Nancy Binay 91/155

Dagdag-honoraria sa mga guro na nag-OT sa eleksyon, aprub

BULGAR

ni Nancy Binay - @Be Nice Tayo | May 15, 2022

Kaisa po tayo sa panawagan sa Commission on Elections (Comelec) na mabigyan ng dagdag na honoraria ang mga nagsilbi ng overtime nitong nakaraang halalan.

Hindi kasi biro ang gumising nang maaga noong Mayo 9 upang ihanda ang polling center, at manatiling gising at alerto nang mahigit 24 oras sa gitna ng init, siksikan, at banta ng COVID-19.

Ngunit sa kabila ng mga kaso ng depektibong vote counting machines (VCMs) o banta ng kaguluhan o karahasan ay nanatiling tapat sa tungkulin ang mga electoral board na panatilihing maayos at patas ang eleksyon.

☻☻☻

Ngayong tapos na ang eleksyon ay binabantayan naman ng mga eksperto ang posibilidad ng muling pagtaas ng kaso ng COVID-19 sa bansa.

Ito ay dahil na rin sa mga ulat ng hindi pagsunod sa minimum public health standards bago, habang, at pagkatapos ng eleksyon. Nakita naman natin ang pagsisiksikan ng mga tao, lalo na noong araw ng eleksyon sa mga voting center.

Ayon sa mga eksperto, posibleng sa darating na linggo ay makikita kung tataas o hindi ang bilang ng mga bagong kaso ng COVID-19.

Kung kaya’t mungkahi nila ay pataasin pang lalo ang pagbabakuna ng first booster shot sa eligible population, at ang patuloy na pagmamatyag ng sambayanan upang hindi na umabot muli sa punto ng lockdown.

☻☻☻

Habang sinusulat ang kolum na ito ay nakakolekta na ang Metropolitan Manila Development Authority (MMDA) ng tinatayang 252 tonelada ng campaign materials simula nang inilunsad nito ang dismantling operations pagkatapos ng halalan.

Ayon sa ahensya, ang mga ito ay gagawing materyales para maging bricks.

Nanawagan din ang EcoWaste Coalition, isang zero waste advocacy organization, para sa isang ligtas na reusing at repurposing ng mga campaign materials. Ito ay upang maiwasan na sunugin, o kaya ay itapon sa mga landfill o sa dagat ang mga materyales.

Maaari kasing gamiting muli ang mga tarpaulin upang mapakinabangang muli, tulad ng mga bag o trapal para sa mga bahay o pampublikong sasakyan.

☻☻☻

Nais kong kunin ang pagkakataon na ito upang ipaabot ang aking taos-pusong pasasalamat sa mga nagpaabot ng kanilang pagbati sa aking kaarawan at sa kapatid ko nitong nakaraang linggo. Nakakataba po ng puso ang inyong mainit na pagbati.

Nawa’y patuloy po tayong magtulungan upang itulak at makamit ang mga batas para sa isang maunlad, mapayapa, at progresibong Pilipinas!

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice! ☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Good news na mas marami na ang aktibo sa pagboto

BULGAR

ni Nancy Binay - @Be Nice Tayo | May 12, 2022

Nitong nakaraang Lunes, May 9, inihalal natin ang mga susunod na lider ng bansa.

67 milyong Pilipino ang nagparehistro para bumoto, at bagama't wala pa mang opisyal na bilang, inaasahang lalagpas sa bilang noong 2016 ang voter turnout ngayong halalan.

Hindi man sang-ayon ang lahat sa resulta ng halalan, maituturing pa ring good news na mas marami na sa mga kababayan natin ang nagiging malay sa responsibilidad nila sa pagtataguyod ng bansa.

☻☻☻

Pagkatapos ng halalan, panahon na upang tutukan nating maigi ang muli nating pagbangon mula sa dagok ng pandemya.

Nasa magkakaibang panig man tayo, naniniwala akong may pagkakataon ang lahat na makapaglingkod at ibigay ang makakaya para sa bayan.

