Mga anak ng POGO workers, sustentado ng gobyerno — PAOCC

ni Angela Fernando @News | Dec. 1, 2024

View: Successfully facilitated deportation / Presidential Anti-Organized Crime Commission (PAOCC) - File photo

Sinusuportahan ng gobyerno ng 'Pinas sa kasalukuyan ang nasa 15 bata matapos ma-deport ang kanilang mga banyagang ama na dating manggagawa ng Philippine Offshore Gaming Operators (POGOs), ayon sa Presidential Anti-Organized Crime Commission (PAOCC) nitong Linggo.

Ayon kay PAOCC executive director Gilbert Cruz, ang mga bata, na ang mga ina ay mga Pinay, ay may edad mula sanggol hanggang tatlong taong gulang.

Sinisikap ng ahensya na matugunan ang kanilang pangangailangan habang inaayos ang kanilang sitwasyon.

Pagbibigay-diin ni Cruz, hindi maaaring tanggihang tulungan ang mga ito dahil nagsilbi silang collateral damage na naging bunga ng ilegal na operasyon ng POGO sa bansa.

Tiniyak din ni Cruz na hindi nila pinapanatili ang mga bata sa loob ng detention center ngunit nagbibigay sila ng kinakailangang suporta tulad ng pagkain at pansamantalang tirahan.

Sinabi rin niya na kasalukuyan silang nakikipag-ugnayan sa Department of Social Welfare and Development (DSWD) upang masiguro ang maayos na pag-aalaga sa mga bata.

Bilang ng mga namatay sa leptospirosis, bumaba — DOH

ni Eli San Miguel @News | Nov. 30, 2024

Photo: Department of Health

Iniulat ng Department of Health (DOH) na mas mababa ang bilang ng mga namatay dahil sa leptospirosis mula huling bahagi ng Oktubre hanggang unang bahagi ng Nobyembre ngayong taon kumpara sa parehong panahon noong 2023.

Ayon sa DOH, may naitalang 594 na kaso sa buong bansa mula Oktubre 27 hanggang Nobyembre 9, 2024, na 2.5 beses na mas mataas kumpara sa 234 na kaso na naitala mula Oktubre 13 hanggang 26, 2023.

Iniuugnay ng DOH ang pagtaas ng mga kaso sa mga bagyong tumama sa bansa noong Oktubre, na nagdulot ng malawakang pagbaha sa maraming bahagi ng Pilipinas.

Gayunpaman, naitala ng DOH ang 9.12% case fatality rate (CFR) sa taong 2024, mas mababa kumpara sa 10.83% noong kaparehong panahon noong nakaraang taon.

Mga Pinoy, 'di obligadong dumalo sa misa ng Feast of Immaculate Concepcion

ni Eli San Miguel @News | Nov. 29, 2024

File Photo: Feast of Immaculate Concepcion - Circulated, Public Holidays PH

Hindi obligado ang mga Katolikong Pilipino na dumalo sa misa para sa Feast of the Immaculate Conception, sa Disyembre 9.

Inilipat ang pagdiriwang, dahil tumapat ito sa ikalawang Sunday of Advent ngayong taon.

Humiling ang Catholic Bishops' Conference of the Philippines (CBCP) ng paglilinaw mula sa Vatican hinggil sa obligasyon para sa Lunes.

"The Philippine bishops made this request considering that it would be difficult or even impossible for many Filipino Catholics to go to Mass on a working day since they are daily wage earners and rely on this for their family's sustenance," saad ng Episcopal Commission on Liturgy sa isang pahayag na ipinost ngayong Biyernes.

"The Dicastery responded positively to the request, stating that 'the obligation to attend Mass does not apply this year'," dagdag pa nito.