Bagong player ng motorcycle taxi, tinabla ng LTFRB

ni Atty. Rodge Gutierrez @Mr. 1-Rider | May 18, 2024

Pinatatapos na sa Kamara ang ongoing five-year Motorcycle Taxi Pilot Program base sa rekomendasyon ng Land Transportation Franchising and Regulatory Board (LTFRB).

Inihayag ni LTFRB Chairman Teofilo Guadiz, head ng MC Taxi Technical Working Group (TWG), gagawin lamang ito kung maisasabatas na ang MC Taxi Bill.

Nanindigan si Guadiz na huwag nang tumanggap ng akreditasyon ng mga bagong player ng MC taxi service at sa halip ay ituloy na lamang ang tatlong kasalukuyang operators na Angkas, Joyride, at Move It.

Idingdag pa ng LTFRB na bahagi umano ng rekomendasyon ay mula sa kanilang tanggapan na patuloy na imonitor ang mga kabilang sa pilot study.

Kasama rin umano rito ang rekomendasyon na hindi na muna mag-accredit ng karagdagang players sa pilot study. Mini-maintain na lamang umano ang mga naunang kalahok at nagsasagawa lamang ang LTFRB ng monitoring para sa posibleng paglabag bago isapinal ang lahat.

Medyo may katagalan na rin ang pilot study na ito na sinimulan noon pang taong 2019 nang ilunsad ito.

Ngunit naharap ito sa iba’t ibang pagsubok gaya na lamang ng expansion ng operasyon ng MC taxi service sa labas ng Metro Manila.

Magkagayunman ay tiniyak ng LTFRB na hindi na kailangan ng extension. Habang ginagawa umano ang batas, itutuloy lang umano ang programa kasi 45,000 umano ‘yung binigyan ng slots sa Metro Manila na posibleng mawalan ng trabaho kung hindi maisasaayos.

Bagama’t napakarami pa ng inaayos ay kitang-kita na ang dulo ng baraha na positibo ang kahihinatnan ng hakbanging ito pabor sa ating mga ‘kagulong’.

Hindi na sana magkaroon ng problema sa panig ng ilang grupo na nais pang makilahok dahil sa ang LTFRB ang nakakaalam kung paano ‘yan isasaayos.

Hintayin na lang muna nating tumining ang sitwasyon, at pasasaan ba at maraming ‘kagulong’ din natin ang makikinabang sa oras na maging maayos na ang lahat.

Marami sa ating mga ‘kagulong’ ang excited na para rito, maging ang mga pasahero ay sabik nang maging legal ang mga motorcycle taxi para rin nga naman sa kanilang kaligtasan.

Sabagay, panahon na talaga na para paspasan ang pagiging legal ng motorcycle taxi sa bansa dahil habang tumatagal ay nanganganak ng problema na sa araw-araw ay dumarami rin ang reklamo laban sa mga kolorum na motorcycle taxi.

Marami kasi ang hindi dumaraan sa proseso ng booking dahil may mga terminal na para sa mga kolorum na motorcycle taxi at may mga barker na rin na tumatawag ng pasahero kaya direkta na ang transaksyon.

Ang problema sa mga ito ay hindi matukoy sa oras na may nagreklamo — tulad halimbawa noong isang dalagang pasahero na dinala umano sa madilim na bahagi at doon ay pinagtangkaang halayin — mabuti at nakatakbo ang biktima.

May mga kaso na rin ng overpricing dahil nga hanggang sa kasalukuyan ay wala pang umiiral na batas kung paano ang tamang singilan, maliban na lamang sa mga legal na riding hailing apps.

Pero konting tiis na lamang at malapit na malapit na ito — proud na proud ako sa ating mga ‘kagulong’ dahil ngayon pa lamang ay ramdam na ramdam na ang mabuting serbisyo ng motorsiklo sa bansa.

Ngayon, hindi lang mga manggagawa ang nabibigyan natin ng serbisyo kundi maging ang mga mag-aaral ay kaakibat na tayo sa kanilang pagtatapos ng pag-aaral — bukod pa sa napakaraming serbisyong dulot ng motorsiklo.

Doblehin pa natin ang pag-iingat upang mas lalo tayong pagkatiwalaan ng ating mga kababayan.

Mawawala na ang ‘kamoteng’ tingin sa mga rider dahil sa kapita-pitagan nang maging isang rider sa panahong ito.

Nakakatuwang isipin na dahil sa motorsiklo ay naibsan ang bilang ng mga walang hanapbuhay sa bansa.

Marami kasing motorista ang nagrereklamo dahil sa pagdagsa ng motorsiklo sa lansangan, pero kung titingnan natin ang mabilis na serbisyong dulot nito ay pasasalamatan natin ang pagdami ng motorsiklo sa bansa.

Napakabilis na ng mga transaksyon dahil sa bilis din ng teknolohiya at hindi tayo pisikal na makakasabay kung wala ang mga rider sa bansa.