☻☻☻

Nais nating samantalahin ang pagkakataon upang magpasalamat sa lahat ng nagboluntaryong tumulong at nakasama natin sa nakaraang kampanya sa pagtakbo ng aking amang si former Vice President Jejomar Binay.

Marami ang naging hamon ng kampanya dahil sa pandemya, ngunit sa kabila ng mga ito ay nakapag-ikot kami sa buong bansa upang iparating ang mensahe niya.

Maraming salamat din sa mga patuloy na nagtitiwala sa adbokasiya ng aking ama at sa Binay “brand of service”.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice! ☻

Mabuhay ang mga ilaw ng tahanan!

BULGAR

ni Nancy Binay - @Be Nice Tayo | May 8, 2022

Isang mainit na pagbati sa lahat ng ina at nagsisilbing nanay sa ating araw ngayon. Mabuhay ang mga ilaw ng tahanan, ang mga unang guro, at katuwang sa pagpapaunlad ng lipunan!

☻☻☻

Bukas naman po, Mayo 9, ay kikilos tayo upang gawin ang isa sa mga pinakasagrado nating tungkulin at responsibilidad, ang bumoto.

Atin pong tandaan na bukas ang mga voting center mula 6:00 AM hanggang 7:00 PM upang mapangalagaan ang ating kalusugan, dahil nasa pandemya pa rin tayo.

Kung maaari po ay ihanda na natin ang ating kodigo upang mabilis tayong makaboto at hindi na magtagal sa loob ng voting center. I-double check din natin ang lokasyon ng ating voting center, at tiyakin na ang ating pangalan ay kasama sa listahan ng mga botante.

☻☻☻

Sa araw ng botohan ay kailangan pa ring magsuot ng face mask. ‘Di naman kailangang magpakita ng vaccination card o negatibong COVID-19 test upang makaboto. Ngunit, itse-check pa rin ang inyong temperatura bago pumasok sa voting center.

Pagdating sa inyong presinto ay lumapit sa sinumang miyembro ng electoral board at sabihin ang inyong pangalan, precinct number, at iba pang kinakailangang impormasyon. Mas mainam kung may dala kayong ID upang mapabilis ang proseso ng pagkakakilanlan.

Pagkatapos ay pirmahan ang Election Day Computerized Voters List (EDCVL) at tanggapin ang inyong balota. Tingnan kung may punit, may marka, o shade ang balota, kung meron ay huwag itong tanggapin.

Pumunta sa area kung saan puwedeng punan ang balota. I-shade nang buo ang bilog na nasa tabi ng pangalan ng kandidatong napupusuan ninyo. Bomoto lamang ayon sa hinihinging bilang ng pwesto, kung mas marami sa hinihingi ay overvoting ito at hindi maaari. Ngunit pwede naman ang undervoting o yung pagboto ng mas mababa sa hinihinging bilang.

Kung tapos na ay ipasok sa Vote Counting Machine (VCM) ang inyong balota at tingnan ang resibo kung tama ang resulta. Kung tama ay ihulog ito sa tamang lalagyan. Kung hindi naman ay maaari mo itong ireklamo sa chairman ng electoral board upang maisama sa record ng official protest.

Huwag din kalilimutan na palagyan ng indelible ink ang inyong kanang hintuturo.

☻☻☻

Nakasalalay sa ating mga kamay ang magiging direksyon ng ating bansa sa hinaharap, kung kaya’t ang panalangin at panawagan ko, gamitin natin ito ng mahusay. Huwag tayong magpapadala sa takot, sa pera, o dahas.

Isipin natin ang kinabukasan ng ating mga anak, mga apo, at mga susunod pang henerasyon kung kaya't pag-isipang mabuti ang mga ihahalal na lider ng bansa.

Iisa lamang ang boto ng bawat Pilipino, ngunit sa pinagsamang lakas natin, makakamit natin isang maunlad, progresibo, at maipagmamalaki nating bansa.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice! ☻

. .

Dagdag-honoraria sa mga guro na nag-OT sa eleksyon, aprub

Good news na mas marami na ang aktibo sa pagboto

Mabuhay ang mga ilaw ng tahanan!

RECOMMENDED