Smuggled na Bugatti Chiron sports car na nairehistro sa LTO, nabawi na

ni Atty. Rodge Gutierrez @Mr. 1-Rider | Pebrero 27, 2024

Natapos din ang problema hinggil sa mahigit isang linggong kontrobersiya tungkol sa dalawang sport car na paikut-ikot sa Metro Manila na umano’y hindi nagbayad ng kaukulang buwis at nakalusot sa Bureau of Customs, ngunit nairehistro sa Land Transportation Office (LTO) matapos na isuko ng may-ari ang kontrobersiyal na sports car.

Mismong may-ari ng smuggled luxury car ang nagsuko sa Customs Intelligence and Investigation Service (CIIS) ng BOC.

Nasa pag-iingat na ngayon ng CIIS ng BOC ang asul at pulang Bugatti Chiron sports car na nagkakahalaga ng P165 milyon ang bawat isa matapos ang ilang linggong paghahanap ng mga otoridad.

Ang pagsurender sa sasakyan ay isinagawa matapos ang dalawang linggo makaraang maglabas ng warning ang BOC laban sa isang Thu Trang Nguyen, na siyang registered owner ng naturang blue sports car na may plate number na NIM 5448.

Ang sports car ay isinuko sa mga ahente ng BOC, katuwang ang National Bureau of Investigation (NBI) at Philippine National Police (PNP) sa Muntinlupa City.

Nabatid na nakipag-ugnayan ang grupo ng BOC sa mga barangay official at security officers bago nagtungo sa lokasyon ng smuggled vehicle.

Matapos ito ay tinanggap ni Atty. Michael Mosquite, kinatawan ng may-ari ng sasakyan, ang isang Warrant of Seizure and Detention (WSD) bago tuluyang isinakay ang luxury car sa isang low bed truck at dinala sa BOC-Port of Manila.

Binalaan umano ang may-ari ng sports car na kailangang mahanap na sa lalong madaling panahon ang kontrobersiyal na sports car at mabuting agad namang nakipagtulungan ang may-ari nito.

Nabatid na unang nakipag-ugnayan ang NBI at PNP sa BOC upang tumulong sa paghahanap sa sasakyan.

Una na ring isinuko ang isa pang smuggled na pulang Bugatti Chiron sports car na nagkakahalaga rin ng P165 milyon at may plate number na NIM 5450, at nakarehistro sa isang Menguin Zhu sa nasabi ring barangay noong Pebrero 9, 2024.

Naglunsad ang BOC ng search sa naturang dalawang smuggled luxury cars nang mamataang bumabagtas sa mga lungsod ng Pasay, Pasig, Muntinlupa, at Cavite province noong Pebrero 3. Pinuri naman ni Deputy Commissioner for Intelligence Group Juvymax Uy ang koordinasyon ng mga key government agencies, at ng media, sa pagpapakalat ng impormasyon sa publiko na nagresulta sa pagkarekober sa dalawang sports car.

Isa na namang patotoo ang nangyari sa isyung ito na kapag nagkaisa ang mga operatiba ay magkakaroon talaga ng mabilis at positibong resulta. Ang lahat ng problema ay mayroong katapat na solusyon. Sakit din naman kasi sa ulo ng BOC ang mga luxury car na ito at nagkakadudahan pa sa loob ng ahensya kung sino ba ang kumita.

Ngunit, kahit isinurender na ang mga sasakyan, ang mga may-ari nito ay mahaharap pa rin sa mga kasong paglabag sa Section 1401 in relation to Section 1113 ng Customs Modernization and Tariff Act (CMTA).

Ito ang dapat na mangyari, kailangang makita talaga ng publiko na may managot sa kasong ito upang hindi na maulit pa, dahil sa rami ng mga mayayaman sa bansa ay hindi imposibleng balang araw ay maulit na naman ang pangyayaring ito sa gitna ng hindi pa maayos-ayos na problema hinggil sa Public Utility Modernization Program (PUVMP) tapos ay dinadaan-daanan lang sila ng napakamamahal na sports car na pilipit pa ang papeles.

Pinupuri natin ang joint forces ng NBI at PNP dahil sa kung hindi rin naman sa pressure na ibinigay nila ay hindi rin naman isusurender ang mga luxury car na ito.

Kaya salamat sa NBI at PNP sa pagtutok sa kasong ito, solved agad!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pag-amyenda sa Motorcycle Crime Prevention Act, para sa kapakanan ng mga rider

ni Atty. Rodge Gutierrez @Mr. 1-Rider | Pebrero 22, 2024

Nanawagan si Senador Ronald “Bato” Dela Rosa sa mga kapwa mambabatas para sa agarang pagpasa ng isang panukala upang amyendahan ang Republic Act No. 12235 o “Motorcycle Crime Prevention Act”.