Kaya sa ayaw natin o sa gusto, motorsiklo na ang bagong pag-asa kung serbisyo rin lang ang pag-uusapan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

LTFRB, lumambot na naman sa unconsolidated PUVs

ni Atty. Rodge Gutierrez @Mr. 1-Rider | May 14, 2024

Lumambot na naman ang Land Transportation Franchising Regulatory Board (LTFRB) sa mga jeepney operator at drivers na nabigong makilahok sa Public Utility Vehicle Modernization Program (PUVMP) na bumiyahe sa kabila ng itinakdang deadline para sa consolidation noong nakaraang Disyembre 31, ngunit doon lamang sa mga rutang kakaunti ang mga consolidated units.

Ayon sa LTFRB ang mga consolidated jeepney na nasa ruta na may 60 porsyento lamang ang units ay hindi na kailangang i-renew ang kanilang provisional authorities to operate.

Ang mga unconsolidated ay bibigyan ng pagkakataon para mabigyan ng special permits sa ruta na puwedeng bumiyahe -- sa ruta na may unconsolidated units o mas mababa sa 60 porsyento ng consolidation. 

Sa mga ruta na halos walang nag-consolidate, ay may pagkakataon pa para makapag-operate sila habang nakabinbin ang pagproseso ng mga itinalagang units para sa ibang ruta.

Ayon pa sa LTFRB, wala nang pagpapalawig pa na isasagawa sa pag-aaplay ng consolidation maging ito ay kooperatiba o korporasyon na siyang unang hakbang para sa PUVMP.

Ngunit maglalabas pa rin ang LTFRB ng mga special permit upang payagan ang mga awtorisadong public utility vehicle (PUV) na bumiyahe sa mga rutang walang nag-consolidate na jeepney drivers at operators.

Magsisilbi umano itong solusyon sa mga hinaharap na pagsubok ng mga komyuter matapos itakda ang deadline sa ilalim ng PUVMP.

Nauna rito ay nakatatanggap na ang ahensya ng ulat na parehong mga jeepney driver at pasahero ang umaaray sa kalsada dahil sa kahirapang bumiyahe.

Ayon sa ilang mga komyuter, talagang nabawasan ang mga jeepney sa daan at minsan ay inaabot na sila ng siyam-siyam kakahintay.

Kahit medyo may bahagya pang kaguluhan sa PUVMP ay nakatutuwang makita na umuusad na ang programang ito ng LTFRB na sa ngayon ay nasa proseso na pinaplantsa na lamang ang mga bagay-bagay sa kabila ng mataas na porsyento pa rin ng transport group ang tutol sa PUVMP.

Samantala, unti-unti namang isinasaayos ng mga transport group ang kani-kanilang lumang jeepney dahil sa hindi na rin umano kumikita at sa mas pinipili umano ng mga pasahero ang mga modern jeepney.

Ayon sa MANIBELA, handa naman umano silang sumunod sa pamahalaan hinggil sa modernisasyon ngunit sa paraang kaya lamang nila at hindi ang napakamahal na sapilitang iniaalok ng gobyerno.

Sa kabila ng pag-usad ng programa sa modernisasyon ay malaking porsyento pa rin ng transport group ang hindi tumitigil sa pakikipaglaban at tumututol sa PUVMP.

Sa rami ng paliwanag ng mga transport group hinggil sa pagtutol sa PUVMP ay makabubuting dalhin na nila sa hukuman ang usaping ito upang mabigyan ng pinal na desisyon at para hindi na rin maubos ang boses nila sa kasisigaw sa gitna ng walang tigil na protesta.

Sa paraang ito ay magkakaroon ng tamang pagpapasya kung dapat manatili pa ang tradisyunal na jeepney sa lansangan o kailangan na talaga pairalin ang PUVMP para maibsan na rin ang pagdurusa ng mga komyuter na pangunahing apektado sa naturang isyu.

Sobrang haba na ng ating paghihintay para wakasan ang usapin, na nagsimula noon pang nakaraang administrasyon at ngayon naman sa kasalukuyang administrasyon, ay baka makaladkad pa sa kampanya ang problemang ito.

Sabagay kung ang pakay lang naman ng transport group ay paabutin ito hanggang eleksyon sa pag-asang baka makakuha ng kakampi sa gitna ng kampanya, na baka may makisawsaw na kandidato -- sa puntong ito ay panalo ang transport group.

Nakalulungkot lamang isipin na sa ibang bansa ay puro de-kuryenteng sasakyan na ang pinag-uusapan, pero sa atin hanggang ngayon hindi pa rin maresolba ang PUVMP.

Hati ang opinyon ng ating mga kababayan — may gusto na panatilihin ang kinagisnang kultura kabilang ang tradisyunal na jeepney at meron namang sabik na sabik sa modernong pagbabago upang hindi umano tayo maiwan kung kaunlaran ang pag-uusapan kumpara sa ibang bansa. 

