P200 ‘lagay’ para magkaplaka agad sa LTO

ni Atty. Rodge Gutierrez @Mr. 1-Rider | August 17, 2023

Hindi pa nag-iinit ang puwet sa puwesto ng bagong hepe ng Land Transportation Office (LTO) ay umarangkada na agad ang ilang tiwaling empleyado na panandaliang nag-lie low at ngayon ay rumaraket na sa halagang P200 kapalit ng mabilis na hassle-free release ng plate number ng sasakyan.

Ibig sabihin gumalaw na ang matagal nang sindikato sa loob ng LTO para bumagal at humirap ang releasing ng plate number upang magkaroon ng pagkakataon ang mga ‘fixer’ at ilang empleyado umano na magkaroon na naman ng karagdagang kita.

Bago pa naupo si LTO chief Vigor Mendoza II ay kabi-kabila pa rin ang anomalya na labis na nagpapangit sa imahe ng naturang ahensya sa napakahabang panahon na ngayon ay prayoridad na ayusin ng bagong pamahalaan.

Tila epektibo ang panungkulan nitong si Mendoza dahil sa maagang panahon na umaarangkada na ang mga tiwaling empleyado sa kanyang nasasakupan ay natunugan agad niya na may mga nagsasamantala.

Dahil dito, agad na nanawagan si Mendoza sa publiko na isumbong sa kanilang tanggapan ang sinumang manghihingi ng pera kapalit ng mabilis na pagkuha ng plate number ng sasakyan at nangako itong mapaparusahan ang sinuman kahit matagal nang sindikato sa LTO.

Nabatid na may mga tiwaling tumatanggap umano ng P200 na ‘padulas’ upang hindi na pumila ang isang car owner sa LTO district offices at iba pang distribution sites, at tila nasasamantala ang paspasang pamamahagi ng license plates.

Pinaplano na nga ng LTO na mamahagi na rin ng license plate sa mga mall, at noong nakaraang Biyernes lamang ay nagsagawa rin ng partial distribution ng replacement plates sa LTO office ng Sorsogon at Naga City.

Kaugnay nito, naglunsad naman ang Department of Transportation (DOTr) ng website upang tulungan ang mga car owner na malaman kung maaari nang makuha ang plate numbers ng kani-kanilang sasakyan ngunit sa kasamaang-palad ay ilang ulit na natin itong sinubukan ngunit hindi gumagana at hindi pa matiyak kung sinabotahe ito ng mga ‘fixer’.

Matatandaan na kamakailan lamang ay ibinulgar ng Commission on Audit (COA) na 1.79 milyong pares ng license plate na nagkakahalaga ng mahigit sa P800 milyon ang hindi pa naki-claim sa LTO na ngayon ay pilit na nireresolba ng naturag ahensya.

Sa isinagawang pagbisita ni Mendoza sa LTO-Cebu ay nadatnan nito ang 670,000 piraso ng plaka ang nakatambak at hindi pa nairi-release sa mga may-ari, kaya target ni Mendoza na maipamahagi na ang lahat ng ito hanggang Septyembre ng taong kasalukuyan.

Nagbigay din ng babala si Mendoza na mananagot ang mga tauhan ng LTO sa lahat ng tanggapan sa iba’t ibang bahagi ng bansa at sa mga dealer na nagbebenta ng kotse at motorsiklo na kung hindi makukuha ang mga plate number at matetengga sa kani-kanilang tanggapan.

Sa kasalukuyan, ang Trojan-Tonnjes Joint Venture (TTJV) ang bagong supplier ng plaka ng LTO na nangako na kumpletong idi-deliver ang 16,040,630 plaka sa LTO sa volume na 60,000 piraso kada linggo. Sa tingin ninyo kelan pa ito makukumpleto?

Gusto ko lang ipaalam sa publiko na kulang-kulang 8,000 bagong kotse at halos 45,000 bagong motorsiklo ang nairerehistro kada linggo — hindi ko ma-imagine kung gaano kalaki ang maitutulong ng TTVJ para makumpleto na ang problemang 16,040,630 plaka ng LTO.

Dahil sa mga bagong sasakyan pa lamang ay kulang na kulang na ang 60,000 piraso kada linggo na kayang i-deliver ng TTVJ, sabagay karagdagang tulong lang naman itong TTVJ dahil may sariling gawaan naman ng plaka ang LTO.

Dati malaking problema ang backlog kaya naghabol ang LTO sa sitwasyon, ngayon naman nadiskubre ng COA na santambak naman pala ang plaka at hindi lang maayos ang distribusyon, kaso problema pa rin dahil sa halagang P200 ay pinagkakakitaan naman ng mga ‘fixer’. Sana may makasuhan para bawas problema!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Hirit na dagdag-pasahe, rush hour rate at may fuel subsidy pa

ni Atty. Rodge Gutierrez @Mr. 1-Rider | August 15, 2023

Tinatayang sa katapusan ng buwang ito ay nakatakda nang ipamahagi ng Department of Transportation (DOTr) ang fuel subsidy para sa mga tsuper at hinihintay na lamang ang iri-release na pondo mula sa Department of Budget and Management (DBM).

