Super Bagyong Obet at habagat, joint forces

by Jeff Tumbado @News | August 24, 2026

Photo: PAGASA-DOST

Inaasahang papasok sa Philippine Area of Responsibility (PAR) ang Typhoon Saudel at maaaring tawaging Bagyong Obet, depende pa rin sa pagkakasunod ng pagpasok ng iba pang binabantayang tropical cyclone.

Ayon sa forecast, posible pang umabot si Saudel sa Super Typhoon category bago o habang papasok sa PAR. 

Inaasahang magpapatuloy ito sa pagkilos pahilagang-kanluran, patungo sa direksiyon ng Taiwan, kung saan posible itong makaapekto sa hilagang bahagi ng Taiwan depende sa magiging track nito.

Kahit hindi direktang tumama sa kalupaan ng Pilipinas, ang malakas na sirkulasyon ni Saudel ay inaasahang hahatak at magpapalakas sa Habagat, na maaaring magdala ng mas maraming pag-ulan, lalo na sa kanlurang bahagi ng Luzon.

16 yrs. old, dedo sa outing ng tropa

by Mai Ancheta @News | August 24, 2026

Photo: TUBA-MPS, circulated

Napalitan ng kalungkutan ang masaya sanang picnic ng magkakaibigan matapos maanod sa malakas na agos ng tubig ang 16-anyos na estudyante sa Buo River, Brgy. Camp 3, Tuba, Benguet.

Pauwi na umano ang grupo nang mapansin na tinangay ng malakas na agos ang biktima at tinangkang saklolohan subalit hindi ito naabutan dahil sa mabilis na agos ng ilog.

Gabi na nang matagpuan ng search and rescue team ang katawan ng biktima sa Ampasit River, kabilang ibayo ng Buo River.

Nagtamo ng basag sa bungo ang dalagita dahil umano sa pagkahulog sa mabatong bahagi ng ilog.

Tumanggi ang magulang ng biktima na ipa-autopsy ang katawan nito at iniuwi na sa kanilang tahanan sa Camp 1, Tuba, Benguet.

15-anyos, 4 na araw missing, natagpuang patay

by Jeff Tumbado @News | August 24, 2026

Photo: Bakanteng lote sa Brgy. Matacla, Goa, Camarines Sur - Circulated, ABS-CBN

Isang 15-anyos na dalagita na apat na araw nang nawawala ang natagpuang patay sa isang bakanteng lote sa Brgy. Matacla, Goa, Camarines Sur, noong Biyernes.

Alas-10:15 ng umaga nang matuklasan ng tatlong batang namimitas ng bunga ng amora o mulberry ang bangkay ng biktima sa Zone 3 ng barangay.

Kinilala ng mga awtoridad ang biktima sa alyas Rose, na nakasuot ng gray jacket at blue jogging pants.

Nakumpirma ng mga kaanak ang kanyang pagkakakilanlan batay sa mga tattoo sa kanyang katawan.

Ayon sa pulisya, huling nakita si Rose noong umaga ng Agosto 17 nang umalis siya sa bahay ng kanyang tiyahin at nagtungo umano sa Tigaon, Camarines Sur. Hindi na siya nakauwi nang gabing iyon.

Sinabi ng Police Regional Office 5 na una nang inakala ng tiyahin na maaaring nakituloy ang dalagita sa ibang kamag-anak, dahil nakagawian umano nitong bumisita o manatili sa bahay ng mga kaanak.

Sa paunang pagsusuri, walang nakitang malinaw na panlabas na sugat sa katawan ng biktima.

Gayunman, hindi isinasantabi ng mga imbestigador ang posibilidad na may foul play habang hinihintay ang resulta ng forensic autopsy.

Nailibing na ang biktima, ngunit nagpapatuloy ang imbestigasyon ng Goa Municipal Police Station upang matukoy ang mga pangyayari bago at matapos siyang mawala.