Mga Kamag-anak Inc., mga trapo at mga cong-tractor ibasura sa 2028 election

ni Pablo Hernandez @Prangkahan | January 11, 2026

MALAMANG NA MAITATALA ANG ‘PINAS NA PINAKA-KORUP NA BANSA SA MUNDO KUNG HINDI MAPIPIGILAN ANG TALAMAK NA KATIWALIAN – Ayon sa isinapublikong survey ng Pulse Asia, 94% ng mga Pilipino ang nagsabing masyadong talamak na ang korupsiyon sa gobyerno.

Kung hindi mapipigilan ang ganitong talamak na katiwalian sa bansa, hindi na nakapagtataka kung dumating ang panahon na maitala ang Pilipinas sa Guinness World Records bilang pinaka-korup na bansa sa buong mundo. Boom!

XXX

GOBYERNO ANG 'BIGGEST CRIMINAL SYNDICATE' SA ‘PINAS? – Hindi na nakapagtataka na 94% ng mga Pilipino ang naniniwalang malala na ang katiwalian sa pamahalaan. Halos lahat ng nagpapakilalang “lingkod-bayan” ay nasasangkot sa iba't ibang anomalya. May ilan pa nga na nagsasabing korup ang presidente, ang bise presidente, ilang senador at kongresista, ilang miyembro ng Cabinet, at iba pang opisyal ng gobyerno — mula sa local governments at barangay officials hanggang sa ilan sa mga mahistrado at hurado ng korte sa bansa.

Sa totoo lang, sa dami ng mga korap sa ehekutibo, lehislatura, at hudikatura, maituturing na ang gobyerno ang “biggest criminal syndicate” sa Pilipinas, na nambibiktima sa mga Pilipinong taxpayers. Tsk!

XXX

MGA KAMAG-ANAK INC., MGA TRAPO AT MGA CONG-TRACTOR IBASURA SA 2028 ELECTION – Nasaksihan ng publiko sa mga nakaraang imbestigasyon hinggil sa flood control scandal na ang mga sangkot sa pang-i-scam sa kaban ng bayan ay mga nagpapanggap na “lingkod-bayan”: magkakamag-anak na pulitiko o political dynasty, mga trapo, at mga cong-tractor o kongresistang kontraktor.

Kabilang ang mga ito sa mga dahilan kung bakit marami sa ating mga kababayan ang nananatiling mahirap, dahil ang pondo ng bayan na dapat nakalaan para sa serbisyo sa mamamayan ay ini-scam ng mga “Kamag-anak Inc.”, mga trapo, at cong-tractor.

Kaya sana, matuto na ang mga botante: busisiin ang pagkatao at track record ng mga kandidato sa 2028 elections, at ibasura sa halalan ang mga “Kamag-anak Inc.”, mga trapo, at cong-tractor. Period!

XXX

MAY PAG-ASA PA ANG ‘PINAS KUNG ANG ILULUKLOK AY WALANG BAHID NG KORUPSIYON AT GOOD GOVERNANCE ANG ISUSULONG – Hindi naman lahat ng pulitiko at opisyal ng gobyerno ay korup; mayroon ding mga matitino na isinusulong ang good governance.

Ang nais nating ipunto rito ay may pag-asa pa ang Pilipinas—kung hindi man tuluyang mawala, ay maibsan man lang ang korupsiyon sa bansa. At makakamtan ito kung matututo ang mga botante sa tamang pagboto. Sa 2028 elections, lalo na sa presidential election, mahalagang iluklok ang mga pulitikong walang bahid ng korupsiyon at tunay na magsusulong ng good governance. Period!

Cabinet members ni PBBM, pasado sa kapalpakan

ni Pablo Hernandez @Prangkahan | January 10, 2026

CONG. LEVISTE, SINUPALPAL NI OMBUDSMAN REMULLA KASI PANAY PABIDA AT PASIKAT LANG PERO AYAW NAMAN KASUHAN ANG MGA LAWMAKERS NA NASA 'CABRAL FILES' – Sinupalpal ni Ombudsman Boying Remulla si Batangas 1st District Rep. Leandro Leviste kaugnay ng tinatawag nitong “Cabral Files,” o mga dokumento na umano’y nagmula sa yumaong DPWH for Planning Usec. Ma. Catalina Cabral. Ayon kay Remulla, panay ang pagpapasikat ni Leviste sa social media at sa mga panayam sa mainstream media, ngunit hindi naman ito humaharap sa Office of the Ombudsman upang pormal na ireklamo ang mga mambabatas na inaakusahan niyang may project insertions sa DPWH na nakapaloob sa 2025 national budget.

May punto si Ombudsman Remulla sa kanyang pagsupalpal kay Cong. Leviste. Kung tunay na may ebidensya ng katiwalian ang mga dokumentong hawak nito, nararapat lamang na ihain ang mga reklamo sa tamang institusyon. Sa halip, tila ginagamit lamang ang “Cabral Files” para magpasikat at magparatang sa publiko, nang walang lakas ng loob na dumaan sa pormal at legal na proseso. Period!

XXX

P33B BUDGET SA FARM-TO-MARKET ROAD, DAPAT I–VETO NI PBBM, KASI ANG PONDONG INILALAGAY D’YAN AY KINUKURAKOT LANG – Dapat ding vineto ni Pangulong Ferdinand “Bongbong” Marcos Jr. (PBBM) ang P33 bilyong pondo para sa mga “Farm-to-Market Road” na inaprubahan ng Senado at Kamara at isinama sa 2026 national budget.

Batay sa imbestigasyon ng Senate Blue Ribbon Committee, hindi lamang pondo para sa flood control projects ang ginawang gatasan ng mga tiwaling pulitiko, opisyal ng DPWH, at mga kontratista, kundi pati na rin ang pondo para sa “Farm-to-Market Road.” Sa kabila nito, hindi ito vineto ni PBBM at sa halip ay isinama pa sa mga proyektong kanyang nilagdaan at inaprubahan sa 2026 national budget. Tsk!

XXX

NAGSINUNGALING DAW SI CONG. PULONG DUTERTE NANG SABIHING WALANG SUBSTANDARD AT INCOMPLETE FLOOD CONTROL PROJECTS SA DAVAO CITY, KASI MISMONG NBI ANG NAGSABING MERON – Nadiskubre ng National Bureau of Investigation (NBI) ang pagkakaroon ng mga substandard at incomplete na flood control projects sa Davao City. Dahil dito, inihahanda na ng ahensya ang pagsasampa ng kaso laban sa ilang tiwaling opisyal ng DPWH sa lungsod.

Ibig sabihin, mali ang naging pahayag ni Davao City Rep. Paolo Duterte na wala umanong substandard at incomplete na flood control projects sa kanilang lugar. Mismong NBI na ang nagsabing may mga depektibong proyekto—kaya malinaw kung sino ang nagsasabi ng totoo. Period!

XXX

PBBM, 'HAPPY' SA PALPAK NA SERBISYO SA TAUMBAYAN NG KANYANG MGA CABINET MEMBERS? – Pinabulaanan ni Presidential Communications Office (PCO) spokesperson Usec. Claire Castro ang kumakalat sa social media na magsasagawa umano si Pangulong Ferdinand “Bongbong” Marcos Jr. (PBBM) ng balasahan sa mga miyembro ng kanyang Gabinete.

Sa totoo lang, marami sa mga Cabinet members ni PBBM ang pumapalpak sa pagbibigay-serbisyo sa mamamayan. Kung totoo ngang walang magaganap na balasahan, gaya ng pahayag ni Usec. Castro, lumalabas na kuntento ang Pangulo sa kapalpakan ng ilang miyembro ng kanyang Gabinete. Boom!

