61-anyos na si Doneza sa 160-Km ay kakasa pa

ni Nympha Miano-Ang @Sports | August 18, 2023

Matinding preparasyon ngayon ang ginagawa ng tubong Batangas City na si Marlene Gomez Doneza ng Paharang East upang matupad ang susunod niyang target na matakbo ang Bataan Death March o BDM 102 km lalo at higit ang BDM 160 km.

Sa edad niyang 61, isinilang noong Enero 6, 1962, una niyang rason kung bakit siya tumatakbo ay para lalo pang lumakas, gumaan ang pakiramdam at manatiling parang bata ang pagkilos ng katawan upang hindi agad mapagod sa araw-araw na gawain, hindi rin tumataba at kasabay ng walang iniinom na maintenance na gamot.

Kahanga-hanga dahil hindi rin sagabal sa kanya ang mga paningin dahil kahit wala siyang salamin sa mata ay malinaw pa rin niyang nakikita ang lahat sa malayuan.

"Kapag may takbo akong darating siyempre excited at pinaghahandaan ko, kailangan kong mag-training para hindi ako ma-injury at matapos ang race ng safe. Excited na ma-meet ang ka-runners. Para kasi sa amin isa itong bonding at habang tumatakbo kami kuwentuhan sa daan, natutuwa kami sa mga kuwento ng bawat isa sa buhay. "

Nagpapasalamat din aniya si Doneza sa sporty niyang pamilya, "Pagkatapos ng race namin ay mag-iisip at hahanap na naman kami kung saan kami magpapa-register na next race. Napakapalad ko naman at ang pamilya ko ay sporty kaya naintindihan nila ako.

Positibo lang ako lagi na matatapos ko dahil taimtim akong manalangin na makakatapos ako nang ligtas."

Bilang senior sa ultra running, "taglay na namin ang lawak ng karanasan sa buhay, matiyaga kami, matiisin, may dedikasyon, malawak ang pang-unawa at pursigido."

Sa karakter ni Doneza bilang may edad nang atleta, ito marahil ang pundasyon niyang matatag kumpara sa mga kabataan na hindi pa gaano kabuo ng loob sa sport na kanyang minamahal.

Sa mga rutang kanyang dinaraanan, masarap sa kanyang pakiramdam na nakikita ang magagandang tanawin sa trail routes ng bundok, gubat at mga ilog, bagamat mas komportable siya sa road route.

'Kabaliwan' ba ang kanyang sport? Sagot niya, "sa mga natakbo at sa mga walang hilig sa pagtakbo, sa larangan na ito, magbabayad ka ng registration, mamamasahe, magdamag na 'di matutulog, tatakbo, mapapagod, mahihirapan, minsan mai-injury pa, maghapon bilad sa araw at minsan nabasa pa ng ulan kaya hindi maiwasang masabing ito'y isang kabaliwan nga haha. Pero du'n sa mga nakakaintindi at natakbo ng ultra isa itong napakaganda at masayang sports na kada takbong matatapos ay may matututunan na iba't ibang karanasan."

Pinakamagandang katangian ng isang ultra marathoner na tulad ko ay maganda ang kalusugan, may proper training, determinado, pokus, may pasensiya, positibo, palakaibigan, tapat at madasalin. "Kapag may ganyan kang mga katangian ay tiyak na tagumpay ang iyong ultra."

Sa kabuuan ng ultra run ni Doneza, may kabuuan nang 36 na beses na ang pinakamalayo, kasama ang 117 km, kasama pa ang 24 hrs endurance marathon, 24 hrs crazy run na 100 km at isa pa sa pinakamahirap ay ang 100 km Taal loop dahil first time niyang mag-100 km. Sa huling run niya ay binalisawsaw siya nang husto, sumakit ang puson at "kada ihi ko ay mapula at may kasamang dugo, 3 days akong mapula ang ihi.

Di ko pa kasi alam paano at ano ang gagawin pag nag-ultra marathon, akala ko sapat na nag mag-training sa pagtakbo, kailangan ang palagiang hydration, kaya ng mga sumunod na run ko alam ko na ang mga dapat gawin. Dito sa run na ito 1st time kong mag-100 km at 1st time na mag-champion sa ladies category."

Kaya naman may mahalagang payo siya sa mga nagsisimula pa lang sa ultra mary, "Dapat ay nasa magandang kondisyon ang katawan at kalusugan, sapat ang ensayo bago sumabak. May tamang training, may dedikasyon at handang mapagod, magtiis at masaktan. " Importante rin na pag-aralan ang ruta ng karera. Kung downhill, uphill ang ruta, mag-training ka."

"Magandang benepisyo ng running ay malakas na pangangatawan, walang maintenance at dumarami pa ang mga kaibigan," pagtatapos ni Doneza.

Tips para ma-enjoy ang solo adventure

ni Nympha Miano-Ang @Life and Style | April 22, 2023

Maging ikaw man ay isang metikulosong planner o isang taong basta nakakita ng biyaheng bus, sasampa kaagad para lang makabiyahe ng solo at bahala na, susuungin ang adventure ng buhay.

