Tradisyunal na jeepney, talaga bang next month na lang?!

ni Atty. Rodge Gutierrez @Mr. 1-Rider | May 13, 2023

Ilang ulit nang pinalawig ng Land Transportation Franchising and Regulatory Board (LTFRB) ang deadline para sa mga tradisyunal na jeepney at tulad ng dati ay hinihimok pa rin nila ang mga ito na magsama-sama at sumali sa mga umiiral na kooperatiba upang maipagpatuloy ang kanilang operasyon.

Ayon sa LTFRB, umaasa silang ang extension ay makakahikayat ng mas maraming operator at driver na sumali sa isang kooperatiba o bumuo ng korporasyon bilang bahagi ng Public Utility Vehicle Modernization Program (PUVMP) ng gobyerno.

Ibig sabihin, wala namang bagong sinasabi ang LTFRB kundi ang muling ipaalala ang kanilang Memorandum Circular No. 2023-013, na ang mga tradisyunal na jeepney driver at operator ay kinakailangang sumapi sa isang kooperatiba o bumuo ng korporasyon bago ang itinakdang deadline para palawigin ang bisa ng kanilang provisional authority (PA) o prangkisa.

Hunyo 30 ang itinakdang deadline, at ang sabi ng LTFRB ay wala nang makakapagbago ng kanilang desisyon, maliban na lamang sa mga jeepney na susunod sa kanilang ipinatutupad na panuntunan na maaari pa ring sumama ang mga operator at driver sa mga ruta ng jeepney na mayroon nang kooperatiba o korporasyon.

Ilang ulit nang nagtakda ng deadline ang LTFRB at ang huli ay noong Marso, nais nilang pagsama-samahin ang mga jeepney, ngunit tumutol ang mga transport group.

Ngayon ay wala namang inilalabas na ulat ang LTFRB hinggil sa kalagayan ng ating jeepney driver o kung umuusad ba ang kanilang nais, na ang mga operator na dumaraan sa mga ruta na hindi pa nakabuo ng isang kooperatiba o korporasyon at hindi pa naghain ng aplikasyon ay maaari pa ring bumuo ng isang juridical entity hanggang Hunyo 30.

Halos nakukulele na ang tainga ng mga driver at operator na dapat ang nasabing entity ay accredited sa ilalim ng Office of the Transport Cooperative o nakarehistro sa Securities and Exchange Commission hanggang Agosto 31.

Ang mga naturang entity umano ay dapat ding maghain ng aplikasyon para sa pagsasama-sama ng prangkisa bago ang Oktubre 31 upang mapalawig ang bisa ng kanilang PA na mariing tinututulan ng mga transport group.

Maliban sa extension ay wala naman tayong nakikitang ibang galawan sa pagitan ng LTFRB at mga driver at operator ng tradisyunal na jeepney, na ang iba ay hindi pa rin gumagalaw hanggang ngayon sa kabila ng banta ng phaseout sa Hunyo 30.

Sa halip kasi na sumunod sa hiling ng LTFRB, maraming transport group ang nakikitang nakikipagdayalogo sa iba’t ibang ahensya ng pamahalaan sa pagbabakasakaling mapakinggan ang kanilang hinaing.

Ang iba naman nating kababayan ay hindi naniniwala na matutupad na ang itinakdang deadline sa Hunyo 30 dahil palagi na lamang nagtatakda, ngunit palagi ring pinalalawig ng pamahalaan.

Ang tingin ng maraming tsuper at operator, magiging negatibosa publiko ang pamahalaan kung ipipilit nila ang phaseout, kaya malakas ang kanilang loob na magmatigas, lalo na at wala namang nakahandang programa para sa mga tsuper at operator na mawawalan ng hanapbuhay.

Hindi naman natin masisi ang LTFRB dahil sinusunod lamang nila ang kanilang mandato hinggil sa modernisasyon ng transportasyon, kaya lang, hindi naman sapat ang kanilang ngipin para ipatupad ito dahil may boses din ang mga transport group.

Sa ngayon, umaasa ang LTFRB na sa darating na Hunyo 30 ay tapos na ang problema sa mga tradisyunal na jeepney at buo naman ang loob ng mga transport group na hindi sila kayang tiisin ng pamahalaan, kaya ang inaasahang mangyayari ay muling mapapalawig ang deadline hanggang Disyembre.

