Magsasama sa MMFF entry... VIC AT VICE, NAGYAKAPAN NANG MAGKITA

ni Janiz Navida @Showbiz Special | July 6, 2026

Photo: File

Opisyal nang kumpirmado ang pinakahihintay na pagsasama ng dalawang pinakamalalaking comedy icons ng bansa, ang Unkabogable Star na si Vice Ganda at si Bossing Vic Sotto sa kauna-unahang pagkakataon sa big screen sa pelikulang The Greatest Showdown (TGS).

Kahapon, nasaksihan ang unang pagkikita nina Vice at Bossing Vic sa Cubao kung saan masaya pa silang nagyakapan.

Ang pelikula ay ididirek ng multi-awarded filmmaker na si Jun Robles Lana at itinuturing na isa sa pinakamalalaking collaborations sa Philippine entertainment dahil pinagsama nito ang ilan sa pinakamalalaking production companies sa bansa: ABS-CBN Studios, Star Cinema, The IdeaFirst Company, M-Zet Productions, at APT Entertainment.

Matagal nang usap-usapan ang posibilidad na magsama sa isang proyekto sina Vice at Vic, lalo na’t pareho silang kinikilalang ‘box-office kings’ ng kani-kanilang henerasyon sa Metro Manila Film Festival (MMFF). Ngayon, tuluyan nang matutupad ang dream collaboration na matagal nang hinihiling ng maraming fans.

Mas lalong naging exciting ang proyekto matapos ang naging palitan nila ng pagbati sa kani-kanilang noontime shows noong nakaraan. Sa episode ng It’s Showtime (IS) noong Sabado, ibinahagi ni Vice na nagkausap na sila ni Vic matapos itong bumati sa kanya sa Eat…Bulaga! (EB!).

“Binati ko si Bossing kahapon. Binati n’ya rin ako sa Eat Bulaga. Sabi n’ya sa akin, mag-uusap daw kami nang masinsinan,” ani Vice. 

Sabay biro pa niya, “Bossing, pasensiya na, busy ako today.”

Sa pagsasanib-puwersa ng dalawang comedy legends at ng powerhouse production companies, inaasahang magiging isa ang The Greatest Showdown sa pinakamalaking local film events sa oras na ipalabas ito. 

Bagama’t hindi pa inilalabas ang buong detalye ng kuwento at iba pang cast members, mataas na agad ang excitement ng publiko para sa makasaysayang collaboration na ito.

---

Aktor, tinanong kung pakakasalan siya…

VIDEO NG LAMBINGAN NINA JERIC AT 51-ANYOS NA PRODU, KUMALAT

PINAGPIYESTAHAN at umani ng batikos ang nag-viral kamakailan sa TikTok na video reels ng Kapuso actor na si Jeric Gonzales habang nakaupong kumakanta sa videoke at niyakap ng isang may-edad nang babae, na nakilalang ang producer niya sa pelikulang Depresyon na si Ms. Sucil Nipa ng A & S Productions.

Sa naturang video, makikitang super close sila ng lady producer, kung saan mula sa likuran ni Jeric, ipinatong pa ni Ms. Sucil ang mga kamay sa balikat ng aktor at tipong niyakap ito at idinikit ang mukha sa pisngi ni Jeric.

Nag-viral ang video at pinag-isipang si Ms. Sucil na ang kapalit ni Rabiya Mateo sa puso ni Jeric. 

Umani ito ng negative comments dahil malaki ang agwat ni Ms. Sucil, na magpi-51 yrs. old na, kay Jeric na 33-anyos pa lang.

Sa pamamagitan ng common friend naming si Rein Escaño, nahingi namin ang paliwanag ng lady producer tungkol sa nag-viral na video.

Inamin ni Ms. Sucil na close sila ni Jeric dahil may ginagawa nga itong pelikula ngayon sa kanyang produksiyon, ang Depresyon. At bilang producer, mahal naman daw talaga niya ang mga artista niya. Malambing din daw siya sa mga ito, pero binigyan daw ng ibang kahulugan ng mga taong hindi sila kilala nang personal.

Paliwanag pa niya, kuha ang video nang minsang magpunta si Jeric du’n sa pawnshop na pag-aari niya kung saan habang nagkakatuwaan nga raw sila ng ilang kasama, dumating ito at nakipag-inuman-videoke na sa kanila.

Aniya pa, ipinagprodyus niya ng movie si Jeric dahil naniniwala siyang magaling itong aktor at mabait na bata kaya binigyan niya ng chance para magka-project.

Ganu’n din naman daw si Ms. Sucil sa kanyang ibang talents like Jeric Raval at Jay Manalo, pero bakit daw kay Jeric Gonzales lang siya inili-link ngayon?

