Backlog sa mga plaka ng sasakyan, mas dumami

ni Atty. Rodge Gutierrez @Mr. 1-Rider | September 28, 2023

Napakarami pa ring sasakyan ang walang plaka at hanggang ngayon ay naghihintay din sa release ng kanilang plate number mula sa Land Transportation Office (LTO) sa kabila ng matagal na nila itong bayad — ang masaklap dumarami ang bagong sasakyan at hindi na makahabol ang LTO sa sitwasyon.

Noon pang 2013 ay problema na ang backlog. Ang Department of Transportation (DOTr) at ang LTO ay iginawad ang manufacturing contract sa joint venture ng Knieriem BV Goes at Power Plates Development Concept Inc. bilang bahagi ng limang taong Motor Vehicle License Plate Standardization Program.

Kasunod nito, nag-isyu ang Commission on Audit (COA) ng Notice of Disallowance na sumasakop sa advance payment ng LTO patungo sa suppliers noong Hulyo 2014 na nagkakahalaga ng P477 milyon, ngunit ayon sa DOTr ang inaasahang 15 milyong plaka ay nasa 4 milyon lamang ang nai-release na nagresulta sa backlog na 11 milyon.

Taong 2016 ay nag-isyu ang Korte Suprema ng temporary restraining order (TRO) upang pigilan ang LTO at ang Department of Transportation and Communication (DOTC) sa pagre-release at pamamahagi ng 700,000 plaka mula sa Bureau of Customs (BOC) makaraang ang plates’ supplier-importer ay mabigong bayaran ang kanilang obligasyon sa BOC.

Inalis ng Korte Suprema ang TRO noong 2018 at maging ang COA ay inalis na rin ang disallowance at pinayagan na ang pamamahagi ng 300,000 plaka para sa kotse at 400,000 plaka naman para sa motorsiklo na nagkakahalaga ng P477,901,329.

Nang taon ding iyon ay pinasinayaan ng LTO ang motor vehicle plate production plant na kayang gumawa ng hanggang 22,400 piraso ng plate number kada araw ngunit hindi nito kinaya ang backlog.

Dahil dito, taong 2021 ay humingi na ng saklolo ang LTO sa iba pang supplier na tulungan sila sa manufacturing upang mapunuan ang 18 milyong backlogs kaya Setyembre 2022 ay bumaba ang backlog sa 11.5 milyon na lamang.

Sa pagpasok ng taong 2023, inanunsyo ng LTO ang layon nilang makumpleto hanggang 90% backlog sa plaka sa pagtatapos ng taon sa pamamagitan umano ng pagpapaigting sa operasyon ng kanilang sariling planta.

Ngayon heto at may bagong pahayag ang LTO, ipinoproseso na umano ng DOTr sa pangunguna ni Secretary Jaime Bautista ang inorder na mga plate number na magpupuno sa kasalukuyang 13.2 milyong backlog para sa motorsiklo at nasa 179,000 para sa motor vehicles.

Tiniyak ni LTO Chief Assistant Secretary Atty. Vigor Mendoza II na inorder na nila ang 15 milyong license plates at nagsisimula na umano ang delivery kada buwan, na inaasahang tutugon na sa napakatagal nang problema sa backlog.

Ayon sa pamunuan ng LTO, umaabot umano sa 250,000 pares ng plaka ang kada buwan ay naide-deliver para sa motor vehicle samantalang umaabot naman sa isang milyong plaka para sa motorsiklo na lubhang napakabilis kumpara dati.

Kung paniniwalaan natin ang pahayag ng LTO, maging ang kanilang production capacity ay tumaas umano sa 32,000 kada araw o aabot ng halos 700,000 kada buwan na kung magtutuluy-tuloy ay posibleng mawala na ang backlog na ipinangako nila sa susunod na taon.

Nagkaisa naman sa pahayag sina DOTr Secretary Bautista at pamunuan ng LTO nang humarap sila noong nakaraang Martes sa Senado para sa pagpapatuloy ng budget hearing na nabitin kamakailan.

Ayon sa kanilang pahayag sa harap nina Sen. Grace Poe at Sen. JV Ejercito na silang nangunguna sa naturang pagdinig, na sa loob ng dalawang taon ay makukumpleto na umano ng LTO ang backlog na lumalabas na aabutin pa ng taong 2025.

Lahat umano ng bagong sasakyan ay may available plate number na at tiyak na mabibigyan ng bagong plaka at ‘yung mga dati namang hindi agad nabigyan ng plaka ay isa-isang tutugunan hanggang sa tuluyan nang matapos ang backlog.

Marami kasing sasakyan ang naipagbili na pero wala pa ring plaka, at kahit umaatras nang umaatras ang pangako nila na matatapos ang backlog — ang mahalaga ay umuusad na at sana lang bago mabulok ‘yung mga sasakyang walang plaka ay maranasan naman na magkaroon ng plate number.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Customized exam ng LTO vs. road rage

ni Atty. Rodge Gutierrez @Mr. 1-Rider | September 26, 2023

Pinaplano ng Land Transportation Office (LTO) na baguhin ang examination na ibinibigay sa mga nais kumuha ng driver’s license depende kung saan gagamitin at kung anong sasakyan ang paggagamitan.

