Paulit-ulit na pagbaha sa Metro Manila, 'di na nakakatuwa

ni Nancy Binay @Be Nice Tayo | July 28, 2024

Nitong mga nakaraang araw ay nagkaroon ng malawakang pagbaha sa iba’t ibang lugar sa Metro Manila at mga karatig probinsya nito sa Luzon dahil sa Bagyong Carina na sinabayan pa ng Habagat.

Base sa ulat ng Department of Agriculture (DA), umabot na sa mahigit P200 milyong halaga ang nalugi sa sektor ng agrikultura dahil sa pinsalang hatid ng Habagat at bagyo.

Dagdag pa ng DA na karamihan ng pagkalugi sa agrikultura ay bigas na inilagay sa 2,299 metriko tonelada. Kabilang sa iba pang mga produktong agrikultural na nasira ay mga high-value crops, mais, mga alagang hayop at manok.

Samantala, nauna nang iniulat ng National Disaster Risk Reduction and Management Council (NDRRMC) na nagtamo ang bansa ng mahigit P9.7 bilyong halaga ng pinsala sa agrikultura dulot ng katatapos lamang na kalamidad. 

☻☻☻

Nakakadismaya dahil tila wala pa ring pagbabago sa mga flood control project ng Department of Public Works and Highways (DPWH) at Metropolitan Manila Development Authority (MMDA).

Labinlimang taon pagkatapos ng pananalasa ng Bagyong Ondoy, parang ganu’n pa rin ang sitwasyon sa Metro Manila at maging sa mga karatig lalawigan.

Nakakalungkot dahil sa panahon ng makabagong teknolohiya at sa kabila ng malaking pondo para sa flood control projects ng DPWH at MMDA, masasabi nating hindi ito nakatulong para mapangalagaan ang mga komunidad.

Napapanahon na muling pag-aralan ng pamahalaan ang mga polisiya at programa nito para itama ang palpak na sistema.

☻☻☻

Bukod dito, ang patuloy na reclamation sa Manila Bay ay mas lalo pang nagpabigat ng pagbaha sa Metro Manila.

Paano tayo magiging seryoso sa pagbibigay-solusyon sa baha kung patuloy ang ating pagwawalang-bahala sa ating kapaligiran at kalikasan?

Totoo at nararanasan na nating lahat ang epekto ng climate change kaya naman dapat lamang na ipatupad ng maayos ang DRRM Law, climate change adaptation, at disaster risk management sa CLUP ng mga LGU.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Mga Pinoy, may ‘K’ para sa disenteng pabahay

ni Nancy Binay @Be Nice Tayo | July 26, 2024

Memorable ang pangatlong State of the Nation Address ni Pangulong Bongbong Marcos nitong nakaraang Lunes.

Marami ang natuwa sa desisyon niyang ipagbawal na ang Philippine Offshore Gaming Operators (POGOs), maging sa pagbibigay-diin niya sa pagtindig para sa mga karapatan natin sa West Philippine Sea.

Pagdating sa universal healthcare, bagama’t malayo pa tayo sa nais nating makamit, magandang balita ang nasimulang mga programa sa pagpapalawak pa nito. 

Bilang dating chairperson ng Committee on Tourism ng Senado, natutuwa rin tayo sa pagbanggit ng Pangulo sa ‘experiential tourism’ lalo pa’t iba’t ibang karanasan ang maiaalok natin sa mga bisita ng bansa.

☻☻☻

Medyo nakulangan lang tayo sa update pagdating sa housing. Ilang porsyento na ba ang nabawas sa housing backlog? Kumusta ang roadmap sa programang pabahay?

Karapatan ng ating mga kababayan ang access sa disenteng pamamahay, kaya sana ay bagama’t hindi ito nabanggit sa SONA, patuloy pa ring magsusumikap ang pamahalaan na mapunan ang housing backlog.

☻☻☻

Makakaasa ang mga kababayan natin na makikipagtulungan tayo sa executive branch para sa patuloy na pag-unlad ng bansa.

Sama-sama tayong umasa para sa mas magandang kinabukasan para sa lahat.

☻☻☻

Nakikiramay tayo sa mga pamilyang naapektuhan ng Bagyong Carina sa buong bansa.

Nalubog sa baha ang Metro Manila at marami pang lugar.

Habang hindi pa natin lubos na naitatala ang pinsala at dami ng naapektuhan, umasa tayo na walang tigil ang pamahalaan upang maipaabot ang tulong sa mga nangangailangan.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Pag-amin sa malaking pagkakamali, nararapat

ni Nancy Binay @Be Nice Tayo | July 21, 2024

Bukas ay aantabayanan ng buong Pilipinas ang ikatlong State of the Nation Address (SONA) ni Pangulong Bongbong Marcos.

Mahalaga ang SONA na ito ngayong taon dahil maraming isyu na kailangang pagtuunan ng pansin ng ating pamahalaan.

Handa na ang inyong lingkod na makinig sa ulat sa bayan ng ating Pangulo at gusto rin nating malaman ang mga plano ng administrasyon para sagutin ang mga problemang hinaharap ng mamamayang Pilipino.

☻☻☻

Noong nakaraang linggo rin ay nagpulong na ang Senate Ethics Committee para ayusin ang rules pagdating sa proseso kapag may nag-file ng complaint sa kanilang committee.

Matatandaang naghain tayo ng ethics complaint laban kay Senador Alan Peter Cayetano dahil sa inasal nito sa isang hearing sa Senado.

Sa isang panayam, sinabi ni Ethics chair Senator Francis Tolentino na hindi magdaraos ng public hearing ang Senate Committee on Ethics and Privileges hinggil sa ating reklamo.

Bagkus, magiging closed door ang hearing pero ang resulta nito ay isisiwalat din nila sa publiko.

Dagdag pa niya, kakausapin niya muna kami para sa isang reconciliation meeting.

Sa akin, I am willing to go through the process kung bahagi ng proseso ‘yung reconciliation meeting muna kami at susunod tayo sa ganoong proseso.

Ngunit lilinawin ko lang na ‘yung finile nating ethics complaint, hindi ko goal na magbati kaming dalawa, ang goal ko ay kailangan na may admission na may malaking pagkakamali na ginawa si Senator Alan na hindi karapat-dapat ang mga salitang binitawan niya sa isang Senate hearing.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay