Ipinamigay na school uniform at sapatos ng LGU, sablay

ni Mylene Alfonso @News | September 13, 2023

Dinagsa ng reklamo ang Makati LGU dahil sa mga umano'y palpak na school supplies na ipinamahagi sa mga estudyante.

Ayon sa mga magulang na naglahad ng kanilang saloobin sa social media, hindi na kasya sa kanilang mga anak ang mga polo, shorts at sapatos na ipinamahagi ng lokal na pamahalaan para sa pasukan.

Matatandaang sinabi ni Makati Mayor Abby Binay na "annual tradition" ang pamamahagi ng mga nasabing school supply sa mga estudyante sa Makati.

Sinabi pa nito na pati ang mga estudyante sa mga eskwelahan na sakop ng EMBO barangay na inilipat na sa hurisdiksyon ng Taguig ay makatatanggap ng mga ganitong supply upang masigurong handa sila para sa pasukan.

Ayon sa mga magulang, dapat ay may naganap na pagsusukat man lang bago nagsimula ang klase upang masigurado na magagamit ang mga nasabing damit at sapatos.

Nag-trending sa social media ang #Swap dahil sa mga magulang na naghahanap ng makakapalitan ng mga uniporme at sapatos para sa kanilang mga anak.

Presyo ng bigas napakataas — Sen. Imee.. Babangon at mag-ma-Martial Law ang tatay ko

ni Mylene Alfonso @News | September 12, 2023

Dahil sa napakataas na presyo ng bigas maging ang yumaong dating Pangulong Ferdinand Marcos, Sr. ay babangon sa kanyang libingan at magma-Martial Law.

Ito ang inihayag ni Senadora Imee Marcos, panganay na anak ng dating pangulo, na hindi makapaniwala sa nangyayaring pagtaas sa presyo ng bigas sa bansa sa kasalukuyan.

"'Wag na tayong magtanim ng palay para matigilan na ang pagdurusa ng magsasakang Pilipino — todo-import na lang tayo!" pahayag ni Imee sa kanyang mensahe sa mga mamamahayag.

"Babangon at magma-Martial Law ang tatay ko sa ginagawa nila sa bigas ngayong birthday pa niya!" wika pa ng senadora.

Nabatid na ginunita kahapon ang ika-106 na kaarawan ng yumaong pangulo sa Batac, Ilocos Norte.

Ginawa ni Imee ang reaksyon nang hingan ng komento hinggil panukala ng Department of Finance (DOF) na bawasan ng 35 porsyento ang import tariff rates sa bigas para mapababa ang presyo nito sa mga pamilihan.

Inilatag ng ahensya ang panukala matapos ipag-utos ni President Ferdinand 'Bongbong' Marcos, Jr., ang pagpataw ng price cap sa bigas sa pamamagitan ng Executive Order 39.

"What sinister forces are at work in the rice industry? First there was no apparent shortage but suddenly the price of rice skyrockets. To bring price under control, EO 39 is pushed without eco team’s knowledge much less assent," sabi ni Imee.

"Traders, retailers and the entire marketplace is in disarray as warehouses, illegal or not are raided willy-nilly. So of course, we now have to lower or remove the import tariff entirely! Haven’t we heard this story too many times for us to believe it all again?" tanong pa niya.

Samantala, inihayag naman ni Senate Minority Leader Aquilino 'Koko' Pimentel III na dapat gumawa ng maraming mga paraan bago pa man ipataw ang price cap sa bigas.

"Yes, better to reduce or eliminate tariffs first before even entertaining the idea of a price cap. Also, better to go after the hoarders and price fixers before even entertaining the idea of a price cap,” diin ni Pimentel.

Ipalabas sa merkado ang mga naka-hoard na supplies. And there is also the NFA. Better to let the NFA release into the market the amount of rice needed to stabilize the price of rice. These are just 3 measures which should have been done even before entertaining the idea of a price cap," dagdag pa niya.

GMA kay ex-P-Du30: Balik ka na sa pulitika

ni Mylene Alfonso @News | September 12, 2023

Kinumbinse ni dating Pangulo at ngayo'y House Deputy Speaker Gloria Macapagal-Arroyo si dating Pangulong Rodrigo Duterte na maging aktibong muli sa pulitika.

Ito ang inihayag ni Senador Christopher "Bong" Go matapos mag-post ng litrato sa Facebook ng pagpupulong nina Arroyo, Duterte, dating Senate President Vicente Sotto III at dating Executive Secretary Salvador Medialdea noong Sabado.

"Isang simpleng kamustahan at masayang pagkikita ang nangyari kasama ang mga pinunong naglingkod sa bayan sa iba’t ibang posisyon o kapasidad noong mga nakaraang administrasyon. Nagbalik-tanaw sila sa mga panahong nagkasama sila sa gobyerno," ani Go.

"Sa nasabing pagkikita, kinukumbinse rin ni Arroyo si Duterte na maging aktibo muli sa pulitika," saad pa ng senador.

Inimbitahan umano ni Arroyo si Duterte sa isang ‘informal meeting’ sa pamamagitan ng isa sa mga staff at nagkataon namang nasa Maynila ang dating Pangulo.

"Nagkataong magkasama kami ni Tatay Digong noon matapos ko siyang samahan sa kaniyang medical check up sa hospital, gaya ng dati kong ginagawa sa kanya," paliwanag pa ni Go.

"At dahil bihira lang naman na pumunta sa Maynila sa ngayon si dating Pangulong Duterte, sumabay na rin sa pagkikitang iyon, sa tulong ni dating executive secretary Salvador Medialdea, si dating Senate President Tito Sotto na gusto ring makumusta nang personal ang kanyang itinuturing na kaibigan na si Tatay Digong," ayon kay Go na dating aid ni Duterte.

"Sabi ko nga, magkaiba man ng pinanggalingan, iba’t iba man ang hinawakan nilang posisyon sa gobyerno, iisa lang ang kanilang hangarin — ang paglingkuran ang sambayanan,” pagtatapos ng senador.