Solo parent at buntis,pasok sa food stamp

ni Mylene Alfonso | June 14, 2023

Aprubado ni Pangulong Ferdinand Marcos, Jr. ang pilot testing ng food stamp program na inilaan para sa isang milyong mahihirap na pamilya bilang bahagi ng layunin ng administrasyon na labanan ang kahirapan, malnutrisyon at kagutuman.

Sinabi ni Gatchalian na nasa $3 milyong ayuda ang ibinigay ng Asian Development Bank, Japan International Cooperation Agency at French Development Agency para sa naturang programa na ipatutupad sa Hulyo.

Sinabi ni Gatchalian na nais din ng Pangulo na isama sa programa ang mga single parent, mga buntis at mga nagpapasusong ina kasunod ng pagkilos ng Department of Social Welfare and Development (DSWD) na suriin ang problema sa stunting sa bansa upang mabisang maipatupad ang First 1,000 Days Law (RA 11148) na iniakda at inisponsor ni Senador Grace Poe.

Nauna rito, ipinaliwanag ng ahensya na magbibigay ito ng "electronic benefit transfer (EBT) cards" na lalagyan ng food credits na nagkakahalaga ng P3,000 kada buwan para makabili ng piling listahan ng mga bilihin mula sa DSWD registered o accredited local retailers.

Sa kanyang panig, inihayag ni Health Secretary Teodoro Herbosa na katuwang ng DSWD sa nasabing programa na dapat na may nutritional value ang mga pagkain na ipamamahagi.

Hirit sa DOH.. Dayuhang doktor, payagang magpraktis sa 'Pinas

ni Mylene Alfonso | June 14, 2023

Hinikayat ni Senador Francis Tolentino ang Department of Health (DOH) na pag-aralan ang posibilidad na payagan ang mga dayuhang doktor na pansamantalang makapagpraktis sa Pilipinas.

Sa kanyang lingguhang programa sa radyo sa DZRH, ipinaliwanag ni Tolentino na tiyak na makikinabang ang local medical industry sakaling payagan ang mga dayuhang doktor na magsanay sa bansa hindi lamang pagdating sa pagpapalitan ng mga ideya, kundi pati na rin sa aspeto ng ‘transfer of technology.’

“Mayroon naman pong mga doktor na rehistrado sa ibang bansa na gusto mag-practice for a brief period dito sa ating bansa na espesyalista talaga doon… sandali (lang) sila rito, hindi naman para makipag-compete. Magkakaroon ito ng transfer of technology,” paliwanag ng Senador.

Ayon pa kay Tolentino, maraming foreign doctors na nagpapahiwatig na magsagawa ng medical practice sa bansa, ngunit ang kasalukuyang protective policy ang pumipigil sa kanila na gawin ito.

“Bukod nga doon sa maraming mga espesyalista, lalo 'yung mga kababayan nating nasa abroad nagpa-practice, sa Amerika, na gustong tumulong dito — hindi lang medical mission, 'yung pangmatagalan na 'yung siguro talagang may affinity sila dito sa ating bansa,” diin ni Tolentino.

Binanggit naman ni Health Secretary Teodoro Herbosa, na naging panauhin ni Tolentino sa programa, ang kanyang karanasan noong nagtrabaho siya sa Malaysia bilang visiting professor sa isang medical university kung saan ang Philippine medical license at ang kanyang akreditasyon sa Philippine Medical Association ay sapat na para makapag-practice ng medisina si Herbosa doon.

Makikipag-ugnayan umano si Herbosa sa Professional Regulations Commission (PRC) sa posibilidad na paluwagin ang kasalukuyang licensing rules upang payagan ang mga foreign doctors na pansamantalang magpraktis ng kanilang propesyon sa bansa.

P-BBM sa Araw ng Kalayaan.. Never again magpapaalipin sa dayuhan

ni Mylene Alfonso | June 13, 2023

Hindi na kailanman magpapasakop at hindi na magiging sunud-sunuran sa anumang panlabas na puwersa ang Pilipinas.

Ito ang iginiit ni Pangulong Ferdinand Marcos, Jr., sa kanyang unang Independence speech sa isinagawang pagdiriwang ng ika-125 anibersaryo ng Araw ng Kalayaan.

"The heroes of our liberation would be proud to know that we have thrown off the ‘ominous yoke of domination’; never again to be subservient to any external force that directs or determines our destiny," diin ng Pangulo sa kanyang talumpati sa Quirino Grandstand sa Maynila.

Kaugnay sa binanggit nitong Philippine Development Plan, sinabi ni Marcos na sisikapin ng gobyerno na makamit ang kalayaan mula sa gutom, kapabayaan, at takot.

Kasabay nito, nanawagan din ang Pangulo sa mga mamamayan na suportahan ang malaya at independiyenteng Republika.

Una rito, alas-8 ng umaga nang dumating ang Pangulo para sa Flag Raising at pag-aalay ng bulaklak sa bantayog ni Dr. Jose Rizal sa Rizal Park, Maynila kung saan muntik nang maudlot ang bahagi ng nasabing programa dahil sa malakas na buhos ng ulan.