operator (POGO).

Kung sakaling pinatulan ito ng administrasyong Marcos at ginawang testigo si Madriaga laban kay VP Sara, tiyak na magmumukhang kahiya-hiya sa mata ng publiko ang gobyerno. Lalabas na kumapit ito sa isang hao-shao o pekeng whistle-blower, sapagkat mismong si Department of the Interior and Local Government (DILG) Secretary Jonvic Remulla ang naglinaw na hindi si Madriaga ang binibisita ni VP Sara sa kulungan, kundi si former Negros Oriental Rep. Arnolfo “Arnie” Teves Jr., na nakakulong kaugnay ng mga kasong murder. Boom!

Eric Yap, sangkatutak daw ang yaman, dapat habulin ng Marcos admin!

ni Pablo Hernandez @Prangkahan | December 29, 2025

SA HAWAK NI CONG LEVISTE NA 'CABRAL FILES' KUWESTIYONABLE KASI PATI NAMATAY NA NOONG YEAR 2022, NAKAPAG-INSERT PA  RAW SA 2025 NATIONAL BUDGET – May sablay na naman sa ibinibida ni Batangas 1st Dist. Rep. Leandro Leviste na "Cabral Files"—mga dokumento ni yumaong former DPWH Usec. Ma. Catalina Cabral—patungkol sa mga kongresistang may insertions o singit na pondong pang-projects sa National Expenditures Program (NEP). Kasama raw dito ang pangalan ni Camarines 2nd Dist. Rep. Marisol "Toots" Panotes, na sinasabing nagsingit ng higit P6 billion na proyekto sa 2025 national budget, gayong yumao na siya noong April 29, 2022.

Mantakin ninyo: ang congresswoman na namatay pa noong 2022 ay pinalalabas ngayon sa "Cabral Files" ni Cong. Leviste na nakapag-insert pa ng P6-B sa 2025 national budget.

Dahil dito, lumalabas na gawa-gawa lang ni Cong. Leviste ang hawak niyang "Cabral Files." At kung sakali mang totoo ang dokumentong iyon, walang dudang "dinoktor" niya ito—dahil napakaimposible na ang isang taong matagal nang patay ay makapag-insert pa ng proyekto sa 2025 national budget. Boom!

XXX

SANGKATUTAK NA HIDDEN WEALTH NI CONG. ERIC YAP, DAPAT HABULIN NG MARCOS ADMIN – Sa interview kay Baguio City Mayor Benjamin Magalong, sinabi niya na bukod sa Ion Hotel, marami pang ari-arian si Benguet Rep., dating ACT-CIS partylist Rep. Eric Yap, sa lungsod na hindi nakapangalan sa kongresista.

Si Cong. Eric Yap ay isa sa mga lawmakers na nasasangkot sa katiwalian sa flood control scandal. Sa katunayan, ipina-freeze na ng Anti-Money Laundering Council (AMLC) ang mga bank accounts, air assets, at ibang ari-arian ng kongresista. Ngunit kung totoo ang sinabi ni Mayor Magalong, lumalabas na hindi pala lahat ng yaman ni Cong. Yap ay na-freeze, dahil marami pa raw ang hidden wealth nito na hindi nakapangalan sa kanya.

Dapat makipag-ugnayan agad ang Marcos administration kay Mayor Magalong upang pati ang mga hidden wealth ni Cong. Eric Yap ay ma-freeze at mabawi ng gobyerno. Period!

XXX

KAPAG WALANG NAKULONG NA CORRUPT POLITICIANS NA SANGKOT SA FLOOD CONTROL SCANDAL, 'WA WENTA' ANG KAMPANYA NI PBBM KONTRA-KORUPSIYON – Ayon kay Presidential Communications Office (PCO) Sec. Dave Gomez, sa susunod na taon o 2026, marami na raw sa mga sangkot sa flood control scandal ang makakasuhan at makukulong.

Sa kasalukuyan, ang mga nakakulong pa lang sa kasong malversation of public funds, bribery, at graft ay ang kontratistang si Sarah Discaya, ang pamangkin niyang si Roma Angeline Rimando, at ilang DPWH engineers.

Ngunit kung sa susunod na taon ay kontratista at mga DPWH engineers lamang ang maidadagdag na maipapakulong ng Marcos administration, at walang kahit isang kurakot na politiko na mapaparusahan, isa lang ang ibig sabihin nito: “wa wenta” ang kampanya ni PBBM kontra-korupsiyon. Boom!

XXX

KAYA NAG-RESIGN SINA ENGR. SINGSON AT CPA FAJARDO KASI ICI, WALA RAW POWER, KAPOS SA PONDO AT NASISIRA PA PAGKATAO NILA SA CLOSED-DOOR HEARING – Matapos mag-resign si Engr. Rogelio Singson bilang commissioner ng Independent Commission for Infrastructure (ICI), nag-resign na rin bilang komisyoner si CPA Rossana Fajardo.

Hindi naman masisisi sina Singson at Fajardo sa kanilang pag-alis sa ICI, dahil bukod sa limitado ang kanilang kapangyarihan at kulang sa pondo, kabilang pa sila sa mga nababatikos ng publiko dahil sa ipinairal ni ICI Chairman, dating Justice Andres Reyes, na closed-door investigation sa mga sangkot sa flood control scandal. Boom!