Para kasi sa iyo iyan ang magiging experience at aral mo sa bagong adventure para matutunang lumakad at magbiyahe na mag-isa. Alam mong ang alaala ng napakagandang biyaheng adventure ay dapat maging unforgettable, kaya ang kailangan mo lang ay sige lang gora lang na makapagbiyahe para makapagsimula ng panibagong adventure sa buhay. Pero paano ba mas mae-enjoy ang solong biyahe sa bawat pupuntahang lugar. 1. Tingnan kung gaano katagal ka sa papasuking adventure. Huwag hayaang ang kakulangan sa libreng oras ang magpapadismaya sa iyo. Basta’t tiyakin na ang pagbiyahe ay lilikha ng pangmatagalang alaala lalo na kung ang destinasyon ay tama. 2. Konsiderahin ang budget at gamitin ito bilang gabay. Ang pagbiyahe nang hindi masyadong magastos ang pinakamagaling na adventure sa lahat. Puwedeng sumakay ng tren patungo sa pinakamalayong destinasyon. Tumambay sa coffee shop o karinderya at makipagkuwentuhan.

Bisitahin ang maliliit na museo, historical centers, art galleries o sight seeing places.

Magtungo sa iba pang visitors’ center. May mga libreng aktibidad kahit saan at may mga impormasyon sa mga pupuntahan, gawing gabay ang mapa sa cellphone at iba pang ideal places na nakarekomenda roon. Kung nakatira ka sa labas ng pangunahing siyudad, isang simpleng day trip sa MRT o LRT lang, ferry o bus ay maghahatid na ng sariwang perspektibo sa araw-araw na buhay.

Kung mahabang biyahe ang plano pumili ng pinakaligtas na lugar sa bansa. Kung may sapat kang budget, may mga deluxe adventure na maaaring ikonsulta sa mga lehitimong professional travel agent na may inaalok na group packages. Mag-ingat lamang at suriing mabuti kung hindi mai-scam sa mga travel packages. Ang tour operators ay may iba’t ibang offer ng mga lugar o aktibidad na depende sa iyong panlasa, pam-beach man ang destinasyon o kaya ay bulubundukin. 3. Matalinong i-manage ang oras, pero maging flexible. Nariyan ang sobrang trapik at delays sa eroplano at hindi laging batid ang lagay ng panahon. Gamitin ang pagkakataon na ito, basahin ang susunod na serye ng biyahe, kausapin ang iba pang stranded passenger o kaya ay magtungo na lang sa lugar na ‘di gaanong dinadayo.

Magandang ideya rin na lumahok sa joiners club o iyong may mga biyaheng magkakasama kahit hindi magkakilala sa isang van, kung hindi naman tawid dagat ang pupuntahan. Dahil sila ang may mga itineraries kung anong mga oras aalis, kakain at pupunta sa isang lugar. Ingat sa biyahe ngayong summer mga lodis and have fun!

Mga 'Pamahiing Pinoy' sa tuwing araw ng Kuwaresma

ni Nympha Miano-Ang- @Life and Style | March 20, 2023

Karaniwan nang pawang mga aktibidad sa simbahan simula ng Araw ng Palaspas o sa unang Linggo ng Abril ang paggunita sa pagkamatay ni Hesukristo.

Likas sa mga Pilipino ang pagiging mapamahiin. Lahat na lang yata ng bagay at okasyon sa ating buhay ay kaakibat ang mga pamahiin o mga paniniwalang nakaugat sa ating kultura at tradisyon. Sa kabila ng katotohanang hi-tech na ang lahat, hindi pa rin nabubura ang ilang paniniwala ng salinlahi at patuloy na binubuhay ng bawat bagong henerasyon.

Narito ang ilan sa mga paniniwalang Pinoy tuwing Kuwaresma na hindi natin maintindihan, karamihan ay walang basehan at nagiging katatawanan, ngunit patuloy na sinusundan.

1. Pag-aakyat sa bundok, partikular ng mga arbularyo, para maghanap ng mga halamang gamot at anting-anting na pinaniniwalaang dumodoble ang bisa kapag nakalap sa Semana Santa, lalo na kapag Biyernes Santo.

2. Paglalagay ng palaspas sa pintuan at mga bintana ng bahay para hindi pumasok ang aswang o demonyo.

3. Ang mga lumang palaspas ay sinusunog at ang abo at hinahaluan ng langis ng niyog at ginagawang gamot – sa sakit ng ulo, tiyan, galis, at mga kati-kati.

4. Guguhitan ng krus ang mga dingding ng bahay para maitaboy ang masasamang espiritu.

5. Bawal maligo ng Biyernes Santo dahil magkakasakit.

6. Iwasang magkasugat dahil mas malalim ito at matagal maghilom.

7. Bawal magsalita ng malakas o tumawa baka ka mabati ng masasamang espiritu.

8. Bawal magwalis, magsibak ng kahoy, magpukpok ng martilyo o gumamit ng kutsilyo dahil “patay” ang Diyos.

9. Ang mga bata ay pinapalo ng baging ng makabuhay para hindi maging sutil o lapitin ng aswang, engkanto o masamang espiritu.

10. Ang langis ng niyog na ginawa sa Biyernes Santo na mabisang pantaboy ng masasamang espiritu ay nakagagaling ng sakit.

11. Ang mga bata ay pinagbabawalang pumunta sa kakahuyan o masusukal na lugar dahil maaari silang batiin ng mga engkanto at papalitan ang kanilang kaluluwa.

12. Bawal mag-ihaw ng isda dahil mangingitim ang iyong mukha.

13. Sa Linggo ng Pagkabuhay, ay pinababasbasan ang mga butong ipupunla upang maging masagana ang ani.

14. Ang ulan sa Linggo ng Pagkabuhay ay itinuturing na agua bendita o holy water na simbolo ng pagbuhos ng biyaya ng Diyos.