Hindi rin naman natin masisi ang pamahalaan kung bakit hindi basta-basta maipatupad ang PUVMP dahil sa kabuhayan ang nakataya rito ng marami nating kababayan, na mahirap isa-isantabi ng dahil lamang sa modernisasyon.

At ito rin naman talaga ang isinisigaw ng mga operator at driver, ang kailangan nilang kumain ng tatlong beses sa isang araw dahil sa paraang ito ay alam nilang hindi sila matitiis ng pamahalaan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Mga bagong sasakyan, nanganganib na ‘di mabigyan ng plaka

ni Atty. Rodge Gutierrez @Mr. 1-Rider | May 11, 2024

Nahaharap sa malaking suliranin ang marami nating kababayan na nakabili ng bagong sasakyan ang hindi umano bibigyan ng plaka ng Land Transportation Office (LTO).

Marahil, hindi pa ito alam ng mga mismong nakabili ng bagong sasakyan ngunit ito ang malungkot na ibinunyag ng pamunuan ng LTO dahil mayroon umanong 100 car dealers na hindi accredited ng ahensya na nakapagbenta ng bagong sasakyan kaya hindi makakakuha ng plate number ang mga ito.

Sinabi ni LTO Chief Assistant Secretary Vigor Mendoza II na nadiskubre nila nitong nakaraang Martes na may mga car dealer pala na hindi accredited ng LTO mula sa Calabarzon area.

Dahil dito, ang mga nakabili umano ng bagong sasakyan sa mga hindi accredited na car dealers ay hindi makakakuha ng plaka sa tanggapan ng kagawaran.

Ayon pa sa LTO, tukoy na umano nila ang 100 car dealers na ito na kamakailan lamang nila nadiskubre sa Calabarzon ang mga hindi accredited na car dealers – na sana ay maliwanagan umano ang mga nakabili ng bagong kotse kung bakit hindi lumalabas ang kanilang plaka.

Maglulunsad umano ang LTO ng crackdown sa lahat ng car dealers sa mga rehiyon at sa district offices para maipasara ang mga ito na walang accreditation.

Ngunit makakaasa naman umano ang mga nakabili ng sasakyan sa mga accredited car dealer na ilang araw lamang ay maibibigay na ng LTO ang kanilang mga plate number.

Ibinunyag na rin lang ng LTO  ang problemang ito, dapat ay inilabas na rin nila ang mga pangalan ng mga hindi accredited na car dealers upang hindi na bumili rito ang ating mga kababayan dahil mahaharap pala sa malaking problema.

O kaya ay bigyan naman sana ng pabor ang mga kababayan nating nakabili ng bagong sasakyan sa mga hindi accredited na car dealers dahil hindi naman nila alam na hindi pala sila iisyuhan ng plaka.

Kawawa naman ang mga kababayan nating nakabili ng sasakyan sa mga hindi accredited na car dealers dahil nabiktima na sila tapos magiging biktima pa uli ng sistema ng LTO.

Ayos lang sana kung noon pa man ay nag-anunsiyo na ang LTO hinggil sa operasyon ng mga hindi accredited na car dealers — pero kung sa consumers natin ibabagsak ang parusa ay parang hindi naman yata makatarungan ito.

Maglabas kayo ng babala at ilantad ninyo ang mga pangalan ng hindi accredited na car dealers at kapag may matigas ang ulo na may bumili pa rin ay tsaka na lang natin patawan ng parusa na hindi bigyan ng plate number.

Pero kung bigla nating hindi bibigyan ng plaka ang mga walang kamuwang-muwang na bumili ng bagong kotse sa mga hindi accredited na car dealers na wala man lamang abiso ay maliwanag na pang-aabuso ‘yan.

Sa totoo lang, ang LTO nga ang dapat na sisihin dahil umabot pa ng 100 car dealers ang hindi accredited tapos lantaran ang operasyon na hindi naman pala dapat.

Kung hindi sana nagpabaya rito ang LTO ay hindi na dumami ang mga kababayan nating nagsibili ng sasakyan sa mga hao shiao na car dealers.

Kasi kung magmamatigas talaga ang kagawaran na hindi magre-release ng plaka ay wala naman magagawa ang mga nakabili ng sasakyan kundi ang magdusa sa pagkakamaling hindi sila ang nakagawa.

Kaya sana maantig natin ang LTO sa plano nilang huwag mag-release ng plaka sa ilan sa ating mga kababayan na nakabili ng sasakyan sa mga hindi accredited na car dealer – baka makuha naman sa pakiusap na huwag na itong ituloy.

Naniniwala ako sa kabutihan ng puso ng pamunuan ng LTO basta’t maiparating lang natin sa kanilang tanggapan ang hindi magandang idudulot ng kanilang desisyon sa panig ng ating mga kababayan na ang pagkakamali ay wala naman sa kanilang mga kamay. 

Ipagdasal lang natin!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.