Ayon sa DOTr, nasa P2.95 bilyon ang nakalaang pondo na tinatayang aabot sa 1.6 milyong Public Utility Vehicles (PUV) drivers ang makikinabang sa hakbanging ito ng pamahalaan.

Binubuo ito ng 280,000 na PUV drivers, 930,000 na tricycle drivers at 150,000 delivery riders kung saan makatatanggap ng P10,000 na one time cash assistance ang mga modern jeep at modern UV express drivers.

Nasa P6,500 naman ang matatanggap ng iba pang uri ng pampublikong transportasyon — P1,000 sa mga tricycle drivers habang P1,200 naman sa mga delivery rider.

Pero tila hindi maliwanag sa ilang tsuper na kaya may fuel subsidy dahil ito ang ayudang ibinibigay ng pamahalaan sa mga PUV driver at operators upang tulungan ang mga ito sa tuwing nagkakaroon ng serye ng oil price hike.

Kasi sa kasalukuyan ay mainit na naman ang usapin hinggil sa hirit ng dagdag-pasahe ng ilang grupo sa sektor ng pampublikong transportasyon na ang kanilang dahilan ay ang patuloy na pagtaas ng presyo ng petrolyo sa bansa.

Nagpadala ng liham ang Liga ng Transportasyon at Operators sa Pilipinas, Pagkakaisa ng mga Tsuper at Operators Nationwide, Stop and Go Transport Coalition, at Federation of Jeepney Operators and Drivers Association of the Philippines sa Land Transportation Franchising and Regulatory Board (LTFRB).

Nakapaloob sa liham na ipinadala nito lamang Agosto 11, na payagan umano silang magpatupad ng P2 dagdag-pasahe para sa unang apat na kilometro at ang kahilingang ito ay hindi lamang sa Metro Manila dahil nais nilang ipatupad sa buong bansa.

Idinadahilan ng mga transport group sa kanilang petisyon ang pagtaas ng presyo ng mga piyesa bukod pa sa hindi mapigilang pagsirit ng presyo ng langis kada linggo na talaga namang nangyayari sa kasalukuyan.

Dahil pa rin sa sunud-sunod na pagtaas ng petrolyo ay may ilang grupo rin ng mga tsuper na humihiling sa LTFRB na magdagdag-singil naman sa panahon ng peak hour na tinawag nila itong ‘rush hour rate’.

Sa hiwalay na proposal na ito ng mga tsuper ay nais nilang dagdagan ng P1 ang pamasahe sa pampasaherong jeepney at P2 naman sa pampasaherong bus sa panahon ng peak hours na alas-5 hanggang alas-8 ng umaga at alas-4 hanggang alas-8 ng gabi maliban na lamang kung araw ng Linggo at holidays.

Ang petisyon para sa ‘rush hour rate’ ay isinumite sa LTFRB noon pang Oktubre 2022 ngunit muling nabuhay at patuloy na lumalagablab ang usapin dahil sa walong sunud-sunod na oil price hike at nalalapit na pagbubukas ng klase.

Ngunit tila hindi katanggap-tanggap ang hiling na pagpapatupad ng ‘rush hour rate’ sa marami nating kababayan dahil sa katuwirang hindi naman umano tumataas ang suweldo ng lahat ng mga manggagawa na pangunahing sumasakay sa pampublikong transportasyon.

Katataas lamang umano ng pasahe sa LRT at MRT na halos hindi pa natutunawan ang marami sa ating kababayan ngunit heto at may mga kahilingan na namang nais isubo ang transport group.

Mabigat ang usaping ito na marahil ay dapat munang pag-isipang mabuti ng LTFRB bago tuluyang magdesisyon dahil posible tayong makatulong sa transport group ngunit labis namang tatamaan ang mga mananakay.

May ilang nagsasabi na dapat na umanong tanggalin ng pamahalaan ang oil excise tax para mapababa ang presyo ng petroleum products at iprayoridad ang pambansang transport program na pagtutuunan ng pansin ang lokal na produksyon ng mass transportation.

Hati ang opinyon ng pampublikong transportasyon at ng mga mananakay, wala akong gustong manaig kung sino ang dapat na masunod. Ang sa akin lamang ay pare-pareho sanang walang maagrabyado sa magiging desisyon ng pamahalaan para everybody happy. Tingnan natin ang diskarte ng LTFRB.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Isyu sa EDSA bus carousel, habal-habal at tuktok, tapusin na

ni Atty. Rodge Gutierrez @Mr. 1-Rider | August 12, 2023

Nahaharap na naman sa panibagong usapin ang Department of Transportation (DOTr) makaraang lumutang ang mga isyu hinggil sa planong pag-alis ng Bus Carousel sa kahabaan ng EDSA.