Nais ng pamunuan ng LTO na magbuo ng ‘customized’ set of questions na hindi pa rin mawawala ang intensyon ng naturang eksaminasyon hinggil sa adhikaing mapabuti ang tamang pagmamaneho partikular sa road safety.

Niluluto pa lamang ang planong ito ng LTO at inaasahang matatalakay ang proposal na ito sa mga susunod nilang conference na sana ay magbunga ng positibong resulta upang kahit paano ay magkaroon ng pagbabago sa naturang ahensya.

Pumasok ang ideya sa pamunuan ng LTO hinggil sa planong ‘customized’ set of questions matapos ang sunud-sunod na insidente ng road rage na kamakailan lamang ay nag-viral sa social media.

Sabi ni LTO Assistant Secretary Vigor Mendoza, ang lahat ng planong ito ay nasa gitna pa lamang ng pag-aaral at wala pang pinal na desisyon ngunit hindi umano sila kumporme sa napakahabang eksaminasyon na ibinibigay sa mga nais kumuha ng driver’s license.

Ang kagandahan sa bagong pamunuan ng LTO ay tanggap nilang kailangan nila ng konkretong plano upang matugunan ang road rage at nakahanda sila sa anumang suhestiyon sa halip na makipagtalo para maibsan ang problema.

Ikinukonsidera rin ng LTO ang kahalagahan ng pagbalanse sa pagitan ng customization at efficiency upang matiyak na ang pagproseso sa pagkuha ng lisensya ay mananatiling mabilis at parehas sa lahat ng kuwalipikadong aplikante.

Ang ideya sa likod ng panukalang pagbabago sa eksaminasyon ay upang matiyak na ang ibibigay na pagsusulit ay nakalinya o patungkol mismo sa pangangailangan ng isang aplikante hinggil sa kanyang pagmamaneho at iba pang intensyon.

Sa ilalim umano ng customized set of questions ay maa-assess ng LTO ang kaalaman at kahusayan ng isang aplikante kung karapat-dapat ba itong bigyan ng linsensya na ayon o akma sa kanyang kapasidad bilang driver.

Halimbawa, kung ang isang aplikante ay planong magmaneho ng motorsiklo, ang lahat ng tanong na lalabas sa eksaminasyon ay patungkol sa motorcycle safety, handling and traffic rules na lahat ay patungkol lamang sa motorsiklo.

Ganu’n din, kung ang isang aplikante ay nais magmaneho ng commercial vehicle, ang mga lalabas na tanong ay iniakma rin upang ma-assess ang kanilang kaalaman at pagkakaintindi hinggil sa commercial driving regulations at responsibilities.

Sa ngayon kasi ay pare-pareho lang ang mga ibinibigay na eksaminasyon sa lahat ng nais na kumuha ng driver’s license at panibagong exam na naman sakaling nais magdagdag ng level ng restrictions o kaya ay nais na mula non-professional ay maging professional.

Sa totoo lang ay napakaganda ng panukalang ito ng LTO at kung maisasakatuparan ang mga planong ito ay lubhang magiging lalong mahalaga ang lisensya sa bawat driver dahil sa hindi na basta-basta makakakuha nito.

Hindi man tahasang masusugpo ng LTO ang karahasan sa kalsada partikular ang road rage dahil sa paghihigpit sa pagbabago sa eksaminasyon ay malaking tulong ito para pahalagahan ng isang driver ang kanyang lisensya.

Isa pa sa isinusulong ng LTO ang pagbuo ng special law hinggil sa pagtukoy at pagbibigay ng karampatang parusa para sa isang insidente ng road rage dahil ang kasalukuyang batas umano ay nililimitahan ang kakayahan ng LTO na magpataw ng mas mabigat na parusa para sa mga masasangkot.

Nais ng LTO na magkaroon ng partikular na batas upang mabilis silang makapagpataw ng kaukulang parusa lalo na kung may nasaktan, nasugatan o nasawi sa isang insidente ng road rage.

Hindi natin alam kung ano ang kahihinatnan ng mga planong ito ng LTO ngunit nakatutuwang malaman na ang isang ahensya na dating batbat ng anomalya ay unti-unting nang kumikilos hinggil sa kapakanan ng ating mga driver.

Sana, masugpo na rin ng bagong pamunuan ng LTO ang matinding ‘lagayan’ na kinasasangkutan ng ilang ‘fixer’ na kasabwat ng ilang tiwaling empleyado para makakuha ng driver’s license na hindi na dadaan sa eksaminasyon at walang kahirap-hirap.

Kung wala na ang mga anomalyang ito ay tiyak na babait ang maraming driver sa lansangan partikular ang mga mayayaman na hindi takot mawalan ng lisensya dahil marami silang kakamping ‘fixer’ umano sa LTO kapalit ng kanilang pera.

