ni Janiz Navida @Showbiz Special | October 8, 2025
Photo: FB Jericho Rosales Official_
First time ni Jericho Rosales na gumanap na presidente ng Pilipinas sa pelikulang Quezon ng TBA Studios, kaya pag-amin niya, nang ialok pa lang sa kanya ni Direk Jerrold Tarog ang role, nag-yes na agad siya kahit ‘di pa nababasa ang script.
Kakaibang challenge at karangalan nga naman sa buhay-artista ni Echo – na mas unang nakilala sa romance-drama series at movies – ang gumanap na pangulo ng Pilipinas na magiging parte na ng ating history.
At pag-amin nga ni Echo, kung nu’ng nag-aaral pa siya ay bored na bored at tamad na tamad siya sa kanyang History class dahil wala siyang pakialam dito, nagbago ang kanyang pananaw nang gawin niya ang Quezon movie.
Dito niya naintindihan ang kahalagahan ng history sa buhay natin at sa pulitika sa bansa, lalo na sa mga nangyayaring isyu ngayon ng korupsiyon.
Natanong nga namin si Echo na after playing the role of former Manuel Luis Quezon sa Quezon movie, kung siya ang pangulo ng ‘Pinas ngayon, paano niya kaya sosolusyunan ang korupsiyon?
Nagpakatotoo at diretsahan namang inamin ni Jericho na hindi talaga madaling solusyunan ang problema sa korupsiyon sa bansa at hindi ito kakayanin ng isang tao lang, kahit ng pangulo pang tulad ni Pres. Bongbong Marcos, dahil ang pagbabago ay dapat na ‘collective’ at magsimula rin sa madlang people.
Natanong nga rin siya kung may interes ba siyang pasukin din ang pulitika tulad ng ibang co-actors niya, at nagpakatotoo rin si Echo sa pag-aming wala siyang karanasan at kaalaman para maging pulitiko.
Tanggap niya na ang mundo ng showbiz talaga na nagbigay sa kanya ng pangalan at kasikatan ang dapat niyang kalagyan dahil nandito ang puso niya at dito siya nababagay.
Samantala, hindi hadlang ang nabaling buto sa daliri ni Echo – na naipit pala sa pintuan ng kotse — para dumalo siya sa mediacon kahapon ng Quezon movie na ginanap sa Manila Hotel.
Katwiran niya, nakakalakad pa naman siya at ‘yun nga, propesyunal siyang humarap sa entertainment media sa ginanap na mediacon, although hindi na namin siya naka-one-on-one interview after ng mediacon dahil umalis na agad si Echo.
Ang hiling lang niya sa kanyang mga fans at mga kababayan natin, suportahan at panoorin ang Quezon, lalo na ang mga estudyante, dahil napakaimportanteng malaman ang naging buhay at ambag nito sa kasaysayan ng ating bansa.
Showing na sa mga sinehan ang Quezon mula sa TBA Studios sa October 15 mula sa direksiyon ni Jerrold Tarog.
Ang dami ring supporting cast ng movie na talagang pinaghandaan at ginastusan ng TBA Studios tulad ng mga naunang pelikula nilang Heneral Luna (2015) at Goyo: Ang Batang Heneral (2018).Kasama sa mga bumubuo sa star-studded cast ng Quezon sina Karylle (gumaganap na asawa ni MLQ na si Aurora Quezon), Mon Confiado (Heneral Emilio Aguinaldo), Romnick Sarmenta (Sergio Osmeña), Therese Malvar (Nadia Hernando), Benjamin Alves (young Quezon), Iain Glen (Leonard Wood), Arron Villaflor (young Joven Hernando), JC Santos (Manuel Roxas), Jake Macapagal (Manuel Nieto), Bodjie Pascua (Raymundo Melliza), Angeli Bayani (Maria Agoncillo), Jojit Lorenzo (Miguel Laureano), Joross Gamboa (Eduardo Rusca), Ana Abad Santos (Carmen Hernando), Ketchup Eusebio (Pedro Janolino) at Nico Locco.
TULAD ni Jericho Rosales, first time rin ni Karylle na gumanap sa isang historical film na tulad ng Quezon dahil nasanay siya sa mga musical stage plays at romance-drama films na mga una na niyang nagawa bukod sa pagiging regular host ng It’s Showtime.
Ang impact naman kay Karylle ng kanyang role bilang si Aurora Quezon na naia-apply niya in real life ay ang pagtulong through charity works.
Aminado siyang sa simpleng paraang ito, nakakatulong siya sa pag-unlad ng bansa at pagdaragdag ng kaalaman sa mga Pilipino dahil nagpupunta sila sa mga liblib na lugar para magturo.
Masaya at fulfilled na si Karylle sa kanyang ginagawa at wala rin sa ambisyon niya ang pasukin ang pulitika dahil aminado siyang wala siyang sapat na kaalaman tungkol dito.
Kamakailan ay muling naging maingay ang isyu sa pagitan ni Karylle at ng ex-BF niyang si Dingdong Dantes dahil naitanong ni Tito Boy Abunda sa guesting ng singer-actress sa Fast Talk with Boy Abunda kung puwede ba silang maging friends.
Nagpakatotoo nga si Karylle na hindi na puwedeng maging friends pa sila ng ex-BF. Kaya naman ang tanong namin kay Karylle ay kung handa naman siya sakaling may mag-offer ng project na sila ni Dingdong ang magkasama.
Ang tanging naisagot ni Karylle, “Ang hirap ng what if, ‘di ba? So, when the time comes, we’ll cross that bridge when we get there.”
So, ‘yun na!