Kaya hangga’t may panahon, sana ay sipatin naman natin na hindi lang basta katigasan ng ulo ang pinaiiral ng mga tsuper at operator dahil pinoproteksyunan lang nila ang kanilang hapag-kainan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Sa dami ng plano ng LTO sa driver’s license, publiko nalilito na

ni Atty. Rodge Gutierrez @Mr. 1-Rider | May 11, 2023

Sa kabila ng napakaraming kontrobersiyang kinasasangkutan ng Land Transportation Office (LTO), tila hindi natitinag ang kanilang tanggapan sa paggawa ng ikabubuti ng naturang ahensya.

Isa na rito ay ang mapadali umano ang pagkuha ng driver’s license dahil hindi na umano oobligahing sumalang pa sa karagdagang medical examinations ang mga tsuper na kukuha ng lisensya na may bisang lima at 10 taon.

Kasunod ito ng direktiba ni LTO Chief Jay Art Tugade na amyendahan ang LTO Memorandum Circular 2021-2285 o Supplemental Implementing Rules and Regulations of Republic Act 10930.

Nakapaloob kasi sa naturang memorandum na bukod sa regular na medical examination ay obligado pa ring sumalang sa periodic medical examination (PME) ang kumukuha ng lisensya bilang requirement sa pagkakaroon ng bago o renewal ng lisensya na may lima at 10 taong bisa.

Ito ang probisyong nais baguhin ni Tugade dahil wala naman umanong silbi ang naturang periodic medical exam batay sa mga pag-aaral at inipon nilang datos mula sa mga eksperto at hindi rin ito sanhi ng pagdami ng aksidente.

Dahil dito, isang beses na lamang umano ang mandatory medical examination at ito ay gagawin na lang tuwing bago kumuha o mag-renew ng driver’s license.

Para naman sa mga Pilipinong may driver’s license na nagtatrabaho o nakatira sa ibang bansa, oobligahin ang pagsasalang sa kanila sa medical examination sa loob ng 30 araw mula nang dumating sa Pilipinas bago sila payagang makapagmaneho.

Pero hindi pa man din ito tuluyang naipatutupad ay pinag-aaralan na naman ng LTO na paiksiin ang exam para sa mga nais kumuha ng driver’s license dahil ang sobrang haba umano ng exam ang isa sa nakikitang dahilan kaya tinatangkilik ng mga aplikante ang serbisyo ng mga ‘fixer’.

Kaugnay nito, bumuo ang LTO ng komite na mag-aaral kung epektibo ba ang kasalukuyang exam na inaabot ng isang oras o panahon na ba para paiksiin nang hindi nakokompormiso ang kalidad ng mga driver na makakapasa.

Kabilang sa pinag-aaralan ay ang exam para sa kumukuha ng non-professional license at conductor’s license, kasama na ang pagdaragdag ng driver’s license code na karaniwan ay mula sa non-professional patungong professional license.

Sinusuri na rin umano ng komite na gawing ‘customized’ ang mga tanong sa exam depende sa klasipikasyon ng lisensya o license code na nais kunin ng aplikante.

Ngayon, heto na naman, plano ng LTO na ilunsad ang electronic version ng driver’s license at ilalahok umano ito sa eGov Super App na binuo ng Department of Information and Communications Technology (DICT).

Ang bentahe umano ng digital license ay madaling makita ng enforcer ang detalye ng inaarestong motorista dahil tulad ito ng E-wallet na naglalaman ng lahat ng government ID na maaari ring i-download sa cellphone at ito na lamang ang ipakikita sa sisitang enforcer.

Maaari rin umano itong gamitin sa renewal ng mismong lisensya at car registration sa pamamagitan ng online transaction at magkakaroon ito ng security measure na puwedeng isama sa kasalukuyang sistema ng pisikal na bersiyon ng eGov Super App.

Kung inyong matatandaan, noong nakaraang Disyembre 2022, inilunsad ng DICT ang eGov Super App at nagkaroon ito ng pakikipag-ugnayan sa iba pang ahensya ng pamahalaan.

Ang features ng naturang app ay ang pagsasama-sama ng E-Local Government Units (ELGU), eGov App, EGovpay, E-Travel, E-Cloud at ngayon ay nais makisali ng LTO.

Sa dinami-rami ng nais na mangyari ng LTO, tila nalilito na ang mga motorista at ilan sa ating mga ‘kagulong’ dahil sa sobrang bilis ng kanilang galaw, pero sa kabuuan ay tila hindi sila makaahon sa kanilang sitwasyon na puro press release lamang.

Dahil sa dami ng pinakawalan nilang anunsyo, higit na tumatak sa publiko ang kakapusan ng plastic card ng driver’s license at pinalawig na lamang ang bisa ng mga expired para magamit pa.

