Tanda na mauuwi sa kasalan ang pag-iibigan

ni Estrellia de Luna @Panaginip gabay ng buhay | Ika-27 Araw ng Abril, 2024

Analisahin natin ang panaginip na ipinadala ni Remy ng Batangas.

Dear Maestra,

Napanaginipan ko na sinama ako ng boyfriend ko sa farm nila. Namitas kami ng mulberries at pagkatapos ay dinala niya ko sa taniman nila ng cultured mushrooms, at kumuha kami ng mushroom upang lutuin. Pagdating sa bahay nila, agad siyang nagpatugtog ng love song.

Ano ang ibig sabihin ng panaginip ko?

Naghihintay,

Remy

Sa iyo, Remy,

Ang panaginip mo na nagpunta kayo sa farm ng boyfriend mo, namitas kayo ng mulberries, ito senyales ng kayamanan at karangalan. Ito rin ay pahiwatig na mauuwi kasalan ang inyong pag-iibigan. 

Ang mushroom ay nagpapahiwatig na yayaman kayo ng boyfriend mo, pero hindi agad-agad. Bagkus, unti-unting uunlad ang kabuhayan n’yo dahil sa sarili n’yong pagsisikap hanggang sa tuluyan na kayong yumaman.

Samantala, nagpatugtog ng music ang boyfriend ay sign ng maligayang buhay sa piling ng inyong magiging pamilya. Ito rin ay nangangahulugan na mababait, maaalalahanin at maaasahan ang mga kaibigan n’yo at handa nila kayong damayan  sa kagipitan.

Matapat na sumasaiyo,

Maestra Estrellia de Luna

Pahiwatig na sa ex-BF pa rin ang bagsak

ni Estrellia de Luna @Panaginip gabay ng buhay | Ika-27 Araw ng Abril, 2024

lisahin natin ang panaginip na ipinadala ni Carol ng Bulacan.

Dear Maestra,

Napanaginipan ko ‘yung ex ko. Handa niya umano akong pakasalan, nakangiti siya at may dalang kuwintas na may palawit na perlas. Agad niya rin itong sinuot sa akin.

Ano ang ibig sabihin ng panaginip ko?

Naghihintay,

Carol

Sa iyo, Carol,

Ang ibig sabihin ng panaginip mo na handa kang pakasalan ng ex mo, nakangiti siya sa iyo ay mahal ka pa rin niya hanggang ngayon. Totoo ang pag-ibig niya, at wala itong halong pagkukunwari. Tapat siyang magmahal at mabuting asawa.

Ang sinuot niya ang kuwintas sa iyo ay nangangahulugan na ang ex mo na nga ang iyong makakatuluyan. Hindi na siya magpapatumpik-tumpik pa. Sisiguraduhin niya na hindi ka mapupunta sa ibang lalaki, at kayo na ang magsasama habambuhay. Ito rin ay nangangahulugan na magiging stable at matatag ang kanyang kalagayan. Ibig sabihin, kayang-kaya niyang magkaroon ng sariling pamilya.

Samantala, ang palawit na perlas ay nangangahulugan ng kaligayahan, karangalan at kayamanan. Liligaya ka sa piling ng dati mong dyowa. Pagpapalain at yayaman din kayo. 

Matapat na sumasaiyo,

Maestra Estrellia de Luna

Kahulugan ng nangati ang baywang at napatid na garter

ni Estrellia de Luna @Panaginip gabay ng buhay | Ika-26 Araw ng Abril, 2024

Analisahin natin ang panaginip na ipinadala ni Jorge ng Antique.

Dear Maestra,

Napanaginipan ko na nakahiga ako sa kama. Nangati ang baywang ko, kaya kinamot ko nang kinamot, nang biglang napatid ‘yung garter sa pajama ko. Inis na inis ako, tapos sumabay pa ang mga nagliliparang langaw na lalo kong kinainis. 

Ano ang ibig sabihin ng panaginip ko?

Naghihintay,

Jorge

Sa iyo, Jorge,

Ang ibig sabihin ng panaginip mo na nakahiga ka sa kama, at biglang nangati ang baywang mo ay makakaranas ka ng mga kalungkutan, magiging balisa at hindi na magkakaroon ng katahimikan ang iyong isipan.

Ang kinamot mo nang kinamot ang baywang mo at napatid ang garter ng pajama mo ay babala ng mga kabiguan sa buhay. Mabibigo ka sa pinaplano mong gawin.

Samantala, ang nagliparang mga langaw sa tabi mo na lalo mong kinainis ay nagpapahiwatig na makakaranas ka ng sobrang pagkabagot sa iyong kapaligiran. Mababagot at hindi ka matatahimik. Hindi ka rin makakaramdam ng kapanatagan sa iyong isipan. Huwag mo masyadong dibdibin ang mga problema. Alalahanin mo na ang bawat problema ay may solusyon, dadaan at lilipas din ‘yan.

Matapat na sumasaiyo,

Maestra Estrellia de Luna