Maharlika bill, lusot na sa Kongreso.. GSIS at SSS pension, puwede pa rin i-invest — Marcos

ni Mylene Alfonso | June 1, 2023

Pirma na lang ni Pangulong Ferdinand Marcos, Jr., ang kulang upang maging ganap na batas ang kontrobersyal na Maharlika Investment Fund (MIF) matapos lumusot na sa Bicameral Conference Committee ng dalawang kapulungan ng Kongreso.

Kaugnay nito, wala umanong intensyon ang pamahalaan na gamitin ang state pension funds bilang seed fund para sa panukalang MIF.

Ginawa ni Marcos ang pahayag nang lumusot sa ikatlo at pinal na pagbasa ng Senado ang MIF na sinertipikahang urgent ng Pangulo matapos ang mahigit 12 oras na marathon hearing na nagtapos alas-2:30 ng madaling-araw nitong Miyerkules, Mayo 31.

Ito ay makaraang sang-ayunan ni Marcos ang isa sa mga pagbabago sa panukalang batas na nagbabawal sa paggamit ng pondo ng Government Service Insurance System (GSIS), Social Security System (SSS), Philippine Health Insurance (PhilHealth) corporation, Pag-IBIG, at iba pa sa Maharlika Fund.

"I perfectly agree. We have no intention of using... kukuha tayo ng pera ng pension fund. That's not... We will not use it as a seed fund," sabi ni Marcos sa sidelines ng 86th anniversary ng GSIS sa Pasay City.

Gayunman, inihayag ng Pangulo na kung naniniwala ang isang state pension fund na isang magandang investment ang kontrobersyal na Maharlika Fund, nasa kanila na ang desisyon kung pipiliin nilang mamuhunan.

"However, if a pension fund, which is what pension funds do, is they invest. If the pension fund decides that Maharlika fund is a good investment, it's up to them if they want to invest in it," paliwanag ng Pangulo.

Dagdag pa ni Marcos na tulad ng ibang mga korporasyon, ang pension fund ng bansa ay maaaring mamuhunan sa Maharlika Fund upang mapangalagaan ang kanilang pondo.

"Not only pension funds but corporations, mga fund 'yan lang ang ginagawa nila, pinapapalaki nila 'yung pera nila para meron silang maibigay. Like the GSIS, this is precisely what they have been doing. They are making sure that they are very solid, they very stable," punto pa ni Marcos.

Nabatid na 19 na senador ang pumabor sa MIF habang kumontra si Senador Risa Hontiveros at nag-abstain naman sa pagboto si Sen. Nancy Binay.

Samantala, hindi nakaboto sina Senate Minority Leader Aquilino ‘Koko’ Pimentel III, Sen. Francis Escudero at Sen. Imee Marcos.

'Di maintindihan ng mga Pinoy — Sen. Robin.. Maharlika Bill, i-translate sa Filipino

ni Mylene Alfonso | June 1, 2023

Upang maunawaan ng pangkaraniwang Pilipino ang panukalang Maharlika Investment Fund Act, isinusulong ni Sen. Robinhood 'Robin' C. Padilla ang pagsalin sa Filipino ng panukalang batas at ang kaugnay nitong dokumento.

Ginawa ni Padilla ang pahayag na nagsusulong sa paggamit ng wikang Filipino sa opisyal na dokumento ng pamahalaan ng Pilipinas, sa pamamagitan ng pagmungkahi ng pag-amyenda sa Maharlika bill sa Senado, Miyerkules ng madaling-araw.

Tinanggap ito ni Sen. Mark Villar, ang sponsor ng Maharlika bill.

"Magmula kaninang umaga, marami na po tayong kababayang nand'yan sa labas at sila nagpoprotesta at sa kanila pong sinasabi hindi nila naintindihan ang atin pong panukala na Maharlika bill. Kanina din pong tanghali meron tayong bisitang barangay captain.

Nang sinabi po natin sa kanila tungkol sa Maharlika bill na ito, ating panukala, sila po ay (nagsabi), 'di namin naintindihan 'yan," paliwanag ni Padilla.

Ipinunto rin ni Padilla na sa Sec. 6, Art. XVI ng 1987 Constitution, ang pamahalaan ay gagawa ng hakbang para gamitin ang Filipino bilang "medium of official communication and as language of instruction in the educational system".

Unang tinanggap ni Villar ang panukala ni Padilla sa seksyon tungkol sa right to freedom of information of the public: "All documents of the MIF (Maharlika Investment Fund) and MIC (Maharlika Investment Corp.) shall be open, available and accessible to the public in both English and Filipino".

Isa pang panukala ni Padilla na tinanggap ni Villar ay sa "Effectivity" kung saan ang pagsalin ng batas sa Filipino ay ilalathala sa Official Gazette o sa dyaryong may general circulation sa Pilipinas.

4 nagbebenta ng GCash account sa FB, kulong

ni Mylene Alfonso | June 1, 2023

Arestado ng mga ahente ng National Bureau of Investigation-Cybercrime Division (NBI-CCD) ang apat na indibidwal dahil sa ilegal na pagbebenta ng GCash account sa isinagawang serye ng operasyon sa Bulacan, Pasay at Maynila.

Kinilala ng NBI-CCD ang mga naaresto na sina Raul Malabon, Jerrica Sarmiento, Matthew Daniel Torres at Alexis Alviento.

Isinagawa ng NBI-CCD, ang serye ng operasyon matapos makatanggap ng impormasyon na ilang indibidwal ang sangkot sa laganap na bentahan ng GCash account sa pamamagitan ng Facebook.

Sa isinagawang online surveillance nalaman na ang Facebook accounts na “Principe Larjay”, “Jerrica Sarmiento”, “Francis Lucas”, at “Sixela Alviento” ay nagbebenta ng GCash account.

Ikinasa ng NBI-CCD ang mga entrapment operation at noong Mayo 22, 2023, nagpunta ang mga ahente sa San Jose Del Monte, Bulacan at naaresto sina Malabon at Sarmiento.

Noong Mayo 23, naaresto naman sa Pasay City si Torres at sa Maynila naman si Alviento.

Sinampahan ng kasong paglabag sa R.A. 8484 (Access Devices Regulations Act of 1998) in relation to R.A. 10175 (Cybercrime Prevention Act of 2012) ang mga suspek.