Hindi naman masama kung sabay-sabay ang subo basta kaya, pero kung nabubulunan na ay medyo maghinay-hinay muna.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Cable cars sa Antipolo , tourist attraction na, kontra trapik pa

ni Atty. Rodge Gutierrez @Mr. 1-Rider | May 9, 2023

Dahil may kataasan ang siyudad ng Antipolo, hindi imposible na lagyan ito ng cable car pababa ng Metro Manila na isang malaking solusyon kung maisasakatuparan para maibsan ang labis na pagsisikip ng daloy ng trapiko sa naturang lugar.

Ang Antipolo ay isa mga sa paboritong pasyalan ng ating mga ‘kagulong’ na nagsasama-sama tuwing Linggo at sabay-sabay na binabaybay ang kahabaan ng Marcos at Sumulong Highway para lamang magsimba o magpahangin sa over-looking, ngunit iniinda na ang pagsisikip ng daloy ng trapiko.

Sa paglipas ng panahon ay halos napuno ng mga bahay ang naglalakihang subdibisyon sa Antipolo na karaniwan sa mga naninirahan ay mga nagtatrabaho sa Metro Manila at ito ang napakalaking dahilan kung bakit palaging siksikan ang mga sasakyan sa kahabaan ng Marcos Highway.

Tila hindi na mailalayo ang Marcos Highway sa kahabaan ng EDSA na bagama’t may nagpapabalik-balik na Metro Rail Train (MRT) ay maihahalintulad sa isang napakalawak na parking area araw-araw ang sitwasyon.

Kung may mga dapat lagyan sa panahong ito ng mga skyways at iba pang karagdagang imprastruktura para gumaan ang daloy ng trapiko—ito ang kahabaan ng Marcos Highway mula pagpasok pa lamang ng Marikina City hanggang sa pagpasok sa Antipolo.

Pero tila tuluyan nang nabuksan ang kaisipan ng pamahalaan ng Antipolo City dahil higit sa kung anumang karagdagang imprastruktura para gumaan ang problema sa daloy ng trapiko sa naturang siyudad ay naisip na rin nila ang matagal nang pangarap ng mga taga-Antipolo na cable car.

Tila nagising sa pagkakahimbing si Antipolo City Mayor Casimiro ‘Jun’ Ynares III na gawing makatotohanan ang paglalagay ng cable car matapos itong makipagpulong sa mga dayuhang consultants sa Department of Transportation (DOTr).

Maraming naggagandahang cable cars sa ibang bansa, tulad sa Hong Kong na kung magagaya lang natin ang kalidad at disenyo ay inaasahang magiging matagumpay itong proyekto kung transportasyon lamang ang pag-uusapan.

Malaking bagay ang isinumiteng pre-feasibility study phase at proposal sa pamahalaan ng Antipolo hinggil sa proyekto na may kinalaman sa pagtatayo ng cable cars at kung ano ang mabuting dulot nito sa mga nahihirapan ng pasahero.

Hindi pa man din nakukumpirma ang mga detalye hinggil sa planong pagtatayo ng cable cars ay napakarami nang natutuwa hinggil sa balitang ito dahil bukod sa pagluwag ng trapiko ay tiyak na magiging sentro ito ng atraksyon na magpapalakas pa sa turismo ng naturang siyudad.

Posible umanong itayo ang istasyon ng cable car sa Rizal Provincial Capitol at Antipolo City campus sa University of Rizal System kung saan ili-link din ito sa ilang istasyon ng MRT at LRT na babaybay sa itaas na bahagi ng Ortigas Avenue extension.

Kung may cable car, tiyak na ilang minuto lang ay nasa MRT-4 na ang pasahero mula Antipolo at tiyak na kahit malaking kabawasan ang mga sasakay sa cable car sa pagluluwag ng daloy ng trapiko, hindi lang sa Marcos Highway kundi maging sa Ortigas Avenue extension.

Sa ibang bansa, ang cable cars ay hindi na lang tourist attractions dahil noong 2004, naglagay ang Colombia ng cable cars para sa kanilang transportation system. Sa New York, Venezuela, Algeria, Bolivia, Vietnam ay ginawa na rin ito.

Isang napakalaking legasiya sa kasalukuyang pamahalaan kung magkakaroon ng katuparan ang napakatagal nang pangarap na ito ng mga taga-Antipolo City na hindi naman imposibleng maabot kung seryosong pagtutuunan ng pansin.

Sa ngayon ay malayo pa sa katotohanan ang proyektong ito, pero dahil napag-uusapan ay tila may kislap na sa dilim na isang araw ay mabibigyan ito ng pagkakataong matupad.

Ipagdasal natin!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.