Kahulugan ng malagong damo

ni Estrellia de Luna @Panaginip gabay ng buhay | November 21, 2023

Analisahin natin ang panaginip na ipinadala ni Ronald ng Taguig.

Dear Maestra,

Napanaginipan ko na pumunta ako sa likod ng aming bahay. Ang haba na ng damo kaya kumuha ako ng pamputol dito. Pagbalik ko, may nakita akong mga usa at kambing na kumakain ng damo. Gayunman, itinuloy ko pa rin ang pagtabas nito.

Ano ang ibig sabihin ng panaginip ko?

Naghihintay,

Ronald

Sa iyo, Ronald,

Ang ibig sabihin ng panaginip mo na ang haba ng damo sa likod ng iyong bahay, kumuha ka ng pamputol, at tinabas mo ang damo ay susuwertehin ka sa negosyo. Mas mahabang damo, mas marami kang kikitain sa negosyo.

Samantala, ang usa ay nangangahulugan na isa sa mga kaibigan mo ay loko-loko. May binabalak siyang hindi maganda laban sa iyo, kaya talasan mo ang iyong pakiramdam at mag-ingat ka. Ang mga kambing naman ay halos pareho rin ng kahulugan, may binabalak silang hindi maganda laban sa iyo, pero hindi sila magtatagumpay kung lagi kang nakamasid at nakahanda sa anumang puwedeng mangyari.

Matapat na sumasaiyo,

Maestra Estrellia de Luna

Kahulugan ng softdrinks

ni Estrellia de Luna @Panaginip gabay ng buhay | November 20, 2023

Analisahin natin ang panaginip na ipinadala ni Ramon ng Roxas City.

Dear Maestra,

Napanaginipan ko na kumain ako ng tinapay nang may nakita akong isang bote ng soft drink sa mesa. May bawas na ito pero ininom ko pa rin. Hindi ako nasiyahan dahil kaunti lang aking nainom. Binuksan ko ang refrigerator, at mabuti na lang ay meron pa ru’ng hindi pa nababawasan.

Ano ang ibig sabihin ng panaginip ko?

Naghihintay,

Ramon

Sa iyo, Ramon,

Ang ibig sabihin ng panaginip mo na kumakain ka ng tinapay ay malalampasan mo ang matinding suliraning dinaranas mo sa ngayon na kung saan pati pamilya mo ay nadadamay na.

Ang may nakita kang soft drink sa mesa pero bawas na, ito ay paalala na mag-ingat ka sa iyong mga kilos at pananalita. May babala na masasangkot ka sa gulo na maghahatid sa iyo upang makagawa ka ng karahasan sa iyong kapwa.

Samantala, ang hindi ka nasiyahan dahil kaunti lang ang soft drink na ininom mo, binuksan mo ang refrigerator at nakakita ka ng wala pang bawas ay nangangahulugan na may nakalaan sa iyong kaligayahan at pagpapala kung patuloy kang magiging matiyaga.

Matapat na sumasaiyo,

Maestra Estrellia de Luna

Sign na habambuhay ng magiging single mom

ni Estrellia de Luna @Panaginip gabay ng buhay | November 19, 2023

Analisahin natin ang panaginip na ipinadala ni Gemma ng Albay.

Dear Maestra,

Napanaginipan ko na umiiyak ang baby ko. Magtitimpla sana ako ng gatas pero ubos na pala ito. Sumakay ako sa kotse para lumabas at bumili ng gatas. Pagdating ko sa tindahan, may nakilala akong binata, at nagkagusto umano ito sa akin. Nag-usap kami sandali at umuwi rin agad ako. Pinainom ko agad ang baby ko, tumigil na siya sa pag-iyak at tumawa na nang tumawa.

Ano ang ibig sabihin ng panaginip ko?

Naghihintay,

Gemma

Sa iyo, Gemma,

Ang panaginip mo na umiyak ang baby mo, magtitimpla ka sana ng gatas pero ubos na, ito ay nagpapahiwatig na may paparating na kalungkutan sa buhay mo at madadagdag pa ang mga problema mo sa kasalukuyan. Ang sumakay ka sa kotse para bumili ng gatas ay nagpapahiwatig na maaari kang makaranas ng matitinding pagsubok at paghihirap sa buhay. Magiging mailap ang pera sa iyo at kakapusin ka lagi sa budget.

Ang tumigil sa pag-iyak ang baby mo dahil binigyan mo na siya ng gatas, tumawa siya nang tumawa ay nangangahulugang marami kang tapat at maaasahang kaibigan na handang dumamay sa iyo. Samantala, ang may nakilala kang binata, nagkagusto siya sa iyo at nag-usap kayo ay senyales na may posibilidad na maging solo parent ka habambuhay.

Matapat na sumasaiyo,

Maestra Estrellia de Luna