Aminado ang lady producer na naalarma talaga siya nang kumalat ang video at hindi raw niya alam kung sino ang naglabas o nagkalat nito. Nagalit nga raw ang pamilya niya dahil dating tahimik ang buhay nila at private person sila, pero ngayon ay nakakaladkad sa intriga. 

Mga propesyonal pa naman daw ang mga anak ng lady producer na isa ring successful businesswoman.

Pero medyo na-trauma man, willing pa rin naman daw si Ms. Sucil na magprodyus pa uli ng mga pelikula para makatulong sa movie industry at sa mga walang trabahong artista.

At kahit naiintriga, hindi naman daw nagbago ang friendship nina Ms. Sucil at Jeric at tuloy pa rin ang movie ng aktor na Depresyon.

Samantala, matapos naming ilabas ang aming video interview kay Ms. Sucil sa Facebook reels, may nagpadala sa amin ng video clip through FB messenger kung saan sa same videoke bonding ng lady produ at ni Jeric ay maririnig na tinanong ni Ms. Sucil ang aktor ng “Pakakasalan mo ba ako?” na sinagot ni Jeric ng “Darating tayo d'yan.”

Habang isinusulat namin ito ay hindi pa namin nakukuha uli ang pahayag ni Ms. Sucil Nipa tungkol sa bagong video na ipinadala sa amin.

Co-host sa EB!, may sarili nang pera… KRIS, PROUD NA BINIGYAN NI BIMBY NG P20K!

ni Janiz Navida @Showbiz Special | July 4, 2026

Photo: File / Kris at Bimby sa Eat Bulaga

Proud na proud si Kris Aquino sa kanyang bunsong anak na si Bimby Aquino Yap, hindi lang dahil special guest co-host ito sa Eat… Bulaga! kundi dahil din sa mga ipinakikitang magagandang ugali ni Bimb.

Sa Facebook post ng aming kaibigang si Tito Dindo Balares, dating entertainment editor ng Balita, ikinuwento niya ang ilang bahagi ng usapan nila ni Kris.

Post ni Tito Dindo, “The other day, Wednesday, nag-report pa rin si Bimb sa work as guest co-host sa Eat… Bulaga kahit masakit ang tiyan.”

Kuwento raw ni Kris kay Tito Dindo, "He had an upset tummy but never showed his coworkers." 

Napaka-professional nga naman ni Bimby, ‘di ba?

Pero ang higit na ikinatuwa at ikina-proud ni Kris bilang ina ay nang bigyan daw siya ng pera ni Bimby sa kanyang Gcash.

Dagdag na kuwento raw ni Kris, "He gave me ₱20K for my GCash so I could buy clothes for his Kuya from Manfinity Plus Size (from those unaware that’s a brand from SHEIN for larger men)." 

At papuri pa ng Queen of All Media sa kanyang bunso, "Sobrang responsible, he knows I want to remodel our home in Alto (our compound in Tarlac) and get him and his Kuya a larger SUV.

"That’s our family of 3, we love each other and share expenses when we have a larger goal." 

Mukhang sumuweldo na si Bimby sa kanyang hosting job sa Eat… Bulaga! kaya may P20K na pa-Gcash kay Kris, ha?

Nakakatuwa at nakakabilib naman talaga si Bimby, napakamapagmahal na anak. 

---

MULING magniningning ang Ceremonial Hall ng Marriott Grand Ballroom sa Pasay City sa Newport World Resorts ngayong Linggo para sa ika-9 na edisyon ng Entertainment Editors’ Choice, mas kilala bilang The Eddys, ang magsisimula ng local film awards season, na muling magbibigay-parangal sa mga pelikula at artistang nagpakita ng husay sa pagbuo ng pelikulang Pilipino sa nakalipas na taon. 

Inorganisa ng Society of Philippine Entertainment Editors (SPEEd), kikilalanin ng The Eddys ang mga natatanging tagumpay sa paggawa ng pelikulang Pilipino sa 14 na kategoryang maglalaban-laban, na nagbibigay-pugay sa mga gawang nakatulong sa paghubog at pagpapaangat ng lokal na cinematic landscape sa pamamagitan ng makapangyarihang pagkukuwento, matapang na artistikong pananaw, at teknikal na kahusayan. 

Pitong natatangi at mahuhusay na pelikulang nagbigay ng makabuluhang pananaw sa karanasan ng mga Pilipino ang magtatagisan para sa titulong Best Picture: Bar Boys: After School, Eraserheads: Combo on the Run, I’m Perfect, Journeyman, Quezon, Sunshine at UnMarry.

Bibigyang-pugay din ang mga natatanging indibidwal na nag-iwan ng malalim na marka sa larangan ng entertainment at sa lipunan. 