Sabi ni Dela Rosa, kailangang balansehin ang kapakanan ng riding community at ang layunin na tugunan ang problema sa “riding-in-tandem”.

Manipis umano ang linyang tinutulay ng batas na ito sa pagitan ng crime prevention at diskriminasyon. Wala naman umanong problema na parusahan ang mga nakagawa ng krimen ngunit ayon kay Sen. Bato ay tiyakin lamang kung sino ang tunay na salarin, inihayag niya ito sa gitna ng kanyang co-sponsorship sa Senate Bill No. 2555.

Argumento ni Dela Rosa, na isa ring motorcycle enthusiast, nasi-single out umano ang motorcycle riding sector nang isabatas na RA 12235. Nabago umano ang perspektibo sa sektor na ito nang matulungan ng motorcycle riders ang mga ordinaryong Pilipino noong COVID-19 pandemic sa paghahatid ng mga mahahalagang mga pangangailangan tulad ng test kits, food items, gamot at iba pa. 

Sa ilalim ng Senate Bill 2555, magkakabit na lang ng RFID stickers sa harap ng motorsiklo sa halip na plate number. Kaya kung lulusot ang panukalang ito ay hindi na dalawa ang plaka ng motorsiklo. RFID sa harap at sa likod na lamang ang plaka.

Mukhang magugustuhan ito ng motorcycle riding community na noon pa man ay tutol na sa doble plaka na ang lalaki pa. Sabagay, masagwa naman talaga tingnan.

Kaya ngayon pa lang ay marami na sa ating mga ‘kagulong’ ang excited sa panukalang ito na sana ay maisakatuparan sa lalong madaling panahon.

Masyado kasing napanggigigilan noong nakaraang Kongreso ang kalagayan ng mga kababayan nating gumagamit ng motorsiklo dahil sa biglang sumikat ang riding-in-tandem at parang lahat ng nakamotor ay masamang tao.

Dapat nating isipin na lumaganap lamang ang motorsiklo sa panahon ng pandemya na silang nagsalba sa taumbayan sa maraming bagay, partikular sa serbisyo na nagsasakripisyo sa pagbili ng mga pagkain at gamot dahil maraming takot lumabas ng bahay habang sila ay buwis-buhay.

At noong panahong matindi ang bakbakan sa Senado hinggil sa doble plaka ay tila nadamay ang mga matitinong rider sa riding-in-tandem na madalas na laman ng balita dahil sa kung anu-anong krimen na kinasasangkutan.

Pero dahil sa bagong panukalang ito, tiyak na magiging kapaki-pakinabang dahil bukod sa madali ang pagkakakilanlan ng rider ay makikita rin sa RFID ang iba pang detalye na kailangang-kailangan ng ating mga traffic enforcer.

Maiiwasan pa ang nakawan ng motorsiklo dahil sakaling nahuli ang rider at hindi tugma sa kanya ang detalye sa RFID ay may dahilan na para pigilin ang rider kung bakit siya nagmamaneho ng hindi akmang motorsiklo.

Nakakatuwang isipin na matapos ang mga pahirap na panuntunang inilabas laban sa mga rider — tulad ng paghuli sa mga sumisilong sa mga flyover sa tuwing umuulan ay may ilan pa rin namang mambabatas na inaalala ang kalagayan ng mga nagmomotorsiklo.

Huwag kayong mag-alala dahil hindi nakakalimot ang ating mga ‘kagulong’ sa mga kumakalinga sa kapakanan ng aming hanay.

Hindi na natin maitatanggi na panahon na ito ng motorsiklo, hindi lang sa ‘Pinas kundi sa iba’t ibang bahagi ng mundo, at malaking tulong sa pagsulong ng ating ekonomiya ang motorsiklo. Hindi naman tayo humihingi ng special treatment, pero sana lang huwag namang alisan ng dignidad ang ating mga ‘kagulong’ na sumusunod naman sa batas.

Madalas inaabala kasi sa checkpoint ang mga motorsiklo kahit walang kasalanan basta motorsiklo dapat awtomatikong hihinto ‘pag may checkpoint. Pagkatapos, pinabubuksan pa ‘yung lalagyan baka raw may baril, pero ‘pag kotse tuluy-tuloy lang samantalang posibleng mas malalaking baril ang kasya sa likod ng sasakyan. 

