Ibinulgar ng 18 ex-Marines... Remulla, inaming naka-meeting ang ICC sa kanyang bahay

ni Madel Moratillo @News | March 3, 2025

Photo File: Boying Remulla / FB

Inamin ni Ombudsman Jesus Crispin Remulla na nakapulong niya sina dating Sen. Antonio Trillanes IV, Gen. Nicolas Torre III at dalawang ICC investigators sa kanyang bahay sa Makati noong nakaraang taon, tulad ng binanggit sa joint affidavit ng 18 ex-Marines.  

Nangyari umano ito matapos maaresto si dating Pangulong Rodrigo Duterte at nu’ng siya ay kalihim pa ng Department of Justice (DOJ).

Ang nasabing meeting ay para umano sa proteksyon ng mga testigong Pilipino sa crimes against humanity case laban kay dating Pangulong Duterte.

Nais aniya nila sa DOJ na masiguro ang kaligtasan ng mga Pilipinong testigo.

“Since we're in the DOJ, kinakailangan gawin namin 'yun. Mga Pilipino kasi mga testigong 'to.

This happened maybe less than a year ago,” pahayag ni Remulla.

Sa joint affidavit na isinumite ni Atty. Levi Baligod, abogado ng 18 dating Marines, sa Ombudsman, nakasaad na nakipagpulong umano si Remulla sa ICC personnel noong kalihim pa siya ng DOJ.

“Kailangan protektahan natin ang ating mga testigo pero ang mas mahalaga d'yan 'yung allegations na ginawa nila na iba. Kasi kung 18 sila na nandoon na magkakasama ng dalawang taon na walang patid, na lahat ng pangyayari nakita nila, 'yun ang ating gustong malaman,” pahayag ni Remulla.

Sabi ni Remulla, gusto niyang magkaroon ng kopya ng affidavit ng bawat isa sa 18 dating Marines upang makasiguro na may personal knowledge sila sa kanilang mga alegasyon. 

7 senators, 26 cong., tumanggap daw ng kickback... AFFIDAVIT NG 18 EX-MARINES, NASA OMBUDSMAN NA

ni Madel Moratillo @News | February 27, 2025

Photo File: Circulated

Isinumite sa Office of the Ombudsman ang signed affidavit ng mga dati umanong Marines na una nang humarap sa press conference at nagsiwalat ng nalalaman umano nila sa maleta delivery scheme. 

Sabi ni Atty Levi Baligod, abogado ng 18 Marines, kabilang sa pinangalanan sa affidavit ay pitong senators, 26 House members, at iba pang opisyal ng gobyerno mula sa Bureau of Corrections, Department of Agriculture, at iba pa. 

“Para magkaroon ng prima facie proof na may offense na na-commit at ang mga napangalanan doon ay maaaring guilty sa mga offenses na ito,” ani Baligod. 

Sa isang pahayag, sinabi ng Ombudsman natanggap na nila ang Joint Affidavit. 

Batay sa rules and procedures, ang nasabing dokumento ay sasailalim umano sa standard evaluation process. Kabilang dito ang pagdetermina sa sufficiency in form and substance, jurisdiction, at kung may prima facie basis para ipagpatuloy ang proseso. 

Binigyang-diin ng Ombudsman na hindi sila dapat magamit bilang political arena. Nananatili umanong independent constitutional body ang Ombudsman.

P20 dagdag-sahod sa Davao, aprub

ni Madel Moratillo @News | February 26, 2025

Photo File

Inaprubahan na ng Regional Tripartite Wages and Productivity Board ang dagdag na 20 hanggang 30 pesos sa arawang sahod ng minimum wage earners sa Davao Region. 

Sa anunsyo ng Department of Labor and Employment (DOLE), ang wage hike ay ipapatupad sa 2 tranche. Ang una ay sa Marso 13 at sa Setyembre 1 naman ang ikalawa. 

Sa oras na maging epektibo, ang daily minimum wage na para sa mga nasa sektor ng agrikultura ay magiging P525 mula sa dating P505 habang mula naman sa P510 ay magiging P540 sa mga nasa non-agriculture sector. Dahil dito, ang buwanang sweldo ay nasa P13,693.75 at P14,085 na. 

Sabi ng DOLE, nasa 66,772 minimum wage earners sa rehiyon ang makikinabang dito. 

Kasabay nito, inaprubahan din ang P500 dagdag sa buwanang sahod ng mga kasambahay para sa nasa chartered cities at first-class municipalities sa Davao Region, at P1,500 naman sa nasa ibang munisipalidad. Dahil dito, magiging P6,500 na ang kanilang buwanang sahod.

Tinatayang nasa 64,111 domestic workers sa rehiyon ang makikinabang dito. 

Exempted naman sa wage hike ang mga negosyong wala pang 10 ang manggagawa at naapektuhan ng kalamidad. Pero dapat mag-aplay muna sila ng exemption sa DOLE hanggang sa Mayo 11.