Hirap at sakripisyo ng nurses, ‘wag kalimutan para lang sa bakuna!

ni Leonida Bonifacio Sison - @Boses | February 26, 2021

Pinoy nurses palit bakuna.

Ito ang alok ng Department of Labor and Employment (DOLE) sa United Kingdom at Germany upang makakuha ng COVID-19 vaccine na gagamitin para sa mga Overseas Filipino Workers (OFWs) na na-repatriate at made-deploy sa ibang bansa.

Sa proposal ng DOLE, hinihiling ng UK at Germany na tanggalin ang cap sa pagtatalaga ng health workers na nasa 5,000 at para mangyari ito, hiniling sa nasabing mga bansa na magpadala ng mga bakuna para sa Pilipinas.

Ngunit sa halip na suportahan, agad na umalma ang ilang grupo ng nurses at ilang mambabatas.

Giit ng grupo ng nurse, masama ang kanilang loob dahil tila naging kalakal o barter sila para sa bakuna. Dagdag pa ng isang mambabatas, hindi dapat ipinagpapalit ang mga tao para sa produkto.

Samantala, nilinaw ng Department of Health (DOH) na hindi sila kinonsulta ng DOLE sa naturang panukala at walang pormal na impormasyon na ipinarating sa kanila.

Bagama’t kailangang-kailangan ng bansa ang bakuna, ang tanong, kailangan ba talagang umabot sa punto na ipagpalit natin ang ating health workers para rito?

At isa pa, kapag may COVID-19 vaccine na ba, hindi na natin kailangan ng health workers? Ano’ng mangyayari sa ating health workforce gayung sa atin pa lang, alam na nating kulang ang mga ito?

Nakadidismaya dahil pilit silang nagbibigay-serbisyo sa bansa sa kabila ng naantalang sahod at benepisyo, pero tayo mismo ang nagtutulak sa kanila paalis.

Paalala lang ho, todo-kayod at buwis-buhay ang ating nurses mula nang pumutok ang pandemya, kaya siguro naman, sapat na dahilan ito para alagaan natin sila at hindi ipagtabuyan.

Samantala, panawagan natin sa mga kinauukulan, gawin ho ninyo ang inyong trabaho para maiwasan ang ganitong mga eksena.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pag-alis ng swab test sa mga tourists o traveler, pinalagan!

ni Leonida Bonifacio Sison - @Boses | February 25, 2021

Sa kabila ng banta ng COVID-19 at pagdami ng kaso, inilabas ng provincial government ng Cebu noong Lunes ang utos na hindi na kailangan ang negatibong resulta sa swab test sa mga turistang papasok sa probinsiya.

Dahil dito, nagpahayag ng pagkabahala ang mga residente, gayundin ang mga eksperto.

Giit ng OCTA Research Group, isang malaking problema kung hindi magpapakita ng negatibong COVID-19 test result ang mga turistang papasok sa isang probinsiya o siyudad dahil mahalaga ito upang matukoy kung sino ang mayroong sakit. Binigyang-diin din nito na kailangang magpatuloy ang pagpapalakas ng pamahalaan sa COVID-19 testing efforts at health system capacity para malaman ng bawat mamamayan ang kailangang gawin para maiwasan ang pagkahawa sa virus.

Matatandaang kamakailan, nais padaliin ng Department of the Interior and Local Government (DILG) at Department of Tourism (DOT) ang pagbiyahe ng mga turista dahil maraming nagsasabing nakalilito ang standard requirement ng mga probinsiya.

Sa totoo lang, dapat manatili na lang sa iisang standard requirement bilang pag-iingat dahil kahit gustuhin nating mapalago muli ang turismo, hindi naman dapat mailagay sa panganib ang kalusugan ng mga residente at turista.

At ngayong patuloy pa rin ang pagtaas ng COVID-19 cases sa bansa, kailangang magdoble-ingat ang bawat isa, kaya dapat ipagpatuloy ang pagpapatupad ng requirement na masuri sa virus ang mga turistang papasok sa isang lugar.

Panawagan natin sa mga kinauukulan, pag-aralang mabuti kung kailangan ba talaga itong ipatupad dahil baka ang ending, dayuhin nga ang probinsiya, sangkatutak na kaso naman ang maitatala.

Sa panahon ngayon, dapat lang na mag-ingat dahil nasa paligid pa rin ang virus at hindi natin alam kung hanggang kailan ito mananatili.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Iba’t ibang standard requirement ng LGUs, ikinalito ng mga nais bumiyahe

ni Leonida Bonifacio Sison - @Boses | February 24, 2021

Bilang tulong sa sektor ng turismo na isa sa mga labis na naapektuhan ng pademya, unti-unti nang binuksan sa publiko ang ilang tourist destination sa bansa.

Pero siyempre, may mga panuntunang dapat sundin nang sa gayun ay maiwasaan ang pagtaas ng COVID-19 cases sa mga probinsiya, na pinagkasunduan naman ng mga lokal na pamahalaan at ahensiya ng gobyerno.

‘Yun nga lang, iba-iba ang mga standard requirement ng bawat local government units (LGUs), bagay na ikinalito ng 8 sa 10 Pilipino, base sa survey ng Department of Tourism (DOT).

Kaugnay nito, nais ng DOT at Department of the Interior and Local Government (DILG) na mas padaliin ang pagbiyahe at gawing standard ang mga requirement ng mga lokal na pamahalaan sa mga turista.

Matatandaang mayroong mga lugar na tumatanggap ng turista kung makapagpapakita ng negatibong resulta ng COVID-19 antigen test, pero mayroon ding nanghihingi ng RT-PCR test. Gayundin, may ilang lugar na tumatanggap ng mga batang turista, habang ang iba naman ay hindi.

Dahil dito, irerekomenda ng DOT na gawing standard ang test bago makabiyahe ang isang tao at depende na sa LGU kung ano’ng klase ng test ang hihingin.

Kung nais nating padaliin ang pagbiyahe ng mga turista, dapat lang nating matiyak na hindi ito masasamantala. Halimbawa na lang ng pamemeke ng test result para makabiyahe, alamin natin kung paano ito mapipigilan sakaling maging mas madali ang pagbiyahe.

Baka kasi layunin nating maiwasan ang kalituhan ng ating mga kababayan, pero baka ito pa pala ang maging dahilan para mas dumami ang mga mananamantala. At oras na may mahuling lumabag, dapat silang masampolan para hindi tularan.

Samantala, malamang ay kailangan ng mas masusing pag-aaral upang matiyak na magiging tamang hakbang ito para maiwasan ang kalituhan, gayundin upang patuloy na makabangon ang sektor ng turismo.

Kaya ang ating panawagan sa mga kinauukulan, bagama’t nais nating mag-ingat para sa mga ating nasasakupan, baka puwede tayong makiisa para naman sa mga nais bumiyahe.

Hindi man madali ito para sa lahat, ‘wag nating kalimutang isaalang-alang ang kaligtasan ng bawat isa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com