Kung feeling sad, tips para mas ma-enjoy ang Pasko

ni Nympha Miano-Ang - @Life and Style | December 23, 2020

Paskong pandemya ngayon pero kahit sa gitna ng krisis at kalungkutan, iba pa rin ang Pinoy, nagagawa pa ring maging masaya ang kanilang Pasko, pero tila yata iba ang nangyayari sa iyo ngayon. Namatayan ka ng mahal sa buhay at hirap ka ngayon sa pera o kaya naman ay sobra kang busy sa trabaho, nag-aaway-away pa kayo sa pamilya pagkatapos ay gumawa pa ng kalokohan ang anak mo at talagang bigung-bigo ka sa buhay. Feeling mo bagsak ang mundo mo ngayon.

Naku, kalimutan mo na muna ‘yan. Sa halip na feeling sad ka ngayong Pasko, isipin mo ang mga masasayang alaala. Iyong mga alaala na sobrang nagpapataba ng iyong puso at hindi ang alaalang dumudurog sa puso mo. Oras na para mag-enjoy ka ngayon sa buhay.

1. Hala, yakapin mo ang saya ng Pasko. Dahil kapag naglungkut-lungkutan ka ngayon, lalo ka lang malulungkot at hindi maganda iyan sa pagpasok ng Bagong Taon. Ang dapat mong gawin ay gawin ng normal ang dapat kapag sumasapit ang Pasko. Kung nag-iisa ka ngayong Pasko, magpadala ng Christmas cards o masasayang messages sa mga kaibigan at katrabaho. Kung sumagot naman sila, ipa-print mo ang kanilang Christmas cards at idisplay mo ito. Mapapangiti ka kapag nababasa mo hindi ba, dahil naalala ka nila.

2. Magpaka-busy ka ngayong Pasko. Huwag kang mag-isip nang kung anu-anong negatibo. Kung wala kang kapera-pera at hindi mo kayang bumili ng regalo, baka may iba pang paraan na makagagawa ka ng mga personalized gifts. Magpinta ka ng larawan o sumulat ng tula. Salansanin mo lahat ng pictures at saka mo i-scan at ipadala sa FB sa mga kaanak. Gumawa ng ornaments para sa mga kaibigan.

3. Umiyak. Kung talagang feel mong iyak, siya, sige, umiyak ka! Kung gusto mo ng kausap, tawagan sila. Huwag mong hayaan na hindi mo makausap ang pinakamabuti mong kaibigan. Hindi ka dapat malungkot. Ang mga kaibigan ay nariyan para suportahan ka.

4. Kung feel mong makipag-diskusyon sa announcer sa radyo o kaya ay maki-share ng sarili mong awiting Pamasko at iparinig sa buong bayan ang iyong boses ay tumawag ka sa isang radio show o kaya naman ay mag-videoke ka. Kung hindi mo alam ang lyrics ng kanta, sige lang, kanta lang, hanggang sa matawa ka sa ginagawa mo. Hindi ba’t ang pagtawa mong ay gamot na para sa kalungkutan ngayong Pasko.

5. Gumawa ng kabutihan. Kapag inisip mo ngayon ang positibo at may maibibigay kang lumang mga damit, kumot, mga hindi nagamit na laruan ay ipagkaloob na sa ito sa mga dapat pagbigyan. Imbes na malungkot ka, gawin itong isang kalakasan. I-donate ang oras na makipag-ugnayan sa mga charity organizations at makipag-usap sa mga hikahos at palakasin din sila kahit walang-wala sila at least makagagawa ka ng kakaibang kabayanihan at masayang damdamin sa iyong kapwa ngayong Pasko.

Kasaysayan ng pagbibigay ng Aguinaldo

ni Nympha Miano-Ang - @Life and Style | December 22, 2020

Karaniwan nang idinaraing ng tao tuwing Pasko ay iyong sobrang komersiyalismo at pagpipilit na makapagbigay ng regalo sa mga mahal sa buhay maging sa ibang tao. Hindi na bago ang ganitong bagay. Kada taon, pagpasok pa lang ng buwan ng “ber” ay napakarami nang advertisement at nagdidisplay ng mga ads para sa mas maagang pagkakagastusan.