Tila dapat na maghinay-hinay ang DOTr at huwag basta-basta magpapadala sa mga proposal na wala namang kaakibat na solusyon kung bakit kailangan nang alisin ang bus carousel na malaking tulong sa ating mga pasahero.

Medyo umingay ang usaping ito dahil sa kahilingan ng Mega Manila Consortium na nagpahayag ng pagtutol sa patuloy na operasyon ng bus carousel na nakita naman natin kung gaano kaepektibo.

Posibleng magkaroon na naman ng malaking problema sa pagsisikip ng daloy ng trapiko sa kahabaan ng EDSA, kung ibabalik ang dating sistema na pababayaan na naman ang mananakay sa gilid ng kalsada para mag-abang ng pasahero.

Wala tayong tinututulan sa kahit anong plano na makabubuti sa ating mga kababayan, ang sinasabi lamang natin ay huwag magpadalus-dalos sa desisyong ito dahil napatunayan na ang mabuting dulot ng bus carousel sa EDSA.

Isa pa, napakalaki na ng ginastos ng pamahalaan para ayusin ang mga istasyon ng bus carousel na tiyak na mapupunta na naman sa wala kung magkakaroon ng pagbabago dahil lamang sa proposal ng ilang grupo na wala namang inihahain na solusyon.

Kung ngayong meron na tayong bus carousel ay nagkakaproblema pa rin tayo sa sobrang pagsisikip sa kahabaan ng EDSA dahil sa rami ng sasakyan lalo na kung rush hour, eh, lalo na siguro kung mawawala pa ang bus carousel.

Ngayon, heto ang Metro Manila Development Authority (MMDA) na nagbibigay ng anunsyo na huhulihin umano ang mga hindi rehistrado o kolorum na motorcycle taxi at habal-habal na naglipana sa iba’t ibang bahagi ng Metro Manila.

Nakipag-ugnayan umano ang chairman ng Technical Working Group (TWG) ng DOTr na kasalukuyang nagsasagawa ng napakatagal nang pilot study hinggil sa kalagayan ng motorcycle taxi sa bansa.

Lahat umano ng wala sa master list ng mga kalahok sa isinasagawang pilot study tungkol sa motorcycle ride-hailing apps tulad ng Angkas, Joy Ride at Move It ay huhulihin.

Ang iba pang ride-hailing apps tulad ng Sampa at Kandong ay hindi pinapayagang mag-operate kaya kasama ang mga ito sa unang tutugisin at tututukan din umano ang mga habal-habal riders maging ang mga ginagamit nilang terminal.

Ang Land Transportation Franchising and Regulatory Board (LTFRB) ay ilang ulit nang nanawagan na tapusin na ang isinasagawang pilot study dahil mahigit na nga namang apat na taon at kailangang-kailangan nang desisyunan.

Panahon kasi para gawing legal ang operasyon ng motorcycle taxi sa bansa dahil masasayang naman ang napakahabang panahon ng isinagawang pilot study kung walang positibong resulta, pero kung negatibo naman ang epekto ng motorcycle taxi sa bansa ay ianunsyo na agad upang hindi na dumami pa ang ilegal na namamasada.

Ito ‘yung matagal na nating sinasabi, dahil sa sobrang nainip na ang maraming rider na nais maghanapbuhay ay humantong na sila sa pamamasada ng walang sapat na papeles dahil kailangan nilang tugunan ang kumakalam na tiyan ng kani-kanilang pamilya.

Kung sa umpisa pa lamang ay isinaayos na at binilisan ang sistema, hindi na tayo umabot sa puntong mas marami pa ang kolorum sa ngayon kumpara sa legal na motorcycle taxi. Pare-pareho namang ayaw ang naturang sistema ngunit sa ganitong sitwasyon na sila dinala ng pagkakataon.

Heto ngayon, at hindi na rin mapigilan ang pagdami sa mga lansangan hindi lang sa Metro Manila ng mga sasakyang gawa sa India na kung tawagin ay ‘tuktok’ o ‘bajaj’ na may tatlong gulong, at tiyak na mga ilang araw pa ay tsaka na naman tayo maghahabol para maglabas ng panuntunan kung dapat ba silang payagan sa main road o hindi.

Unfair nga naman kasi sa mga tricycle, na hindi pinapayagan sa major thoroughfare tapos itong mga ‘tuktok’ na tatlo rin naman ang gulong ay pinapayagan. Ang daming dapat ayusin, sana naman maisaayos!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.