VP Sara, tatakbong pangulo sa 2028 elections

by Lester Bautista @News | February 18, 2026

Photo: VP Inday Sara Duterte - OVP

‘Ako si Sara Duterte, tatakbong pangulo ng Pilipinas’

Inanunsyo ni Vice President Sara Duterte ang intensyon niyang tumakbo bilang pangulo sa 2028 national elections.

Sinabi niya ito sa isang press briefing ngayong Miyerkules, Pebrero 18.

---

“Mga kababayan, humihingi ako ng paumanhin. Patawad kung tinulungan kong mahalal si BBM bilang pangulo ng ating bansa.”

‘Patawad kung tinulungan kong mahalal si BBM’

Ito ang naging pahayag ni Vice President Sara Duterte sa isinagawa niyang press briefing ngayong Miyerkules, Pebrero 18.

Humingi ng paumanhin si VP Sara na tinulungan umano nito mahalal si Pangulong Ferdinand “Bongbong” Marcos Jr. sa nagdaang 2022 elections.

Matatandaang tandem ang dalawa sa pagtakbo noon.

Pag-aresto ng ICC kina Go at Bato, 'di haharangin — Palasyo

ni Mylene Alfonso @News | February 17, 2026

Photo: Sen. Bong Go at Sen. Ronald Bato Dela Rosa - FB

May obligasyong ipatupad ng pamahalaan ng Pilipinas ang anumang posibleng arrest warrant laban kina Senators Ronald “Bato” Dela Rosa at Christopher “Bong” Go, at iba pang sinasabing co-perpetrators ni dating Pangulong Rodrigo Duterte kaugnay sa kasong crimes against humanity sakaling ipag-utos ng International Criminal Court (ICC) ang kanilang pag-aresto.

Ayon kay Palace Press Officer Undersecretay Claire Castro, ang mga kaso laban kay Duterte at sa kanyang mga kasama na umano’y may pananagutan ay isinampa noong 2017, noong miyembro pa ng ICC ang Pilipinas.

Gayunman, nilinaw ni Castro na hindi umano nila maaaring pakialaman ang proseso ng ICC dahil hindi pa naman umano pinuno ng bansa noon si Pangulong Ferdinand Marcos, Jr.

“Kung ito naman ay legal process na nanggagaling po sa ICC, hindi naman po natin ito maaaring pakialaman dahil ang kasong iyan ay naisampa noon pa, 2017, at hindi pa po pangulo si Pangulong Marcos Jr. So, kung dadaan sa proseso, iyon naman po ang nais ng pamahalaang ito. Ang ginagawa ng pamahalaang ito ay dumadaan lahat sa proseso,” wika ni Castro sa Palace briefing.

“Kapag may warrant of arrest na naisyu na po, kailangang i-implement,” tugon ni Castro nang tanungin sakaling may lumabas na arrest warrant.

“So, kung babantayan sila, sa ngayon ay wala pa pong dahilan para sila ay bantayan dahil wala pa pong nare-receive ang gobyerno ng warrants of arrest.”

“Nagawa na po before at ang sinunod po ay ang batas na umiiral sa ating bansa at nakipag-coordinate po ang ating pamahalaan sa Interpol kaya po naipadala ang dating Pangulong Duterte sa The Hague,” dagdag ng Palace official.

Kinasuhan sa flood control scam... Jinggoy, bawal nang mag-abroad

ni Mylene Alfonso @News | February 17, 2026

Photo: Jinggoy Estrada - FB

Naglabas ang Manila Regional Trial Court ng Precautionary Hold Departure Order laban kay Senador Jinggoy Estrada at co-respondents niya sa kasong plunder na may kinalaman sa flood control project, kabilang si dating Public Works and Highways Sec. Manuel Bonoan.

Ayon kay Department of Justice (DOJ) spokesperson Polo Martinez, kasama rin sina dating Department of Public Works and Highways Undersecretary Roberto Bernardo, dating regional director Gerard Opulencia, at dating Bulacan district engineer Henry Alcantara sa Precautionary Hold Departure Order.

Ayon kay Martinez, naglabas ng kautusan ang Manila RTC Branch 52 laban sa limang indibidwal noong Pebrero 10, 2026.

“The court found probable cause to believe that respondents will depart from the Philippines to evade arrest. So the court ordered the Commissioner for the Bureau of Immigration to hold the departure of these five individuals and to include them in the hold departure list,” pahayag ni Martinez.

Binigyang-din niya na ang naturang kautusan ay hindi nangangahulugang nalutas na ang mga nakabinbing Plunder case sa DOJ.

“By the term precautionary, it means that before the case is formally filed in court, the judge or the Branch 52 of the RTC Manila of the order anticipating that the respondents in these plunder cases pending before the DOJ may evade arrest,” dagdag ni Martinez.