Impeachment kay VP Sara, ‘wag madiliin — Sen. Robin

ni Mylene Alfonso @News | April 26, 2026

Photo: File / Robin Padilla at Inday Sara Duterte - FB

Dapat sumunod sa tamang proseso ang isinasagawang impeachment proceedings laban kay Bise Presidente Sara Duterte at hindi rin ito dapat minamadali.

Ayon kay Senador Robinhood Padilla, wala dapat nilalaktawang hakbang sa proseso at dapat itong dumaan sa plenaryo ng Mababang Kapulungan at hindi ito dapat idiretso sa Senado. 

“Hindi puwedeng laktawan ang proseso. Kailangan dumaan sa tamang proseso. Paulit-ulit na sinabi ng Korte Suprema ang kahalagahan ng due process. Kapag nilundagan natin ito, wala na namang pupuntahan kundi sayang sa oras at pera ng taumbayan,” wika ng senador.

Kinuwestiyon din ni Padilla kung ang impeachment ba ang tamang sagot sa kinahaharap na suliranin ng bansa.

“Ang tanong—iyan ba talaga ang solusyon sa problema ng bayan? Bakit hindi natin pag-usapan ang sahod ng tao? Halimbawa ang minimum wage. ‘Yan ang tunay na problema ng mamamayan,” saad pa ng senador. 

Kaugnay nito, sinabi ni Padilla na tama lamang ang ginawa ni dating House Speaker Martin Romualdez na magsalita sa isang video upang ipagtanggol ang kanyang sarili. 

“Sa Pilipinas kasi, nauuna ang trial by publicity. Kapag nanahimik ka, magmumukhang ikaw ang may kasalanan. Sa nakita ko, ipinaliwanag lang niya ang proseso ng budget. Wala naman akong nakita na ipinahamak niya ang sarili niya,” ani Padilla. 

“Siguro naramdaman niya na kailangan na niyang magsalita. Kung hindi siya kikilos, baka siya ang tuluyang malubog,” paliwanag ng senador.

Nang tanungin sa hindi pa rin namamatay na usapin kung siya ang tatakbong bise-presidente ni Sara Duterte, sinabi ni Padilla na maraming tao ang magagalit sa kanya dahil magiging mas mahigpit pa siya kaysa kay dating Pangulong Rodrigo Duterte.

“Hindi ako gugustuhin ng marami na maging vice president. Dahil kung ako ang tatanungin, mas magiging mahigpit ako sa kriminalidad, baka mas higpit pa kaysa kay Pangulong Duterte.”

Ayon pa kay Padilla, masyado nang marami ang masasamang tao at ito rin ang dahilan kaya’t mahigpit niyang isinusulong ang death penalty. 

Nanawagan ang senador para sa mas malalim na pagtuon sa tunay na problema ng bansa kaysa sa labis na pulitikal na bangayan.

“Parang teleserye na ang pulitika ngayon. Maraming scriptwriter, maraming artista. Pero sana huwag nating kalimutan ang tunay na problema ng bayan,” pagtatapos ni Padilla.

DOJ Sec., nagpunta sa Prague... Zaldy Co, 'di pa nahuhuli

ni Mylene Alfonso @News | April 26, 2026

Photo: File / Zaldy Co

Posibleng wala na sa hurisdiksyon ng Czech Republic si dating Ako Bicol Partylist Rep. Zaldy Co.

Ito ang reaksyon ni Justice Secretary Fredderick Vida sa mga mamamahayag sa Prague nang tanungin kung ano ang garantiya ng panig ng Pilipinas na mananatili si Co sa hurisdiksyon ng Czech Republic.

“There's no such guarantee. We need to respect their laws,” wika ni Vida.

Naniniwala si Vida na posibleng nakaalis na si Co sa Czech Republic.

Nauna rito, isinailalim si Co sa immigration detention ng mga Czech authorities.

Nahaharap si Co sa kasong corruption at malversation na may kinalaman sa flood control scandal.

Inaayos na umano ni Vida ang mga pulong sa mga opisyal ng Czech, partikular sa kanilang mga counterpart sa Ministry of Justice, upang beripikahin ang impormasyon ng mga awtoridad ng Pilipinas tungkol sa pagkakadetine ni Co at upang alamin ang mga paraan kung paano siya maaaring maiuwi sa bansa.

“Ina-arrange pa. Pina-finalize pa,” wika pa ni Vida habang nagsusumikap din ang Philippine embassy na maisaayos ang nabanggit na meeting.

Gayunman, irerespeto aniya ng Pilipinas ang mga proseso ng Czech Republic at ng European Union sa paghawak ng kaso.

Nilinaw din ni DOJ spokesperson Polo Martinez na hindi teknikal na inaresto si Co ng mga awtoridad ng Czech, ngunit nalimitahan ang kanyang kalayaan dahil sa posibleng paglabag sa mga regulasyon sa imigrasyon.

“For analogy, it’s similar to a situation in the airport where the person arrives and immigration denies entry or excludes the person. Technically, not arrested but there is a deprivation of liberty to a certain degree,” punto ni Martinez.

PBBM at FL Liza, biyaheng Japan

ni Mylene Alfonso @News | April 25, 2026

Photo: File / Liza Marcos FB

Naktakdang magsagawa ng state visit si Ferdinand Marcos, Jr. sa Japan mula Mayo 26 hanggang 29, 2026, kasama si First Lady Liza Araneta-Marcos. 

Batay sa anunsyong inilabas ng Presidential Communications Office, isasagawa ang nasabing pagbisita bilang tugon sa imbitasyon ng pamahalaan ng Japan. 

Makikipagpulong ang Pangulo kay Prime Minister Takaichi Sanae, upang talakayin ang ugnayan ng Pilipinas at Japan, pati na ang isyu sa enerhiya, pagkain, at maritime security.