'Pork free' 2026 national budget, pang-uunggoy lang dahil ang P151B unprogrammed funds, pork barrel ‘yan!

ni Pablo Hernandez @Prangkahan | January 9, 2026

MANONG CHAVIT, PEKENG ANTI-CORRUPT DAW KASI GUSTO NIYANG MAGING STATE WITNESS ANG MGA KURAKOT NA SINA ZALDY CO AT SARAH DISCAYA – Panay ang atake ni dating Gobernador ng Ilocos Sur na si Chavit Singson sa talamak daw na korupsiyon sa administrasyon ng Marcos. Sa kanyang press conference noong Enero 5, 2026, sinabi niya na dapat gawing state witness ng Department of Justice (DOJ) laban sa mga sangkot sa flood control scandal sina dating Ako Bicol partylist Rep. Zaldy Co at kontraktor na si Sarah Discaya.

Dahil sa kanyang pahayag, na-bash si Manong Chavit sa social media. Marami ang nagsabing pekeng anti-corrupt siya dahil ang gusto niyang maging state witness ay sina Zaldy Co at Sarah Discaya, na parehong nasangkot sa kurapsiyon at nag-scam ng bilyon-bilyong piso mula sa kaban ng bayan. Period!

XXX

PORK BARREL ANG P151B UNPROGRAMMED FUNDS, KASI PANG-UUNGGOY LANG SA PUBLIKO ANG SINABI NG MALACAÑANG, SENADO AT KAMARA NA 'PORK FREE' ANG 2026 NATIONAL BUDGET – Maituturing na pang-uunggoy sa publiko ang ipinapakita ng Malacañang, Senado, at Kamara na "pork barrel free" raw ang 2026 national budget.

Kung vineto ni Pangulong Ferdinand “Bongbong” Marcos Jr. (PBBM) ang P243 billion na unprogrammed funds, saka puwede ngang sabihing "pork barrel free" ang badyet ngayong taon. Ngunit dahil P92.5B lang ang vineto ng presidente at itinira ang higit P151B, kalokohan ang sinasabi nilang walang "pork" ang pambansang badyet ngayong 2026.

Sa imbestigasyon ng Senate Blue Ribbon at House Infra Committee noong 2025, lumitaw na may bahagi ng pera ng bayan na nakapaloob sa unprogrammed funds ang napunta sa mga ghost, substandard, at unfinished flood control projects. Ibig sabihin, ang kaban ng bayan sa unprogrammed funds ay ginagawang pork barrel projects ng mga buwayang pulitiko at government officials. Boom!

XXX

SANA IDEKLARA NG SC NA UNCONSTITUTIONAL ANG P151B UNPROGRAMMED FUNDS, PARA HINDI ITO PAGPIYESTAHANG KURAKUTIN NG MGA BUWAYA SA PAMAHALAAN – Hinirit nina Caloocan City 2nd District Rep. Edgar Erice at ML Partylist Rep. Leila de Lima sa Supreme Court (SC) na ideklarang unconstitutional ang nalalabing higit P151 billion na unprogrammed funds sa 2026 national budget.

Tigas ng ulo ni PBBM dahil maraming sektor ang nananawagan sa kanya na i-veto ang P243B unprogrammed funds, ngunit P92.5B lamang ang vineto niya. Kaya’t ang nalalabing P151B ay napunta pa sa Supreme Court.

Sana katigan ng SC ang petisyon nina Cong. Erice at Cong. De Lima upang hindi na pagpiyestahang kurakutin ng mga “buwaya” sa pamahalaan ang P151B unprogrammed funds. Period!

XXX

UTANG NG ‘PINAS HINDI NABABAWASAN, SA HALIP, PATULOY NA TUMATAAS – Mula sa naitalang utang na P17.56 trillion ng Pilipinas noong October 2025, pumalo na ngayon sa P17.65 trillion ang utang ng bansa sa mga financial institutions sa buong mundo.

Palubog nang palubog sa utang ang ‘Pinas sa ilalim ng Marcos administration dahil hindi nababawasan ang utang, at sa halip, patuloy pang tumataas. Tsk!