Good luck sa LTO, sana maging matagumpay kayo!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pedestrian lane at overpass, gawing maayos at ligtas para sa publiko

ni Atty. Rodge Gutierrez @Mr. 1-Rider | September 23, 2023

Ang Pedestrian Crossing ay isang bagay na madalas nakikita ngunit marami sa ating mga kababayan ang hindi talaga alam ang tungkol dito. Katunayan libu-libong Pinoy ang hindi gumagamit nito habang tumatawid ng kalsada.

Pedestrian crossing, pedestrian lanes o crosswalks anuman ang tawag ay lubhang napakahalaga ng mga linyang sadyang idinesenyo sa lansangan para sa pedestrian at mga sasakyan sa kalsada — para sa kaligtasan ng lahat.

Ang hindi alam ng marami nating kababayan na awtomatikong itinuturing na kriminal na ang isang tumatawid dahil sa hindi paggamit sa mga crosswalks sa ilang piling lansangan at posibleng maharap sa kasong jaywalking kung mahuhuli.

Kaya ang policy-making body na Metro Manila Council (MMC) na binubuo ng 17 Metro Manila mayors ay minsan nang nagkasundo na gawing mas mahigpit ang pagtrato sa mga jaywalking violators na may unsettled penalties.

Hindi ba’t lumutang din noon sa ideya ng MMC na dadalhin ang listahan ng mga pangalan ng mga jaywalking violator sa National Bureau of Investigation (NBI) para maisama sila sa alarm list upang hindi balewalain ng mga violator ang pagbabayad ng multa.

Nahaharap kasi sa multang P500 ang isang jaywalking violator o kaya magbayad sa pamamagitan ng tatlong oras na community service na maaaring isagawa sa tuwing huling Biyernes ng bawat buwan.

Ngunit, may ibang panuntunan ang iba’t ibang Local Government Units (LGUs) pagdating sa polisiya sa anti-jaywalking na karaniwang ipinapatupad ng mga enforcer ng Metro Manila Development Authority (MMDA).

Isang halimbawa ay sa Quezon City na may ipinapataw na multang P140 na higit na maliit kumpara sa umiiral na P500; Sa Valenzuela City ay higit na mas mahigpit dahil P500 din ang multa ngunit may 24 oras pang community service at kapag nahuli naman sa ikaapat na pagkakataon ay papatawan na ng multang P5,000.

Mahirap maging pedestrian sa Metro Manila, dahil isa sa problema ay ang kawalan ng sidewalk sa maraming lugar na kung meron man ay napakakitid o kaya ay sakop ng mga sidewalk vendors na dahilan upang malagay sa panganib ang buhay ng marami nating kababayan.

Kamakailan, naglabas ng datos ang Philippine National Police (PNP) at ang Metropolitan Manila Accident Reporting and Analysis System (MMARAS) na base sa police blotter reports ay napakarami ng naaaksidente habang tumatawid.

Ngunit aminado ang PNP na hindi talaga mabuo ang datos hinggil sa mga naaksidente habang tumatawid dahil marami sa mga nadisgrasya ang hindi nagtutungo sa tanggapan ng pulisya para magsampa ng reklamo lalo na kung hindi naman grabe o kaya agad namang nagkaaregluhan.

May ulat din na maraming pedestrian ang nabundol ng motorsiklo kumpara sa iba pang sasakyan dahil sa minsan ay nag-aagawan sa paggamit ng sidewalk o kaya ay hindi agad nakikita na may umu-overtake na motorsiklo dahil natatakpan ng mas malaking sasakyan.

May nag-iisang ulat na inilabas noong 2005 hanggang 2015 na umabot umano sa 57,877 pedestrian na nasaktan o nasawi sa Metro Manila roads at 1,859 o 32% ang nasawi samantalang 56,018 o 96.7% ang nasaktan na lumalabas sa ratio na isang pedestrian ang nasasawi sa bawat 30 nasaktan.

Kinumpirma ng National Statistical Coordination Board (NSCB) ang ulat na ito na maraming naaksidente ang nabundol ng motorsiklo kumpara sa iba pang sasakyan at tumataas umano ito ng 11% kada taon hanggang sa kasalukuyan.

Ngayon heto at iminumungkahi ni Interior and Local Government (DILG) Secretary Benhur Abalos ang pagpapataw ng mas mabigat na parusa para sa jaywalking sa EDSA at C-5 dahil nga sa mataas na ulat ng aksidente.

Tila, naiirita na rin si Abalos sa walang humpay na pagpapabalik-balik ng ating mga kababayan sa malalaking lansangan partikular sa kahabaan ng EDSA at C5 na karaniwan ay pinamumugaran din ang mga vendor sa lansangan.

Suportado ng taumbayan ang mga ganitong paghihigpit dahil sa ikabubuti ito ng lahat ngunit sana lang naman ay unahing ayusin ang lahat ng pedestrian lane, gawing maayos at tiyaking ligtas sa masasamang loob ang ilang madidilim na overpass upang hindi mapilitang tumawid sa bawal ang ating mga kababayan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.