Nangunguna sa mga tatanggap ng espesyal na parangal ngayong taon ang Box Office Hero na si Vice Ganda para sa comedy-drama ng Star Cinema na Call Me Mother; ang beteranong aktres na si Maricel Soriano at ang cast ng Meet, Greet, & Bye; ang tambalang Kim Chiu at Paulo Avelino para sa romantic comedy na My Love Will Make You Disappear; at si Richard Gutierrez para sa pangunguna sa horror entry ng Regal Entertainment na Shake, Rattle & Roll: Evil Origins.

Igagawad din ang tatlong espesyal na pagkilala. Ang Isah V. Red Award ay kumikilala sa mga indibidwal na ang mga gawain ay nag-aangat sa antas ng pamumuhay ng mga komunidad sa pamamagitan ng makabuluhang paglilingkod. Ang mga tatanggap nito ngayong taon ay ang corporate leader at philanthropist na si Chaye Cabal Revilla at ang aktor na si Donny Pangilinan.

Ang Joe Quirino Award ay mapupunta sa direktor at songwriter na si Joven Tan, na ang career journey mula sa entertainment journalism hanggang sa paggawa ng pelikula, ay nakagawa ng higit sa isang dosenang pelikula.

Ang Manny Pichel Award ay ibibigay sa television reporter na si Lhar Santiago para sa kanyang mga dekada nang kontribusyon sa entertainment journalism. 

Hosted by Concert Queen Pops Fernandez at television host and broadcaster Kim Atienza, ang star-studded ceremony ay idinirehe ni Calvin Neria. 

Magbubukas ang gabi sa isang espesyal na production number mula kina Fred Moser at Kanata ng Pinoy Big Brother, kasama ang cast ng advocacy drama na I’m Perfect. 

Ipapakita ng AKTOR PH chairman at founding president na si Dingdong Dantes ang mga patuloy na inisyatiba na binuo sa pakikipagtulungan sa SPEEd at Unilab. 

Isang espesyal na pagtatanghal din ang ihahatid ng up-and-coming young singer-songwriter na si Isha Ponti, habang ang mang-aawit na si Jamie Rivera ay maghahatid ng emosyonal na song number para sa posthumous tribute segment, isang matinding bahagi ng programa na inaasahang magdadala ng panandaliang katahimikan sa gabi.

Magsasara ang seremonya sa pagtatanghal ni Andrea Gutierrez at ng singer-songwriter na si David Young.

Inorganisa ng SPEEd, ang The Eddys ay nananatiling isa sa mga pinakarespetadong award-giving bodies sa bansa na nakatuon sa pagkilala sa kahusayan sa paggawa ng pelikulang Pilipino.

Ang 9th Entertainment Editors' Choice ay nabuo sa kolaborasyon ng SPEEd, Newport World Resorts, PlayTime Entertainment, at Echo Jham Productions, kasama ang Gold Sponsors Globe Telecom at Unilab Inc.; Silver Sponsors SoundCheck Inc. at Puregold CinePanalo Film Festival; at Major Sponsors Luxent Hotel, Luxxe White, Beautéderm Corporation, Isha Ponti, at PlayaLolita Beach Resort Hotel and Restaurant.

Ang live streaming ng 9th Eddys ay opisyal na mapapanood sa Facebook page ng Entertainment Editors’ Choice at YouTube channel nito, na may sabay-sabay na broadcast sa mga nangungunang media platforms.

Kahit mag-asawa na… DINGDONG, UMAMING MAY ITINATAGO PA RIN SILA NI MARIAN SA ISA’T ISA

ni Janiz Navida @Showbiz Special | July 2, 2026

Photo: File / Dingdong Dantes - Interview

Opisyal nang naganap ang contract signing kahapon ng grupong Aktor PH, Unilab at Society of Philippine Entertainment Editors (SPEEd) para sa collab project na health and wellness program para sa mga miyembro ng grupong pinamumunuan nina Dingdong Dantes (as chairman) at Iza Calzado (as president).

Mabilis lang ang naging takbo ng programa kung saan present din sina Ms. Claire Papa (Unilab’s External Affairs & Social Partnerships Head) at Ms. Tessa Mauricio Arriola (SPEEd president) para sa contract signing.

Sa kanyang speech, sinabi ng Aktor PH chairman na si Dingdong na nang itayo nila ang grupo 6 yrs. ago, ang layunin nila ay “To create a community of empowered actors.”

Dagdag nitong nasa isip daw nila dati nang itayo ang grupo, “Paano ba magiging empowered ang isang aktor? Ano bang klase ang mga miyembro na gusto nating maimbitahan? Ano bang gusto nating maging resulta ng pagiging miyembro nila sa atin?”

Hanggang sa nag-come up raw sila sa idea na ang gusto nilang maging resulta ng pagiging member ng Aktor PH ay “nation builder”.

“More importantly, ang pangarap sana namin sa isang ‘Aktor’ ay siya ay maging protector of the community,” dagdag pa ni Dingdong. 