Nariyang bigla mo na lang ilalabas ang iyong credit card at natatagong pera para matiyak mo na makapagbabalot ka na ng regalo at mailalagay sa ilalim ng iyong Christmas tree. Siyempre excited ka rin naman na makita rin sa ibang tao na mayroon kang regalo bukod sa excitement mong nararamdaman dahil naghanda ka ng regalo.

Maraming iba’t ibang istorya kung saan nga ba nagmula ang ideya ng pagbabalot ng regalo para sa Pasko. Heto ang ilang basehan.

1. PAGANONG PINAGMULAN. Marami sa ninuno ang nagdaraos ng holiday para parangalan ang Diyos tuwing kalungkutan ng pag-ulan ng niyebe lalo na’t natataon ng Pasko. Ang selebrasyon ay katatampukan ng pagpapalitan ng regalo, karaniwan mula sa pinuno hanggang sa kanyang utusan. Pinaniniwalaan na ang ugaling pagbibigay ng aginaldo ay nagmula sa pista opisyal ng mga Kristiyano tuwing Pasko upang magunita ang transisyon ng pagano sa bagong relihiyon.

2. ANG MGA MAGO. Ayon sa Bibliya, ang tatlong Mago na dumating at bumisita sa bagong silang na si Hesus. Ang mga Hari na ito ay nagdala ng regalo para sa bata. Ang pagbibigay ng regalo tuwing Pasko ay ginugunita bilang alaala sa naturang kasaysayan at pinaalalahanan ang mga nananalig na Siya ang regalo ng Diyos sa lupa, na nagkatawang tao, si Hesukristo.

3. SI SAN NIKOLAS O SANTA CLAUS. Si St. Nicholas ay isang ikaapat na siglong bishop noong panahon ng Asia Minor. Kilala siya sa kanyang kabaitan at pagkaheneroso lalo na sa mga bata at madalas na binibigyan sila ng pagkain at maliliit na aginaldo. Sa isang alamat sinasabing ginastusan nya ang isang mahirap na biyuda para lamang sa pangangailangan ng mga anak. Sinasabing si St. Nicholas ay naghahagis ng mga bags ng ginto sa ibabaw ng pugunan o chimney at saka ito maisu-swak sa mga medyas naka-sabit malapit sa apuyan para patuyuin. Siya pa rin ang itinuturing na modern-day Santa Claus.

4. ANG EBOLUSYON NG REGALO. Ang bawat lipunan sa mundo ay nagkaroon ng tradisyon mula sa pagsasabit ng mga medyas para punuin ng kendi at regalo. Ginawa ito ng mga tao noong ikasampung siglo. Sa pangkalahatan, ang mga regalo ay laruan o pagkain o mga prutas. Dumating ang panahon na naging homemade gifts hanggang sa nabibili na lamang na yari sa mga tindahan.

5. BIGAYAN NG REGALO NGAYON. Sa panahon ngayon parang unti-unting nawawala ang kahulugan at tradisyon ng pagbibigay ng aginaldo lalo na at may pandemya. Magkagayunman ang gift giving ay isang paraan pa rin para maipakita ang pagmamahal at appreciation sa mga kaibigan at pamilya.

Anu-ano ang mangyayari sa katawan 'pag naturukan ng COVID-19 vaccine?

ni Nympha Miano-Ang - @Life and Style | December 21, 2020

Ngayong mayroon nang awtorisado at rekomendadong COVID-19 vaccine partikular na sa U.S., na ating tatalakayin ang kalagayan doon ng vaccine, napakahirap pa ring matukoy ang 'accurate vaccine information.' Heto ang nailabas ng impormasyon ng Center for Disease Control and Prevention noong Dis. 13.