Pinalabas noon ni Cong. Leviste ang bad insertions ng mga cong., pero nang madawit ang mommy niyang si Sen. Loren, ‘di raw bad insertions

ni Pablo Hernandez @Prangkahan | December 28, 2025

SEN. CHIZ ESCUDERO KAHIT INABSUWELTO NA NG COMELEC, HINDI PA RIN SAFE SA PANANAGUTAN SA PAGLABAG SA OMNIBUS ELECTION CODE – KAHIT na inabsuwelto ng Commission on Elections (Comelec) si Senador at dating Senate President Chiz Escudero sa paglabag sa Omnibus Election Code kaugnay ng pagtanggap umano niya ng P30 milyong campaign fund mula sa kontraktor na si Lawrence Lubiano, hindi pa rin pala tapos ang usapin.

Humirit si Teacher Barry Tayam sa Korte Suprema (Supreme Court) na baligtarin ang desisyon ng Comelec na nagpapawalang-sala kay Escudero. Ayon kay Tayam, dapat managot ang senador dahil malinaw umanong nilabag nito ang batas.

Giit niya, tahasang nakasaad sa Omnibus Election Code na ipinagbabawal sa mga kandidato ang tumanggap ng campaign fund mula sa mga kontraktor. Aniya, malinaw ang probisyon ng batas—bawal, period!

XXX

KUNG MAKABANAT SI CONG. LEVISTE TALAGANG PARA SA KANYA ANG BAD INSERTIONS NG MGA CONG. PERO NANG MADAWIT MOMMY NIYANG SI SEN. LOREN, ‘DI DAW BAD INSERTIONS – Noong una, pilit na itinatanim ni Batangas 1st District Rep. Leandro Leviste sa isipan ng publiko na masama o “bad” ang insertions sa national budget. Malinaw na layunin nitong siraan ang kanyang mga kapwa kongresista nang i-post pa niya sa kanyang social media account ang mga pangalan ng mga mambabatas na umano’y nagsingit ng pondo sa 2025 national budget para sa kani-kanilang mga proyekto sa distrito.

Ngunit ito na ang siste: nang mabunyag na ang kanyang inang si Sen. Loren Legarda ay mayroon ding insertion na nagkakahalaga ng P1 bilyon sa 2025 national budget, biglang nag-iba ang ihip ng hangin. Todo-pagtatanggol na ngayon si Cong. Leviste, iginiit na hindi naman daw dapat ituring na masama ang insertion kung ang pondong isinama ay tunay namang napunta sa mga proyekto. Boom!

XXX

MGA NAGPAPANGGAP NA 'LINGKOD-BAYAN' KASI HINDI LANG SA FLOOD CONTROL RUMAKET, KUNDI PATI SA NEP PROJECTS – Bukod sa tinaguriang “Cabral Files” na ibinahagi ni Cong. Leviste sa social media—na naglalaman umano ng mga pangalan ng mga kongresistang nag-insert ng pondo para sa iba’t ibang proyekto—may ibinulgar din ang Bilyonaryo News Channel (BNC) at Politiko.com.ph na tinawag na “DPWH leaks.”

Ayon sa mga ulat na ito, may mga mambabatas na may proyektong nagkakahalaga mula daan-daang milyong piso hanggang bilyon-bilyong piso na nakapaloob sa proposed 2025 national budget ng Pangulo (PBBM). Kabilang umano rito ang ilang senador at dating senador na inuugnay sa pag-insert ng mga proyekto sa national budget at sa pagtanggap ng kickback kaugnay ng flood control projects scam mula taong 2016 hanggang 2025.

Mantakin n’yo, ang mga senador at dating senador na ito ay nasangkot na umano sa kickback sa flood control scandal, ngunit nabunyag pa na mayroon pa rin silang mga pondong pang-proyekto sa 2025 National Expenditure Program (NEP). Ipinahihiwatig nito kung gaano kalala ang umano’y kasakiman sa pera ng bayan ng mga nagpapanggap na “lingkod-bayan.” Mga pwe!

XXX

DAHIL WALA NAMANG CORRUPT POLITICIANS NA NAG-PASKO SA KULUNGAN, PARA MAKABAWI SI PBBM, MGA KURAKOT NA PULITIKO DAPAT MAKULONG BAGO MAG-NEW YEAR – Upang makabawi si Pangulong Ferdinand “Bongbong” Marcos Jr. (PBBM) sa kanyang sablay na pahayag na may mga kurakot na pulitikong sangkot sa flood control scandal na umano’y magpa-Pasko sa kulungan—gayung wala namang naipakulong—nararapat na magsikap ang Marcos administration na may mapanagot at maikulong na mga tiwaling opisyal bago sumapit ang taong 2026.

Kung magagawa ng administrasyon na may mga kurakot na pulitiko na sasalubong ng Bagong Taon sa loob ng kulungan, saka lamang masasabi na nakabawi si PBBM sa kanyang napaagang anunsyo tungkol sa mga umano’y corrupt na opisyal. Period!