Pero paano raw nila magagawa ‘yun kung hindi muna nila tututukan ang welfare at kalusugan ng kanilang mga miyembro?

Kaya nang tumawag daw sa kanya si SPEEd Pres. Tessa para aluking mag-collab ang SPEEd at Aktor PH para sa “TAKING CARE OF OUR OWN” program na ang layunin ay unahin ang kapakanan ng mga kasamahan sa industriya, natuwa si Dingdong sa idea at agad na sumang-ayon.

At malaking bagay din siyempre ang suporta ng Unilab na nangakong magbibigay ng easier access para makabili ng mas murang gamot ang mga members ng Aktor PH para sa kanilang maintenance medicines.

Kaya naman good news tiyak ito sa nasa 400 members ng Aktor PH na makikinabang sa naturang programa.

Samantala, nang makapanayam namin si Dingdong after ng contract signing, nakumusta sa kanya ng ilang SPEEd officers ang naging shooting nila ng misis na si Marian Rivera ng kanilang MMFF 2026 entry na Remember sa Quebec, Canada.

Aminado naman si Dong na masayang-masaya siya na super nag-bonding sila ni Marian at parang ito na ‘yung naging ‘alone time’ nilang dalawa dahil na-solo nga nila ang isa’t isa after shooting.

Naikuwento rin ni Dingdong na nagulat siya sa ipinakitang kakaibang level of acting ni Marian.

Meron nga raw silang isang eksena na natulala siya rito at nawala siya sa sarili kaya na-cut pa siya ng kanilang direktor.

Hindi naman daw niya tinanong si Marian kung ano’ng ‘hugot’ nito sa galing na ipinakita sa acting bilang respeto raw sa misis. 

So, kahit pala mag-asawa na sila, may mga itinatago pa rin sila sa isa’t isa, ‘no? 

Paliwanag ni Dingdong, “Siyempre, ayoko namang basagin ‘yung trip niya na ‘Ano ba ‘yung ginawa mo? Ano ‘yung proseso mo?’ Siyempre, inire-respect ko ‘yung ganu’ng side niya kung paano niya nabubuo ‘yung character niya.”

Well, abangan na lang kung ano’ng eksena ang ikinatulala ni Dingdong sa akting ni Marian sa Remember.

---

NAGSANIB-PUWERSA ang Society of Philippine Entertainment Editors (SPEEd) at digital entertainment company na PlayTime Entertainment para sa nalalapit na 9th Entertainment Editors' Choice.

Ang prestihiyosong taunang parangal sa pelikula na The 9th EDDYS ay itatanghal ng PlayTime Entertainment sa ilalim ng bagong nilagdaang kasunduan. 

Nagsara ang partnership sa isang contract signing ceremony na ginanap sa PlayTime Entertainment noong Hunyo 22. Pinag-isa ng kolaborasyon ang grupo ng mga entertainment editors ng bansa at ang digital entertainment platform para ipagdiwang ang pinakamagagandang tagumpay sa Philippine cinema. 

Dumating sa ginanap na contract signing ang mga representatives ng parehong panig.

Para sa PlayTimeEntertainment, present ang president nitong si Roy Alcid at ang company spokesperson na si Adela Mae Marshall. Dumalo naman para sa SPEEd ang pangulo nitong si Tessa Mauricio Arriola ng The Manila Times, kasama ang SPEEd vice-president for internal affairs na si Maricris Valdez. 

"Lubos na ikinararangal ng PlayTime Entertainment na makipagtulungan sa SPEEd na bibigyang-parangal ang mga mahuhusay at natatanging talento ng industriya ng pelikula sa Pilipinas at sumasalamin sa aming pangako sa pagsuporta sa mga lokal na sining, at kami ay nasasabik na tumulong sa pagdala ng hindi malilimutang edisyon ng The EDDYS sa mga Pilipinong manonood," pagbabahagi ni Marshall. 

"Natutuwa kaming tanggapin ang PlayTime Entertainment bilang aming opisyal na tagapagtanghal para sa mga parangal ngayong taon, dahil ang kanilang pananaw ay naaayon sa adhikain ng SPEEd na kilalanin ang pambihirang paggawa ng pelikulang Pilipino. Sa kanilang suporta, ang 9th EDDYS ay inaasahang mas magniningning sa pagbibigay ng spotlight sa pinakamahuhusay na kontribusyon sa ating pambansang sinehan," dagdag ni Mauricio.

Ipinagpapatuloy ng EDDYS ang tradisyon nito sa pagpaparangal sa craftsmanship, dedikasyon, at artistikong hilig ng mga lokal na aktor, filmmaker, at behind-the-scenes creatives na ilabas ang kanilang lubos na galing sa larangan ng Philippine cinema.