Ang totoo: Hindi ka magkakaroon ng COVID-19 kapag naturukan ng COVID-19 vaccines. Wala sa anumang COVID-19 vaccines na dinedebelop sa ngayon sa U.S. na gumagamit ng 'live virus' na nagiging dahilan ng COVID-19. May ilang iba't ibang uri ng vaccines ang dinedebelop. Gayunman, ang layunin sa bawat isa ay turuan ang ating immune systems na kilalanin at labanan ang virus na nagiging dahilan ng COVID-19. Minsan sa proseso na ito ay nagiging sanhi ng sintomas, tulad ng lagnat. Ang sintomas na ito ay normal at senyales na ang katawan ay bumubuo ng immunity.

Karaniwang aabot ng ilang linggo bago ang katawan ay makabuo ng immunity matapos na mabakunahan. Ibig sabihin, posible na ang tao ay maaring mainfect ng virus na COVID-19 bago o matapos mabakunahan at magkasakit. Dahil ang vaccine ay walang sapat na panahon para magbigay ng proteksiyon.

Ang totoo: Hindi ka magiging positibo sa COVID-19 viral tests matapos mabakunahan. Ang mga bakuna na nasa clinical trials sa U.S. ay hindi magbibigay ng positibong viral tests bagamat may kasalukuyan kang impeksiyon. Kung magdedebelop ang katawan ng immune response, na siyang layunin ng pagbabakuna, may posibilidad na masusuri kang positibo sa ilang antibody tests. Sinasaad sa antibody tests na may nakaraan kang impeksiyon at ikaw ay may ilang antas ng proteksiyon kontra virus. Kasalukuyang sinusuri ng mga eksperto kung paanong ang COVID-19 vaccine ay nakaaapekto sa antibody testing results.

Ang totoo: Ang sinumang nagkakasakit dahil sa COVID-19 ay magiginhawahan matapos mabakunahan. Bunga na rin ng matinding banta sa kalusugan ang COVID-19 at posibleng madapuan uli ng naturang sakit, pinapayuhan ang tao na magpabakuna kung nagkaroon na siya dati ng COVID-19.

Take note, sa ngayon at hindi pa alam ng mga eksperto kung gaano katagal magiging protektado muli sa sakit ang tao matapos makarekober sa COVID-19. Ang immunity na minsang na-infect ang may natural immunity pero depende sa tao. May mga ebidensiya na ang natural immunity ay puwedeng hindi nagtatagal. Hindi pa batid kung ang immunity na mula sa bakuna ay nagtatagal depende sa mga data kung gaano ito kaepektibo.

Ang kombinasyon ng natural immunity at vaccine-induced immunity ay napakahahalagang aspeto ng COVID-19 na sinisikap matutunan ng mga eksperto at pipilitin ng CDC na maimpormahan ang publiko sa paglabas ng bagong mga ebidensiya.

Ang totoo: Kapag nabakunahan na ay nakatutulong para makaiwas muli na magkasakit ng COVID-19. Habang ang mga tao na may COVID-19 na may mild illness, iyong iba ay malubha o may namamatay walang paraan kung paano nakaaapekto nang husto ang COVID-19 sa iyo, kahit na hindi tumaas ang peligro ng malulubhang komplikasyon sa iyo. Kung nagkasakit ka at nahawahan mo ang iyong kaibigan, pamilya at iba pang tao sa paligid mo habang may sakit ka. Nakatutulong ang COVID-19 vaccine sa iyo sa pagkakaroon mo ng antibody response para hindi maranasan ang sakit.

Ang totoo:Ang pagbakuna ng mRNA vaccine ay hindi makaaapekto sa DNA. Ang mRNA ay isang messenger ribonucleic acid at inilalarawan kung paano lumilikha ng protina sa katawan. Hindi nakaaapekto ang mRNA o pinahihina ang genetic makeup (DNA) ng tao. Ang mRNA mula sa COVID-19 vaccine ay hindi pumapasok sa nucleus ng cell, kung saan naroon ang DNA. Ibig sabihin, ang mRNA ay hindi nakaaapekto o sumisira sa DNA. Sa halip, ang COVID-19 vaccines na gumamit ng mRNA ang nagpapalakas sa natural defenses ng katawan at maingat na nagdedebelop ng proteksiyon o immunity laban sa sakit. ​