Gibo Teodoro bagong secretary ng DND, Ted Herbosa sa DOH

ni Mylene Alfonso | June 6, 2023

Itinalaga ni Pangulong Ferdinand Marcos, Jr., si Gilbert Teodoro, Jr., bilang bagong kalihim ng Department of National Defense at si Dr. Teodoro Herbosa bilang bagong kalihim ng Department of Health.

Inanunsyo ng Presidential Communications Office ang appointment nina Gibo at Ted matapos makipagpulong si Marcos kina Teodoro at DND Senior Undersecretary Carlito Galvez, Herbosa at Health Undersecretary Ma. Rosario Vergeire sa magkakahiwalay na pagpupulong sa Palasyo, kahapon.

VAT exemption at pinalawak na discount sa tubig at kuryente ng senior

ni Mylene Alfonso | June 6, 2023

Ipinanukala ni Senador Lito Lapid na i-exempt sa 12 percent Value Added Tax at mas palawakin ang discount sa bill sa kuryente at tubig ng mga senior citizens.

Sa ilalim ng Senate Bill Number 2169, sinabi ni Lapid na ipatutupad ang limang porsyentong diskwento ng mga senior citizen sa 150 Kilowatt Hours mula sa kasalukuyang 50 Kilowatt Hours sa konsumo sa kuryente.

Samantala, ipatutupad naman ang limang porsyentong diskwento sa konsumo sa tubig sa unang 50 Cubic Meters mula sa kasalukuyang 30 Cubic Meters.

Isinulong din ni Lapid na ilibre na sa 12 percent Value Added Tax ang konsumo sa tubig at kuryente kung nasa ilalim ng pangalan ng senior citizens ang bills.

Naniniwala si Lapid na malaking tulong ito sa lolo't lola na walang kita at kapos sa panggastos sa kanilang pagkain at mga gamot.

Paraan na rin aniya ito ng pagpapasalamat ng lipunan sa mga senior citizen na malaki ang naiambag sa ekonomiya ng bansa noong kabataan nila.

Bill deposit sa kuryente, puwedeng i-refund

ni Mylene Alfonso | June 4, 2023

Ilang konsyumer ng More Electric and Power Corporation sa Iloilo City ang nakakuha na ng refund sa kanilang bill deposit.

Sa seremonya sa tanggapan ng More Power, kabilang sa mga consumers na unang nabigyan ng refund sina Emmanuel Improgo, Baby Jean Agustin at Barangay Chairman Romeo Losario Jagorin, Jr., ng Bgy. Sambag, Jaro.

Ang bill deposit ay ang ibinabayad ng mga konsyumer kapag nag-apply ito ng kanilang electric meter. Alinsunod sa Article 7 ng Magna Carta for residential electric consumers, ang bill deposit ay kailangang ibalik ng mga Distribution Utility (DU) makalipas ang 3 taon o 36 buwan sa kondisyon na ang konsyumer ay nagbabayad sa oras at walang record ng disconnection.

Kuwento ni Agustin, malaking tulong na ibinalik sa ang bill deposit at hindi umano niya alam na may ganitong patakaran.

Gayundin ang pahayag ni Jagorin, aniya, wala silang naririnig na ganitong klaseng refund sa dating DU, kaya nagulat sa balik-bayad na kusang ibinibigay sa mga konsyumer na hindi na kailangan mag-apply o mag-inquire kung kwalipikado sa refund.

Ani Improgo, malaking tulong ang natanggap nitong P2,500.

Ayon kay More Power President at CEO Roel Castro, ang kusang pagbabalik ng bill deposit ay sa hangarin na rin nila na maging ehemplo sa iba pang DU.

Samantala, pinuri ni Energy Regulatory Commission (ERC) Commissioner Alexis Lumbatan ang bill deposit refund initiative ng More Power.

Ani Lumbatan, na dumalo sa seremonya, bihira ang mga DU na kusang nagbabalik ng refund maliban na lamang kung hingin ng consumers kaya malaking bagay na sinimulan

ito. Nabatid na mayroong P5 million bill deposits fund ang More Power na handang ibalik sa mga konsyumer para ngayong taon.