Sana naman mabago na ang pagtrato ng Philippine National Police (PNP) sa mga nakamotor ‘pag may RFID na dahil babasahin na ito ng RFID reader, at wala ng dahilan para pigilin pa ang mga motorcycle rider.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

NLEX Balintawak Toll Plaza, isasara mula Peb. 23-29

ni Atty. Rodge Gutierrez @Mr. 1-Rider | Pebrero 20, 2024

Isang malaking abala para sa mga motorista na nais magbakasyon sa panahon ng Mahal na Araw na karaniwang ginagawa ng marami dahil kailangan nilang paghandaan ang pagsasara tuwing gabi ng isang linya ng North Luzon Expressway (NLEX), malapit sa Balintawak Toll Plaza, bunsod ng konstruksyon ng Northern Access Link Expressway project.

Sa anunsyo ng NLEX Corporation nitong Sabado, ang proyekto ay may habang 160 metro sa leftmost lane ng northbound at southbound directions.

Upang bigyang daan ang SMC’s Northern Access Link Expressway project malapit sa Balintawak Toll Plaza, isasagawa ang pagsasara sa 160-meter sa leftmost lane ng parehong northbound at southbound directions.

Batay sa abiso ng NLEX, ang road closure ay epektibo sa Pebrero 23 mula alas-10 ng gabi hanggang Pebrero 29 ng alas-4 ng umaga.

Kaya sa mga kababayan nating nagpaplano na mag-out of town patungong north ay makabubuting alaming maigi ang detalye hinggil sa pagsasarang ito para hindi na makaranas ng pagkainis sakaling abutin ng siyam-siyam sa kahabaan ng NLEX.

Hindi naman permanente ang naturang pagsasara dahil sa isasaayos lamang ang mga sira ng bahagi ng NLEX upang higit na mas maayos at ligtas ang pagmamaneho sa mga susunod na pagkakataon.

Kumbaga, kaunting tiis lamang at ang kapalit nito ay ginhawa na para sa mga nais na magtungo sa mga lalawigan. Ang mahalaga ay nagbigay sila ng anunsyo at hindi basta-basta na lamang isinara ang mga kalye na posibleng magdulot ng grabeng pagsisikip sa daloy ng trapiko.

Medyo may mga maliliit na sira na kasi sa bahaging nabanggit sa NLEX na dapat nang ayusin upang hindi na maging sanhi pa ng aksidente, kaya dapat magbaon ng pasensya habang ito ay isinasaayos.

Imbes na magreklamo ay ihanda na lamang ang mga sarili sakaling may planong mangibang bayan para hindi na makaranas ng stress habang binabaybay ang kahabaan ng NLEX na kinukumpuni.

May ilan tayong kababayan na nagkokomento na bakit daw sa panahon pang ito nagkukumpuni. Sana lang ay mapansin naman ng ating mga kababayan ang pagsisikap ng pamunuan ng NLEX na maisaayos ang napakamahal na NLEX at wala ng ibang pagkakataon para ayusin ito kung hindi ang mga panahong ito na dapat ay nag-aayuno na at hindi dapat biyahe nang biyahe para magsaya.

Medyo hassle ang pagkukumpuni ng NLEX, ngunit malaking ginhawa ito sa ating mga estudyante sa muling pagbubukas ng klase at sa mga kababayan nating nagtatrabaho sa Metro Manila.

Kung tutuusin, hindi na naman obligasyon ng pamunuan ng NLEX na magbigay pa ng anunsyo dahil sa pribado ang kanilang kalye at nagbayad ang mga nais na dumaan kaya lamang ay nagmamalasakit pa rin sila sa kanilang mga parokyano at iyon lamang ay dapat na nating ipagpasalamat na hindi tayo nabigla sa sitwasyon.

Kabilang sa dapat ihanda ay ang kalooban ng mga sasama sa biyahe lalo na ang mga bata upang hindi mainip dahil napaliwanagan tungkol dito. Magdala rin ng sapat na inuming tubig at makakain na makapagpapawala ng inip sakaling abutin ng matinding pagsisikip sa daloy ng trapiko.

Idagdag na rin ang mga gamot sa hilo na karaniwang nararanasan ng mga bata sa biyahe lalo na kung usad pagong ang takbo at magdala rin ng supot na maaaring gamitin sa mga masusuka upang hindi magkalat sa ating sasakyan.

Tiyaking nasa kondisyon ang aircon ng inyong mga sasakyan dahil posibleng magdulot ng grabeng init sa loob nito at pagkairita kung nasa gitna na ng trapik. 

Kahit kaunti sana ay nakatulong tayo sa ating mga kababayan na nais mag-out-of-town upang mapaghandaan ang kakaharapin nilang problema sa kanilang paglalakbay. Ingat!

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.