‘Wag samantalahin ang pera ng bayan, iprayoridad ang ayuda sa mahihirap

ni Grace Poe - @Poesible | August 09, 2021

Dahil sa pandemya, napakaraming kabuhayan ang apektado. Maraming negosyo, hindi lang naghingalo kung hindi tuluyan nang nagsara. Kaakibat nito ang pagkawala ng trabaho at pagkakakitaan ng ating mga kababayang nakaasa sa mga ito para sa kabuhayan.

Palagi nating hinihimok ang pamahalaan na magbigay ng nararapat na suporta sa mga sektor na apektado ng pandemya. Pero dapat, ang bigyan ay ang higit na nangangailangan. Sa kaso ng agrikultura, dapat unahin ang mga magsasaka, mangingisda at iba pang agricultural farmworkers.

Ikinagulat natin ang prayoritisasyon ng Department of Agriculture (DA) sa pamimigay nito ng tulong para sa sektor ng agrikultura. Sa bisa ng DA Memorandum Circular No. 13, inilatag ng nasabing kagawaran ang pagbibigay ng grants na hanggang P5 milyon para sa warehouses at cold storage facilities. Samantala, ang maliliit na magsasaka at mangingisda ay nakatanggap lamang ng ayuda na P5-K noong isang taon, at maaaring umutang ng halagang hindi lalagpas sa P25-K. Take note, utang ‘yan, na kailangan nilang bayaran pa, at hindi bigay!

Kailangan nating patatagin ang sarili nating produksiyon ng pagkain sa ating bansa. Hindi natin matatamo ang seguridad sa pagkain nang hindi inaaalagaan ang ating mga magsasaka. Kailangan nating pabutihin ang kondisyon ng ating mga magsasaka kung gusto nating tumaas ang kanilang produksiyon.

Dapat paalalahanan ang mga tagapamuno ng DA na ang prayoridad ng kagawaran ay ang mga magsasaka at mangingisda, hindi ang importers. Sila ang dapat alalayan sa panahong ito. Bigyan ng ayuda ang tunay na nangangailangan para sa ingklusibong pag-unlad.

Hindi lang COVID-19 ang kalaban natin, kundi gutom

ni Grace Poe - @Poesible | August 02, 2021

Matapos na magdiwang ng ating bansa sa pagkakapanalo ni Hidilyn Diaz ng ating unang ginto sa Olympics, narito tayo at nahaharap sa lockdown sa National Capital Region (NCR) para maiwasan ang delubyo ng muling pagtaas ng bilang ng mga kaso ng COVID-19 sa ating bansa. Iniatas ng Pangulo na isailalim sa Enhanced Community Quarantine (ECQ) ang Metro Manila mula Agosto 6 hanggang 20, at ang Iloilo City, buong probinsiya ng Iloilo, Cagayan de Oro, at Gingoog City mula Agosto 1 hanggang 7.

Samantala, Modified ECQ (MECQ) naman Ilocos Norte, Bataan, Lapu-Lapu City, at Mandaue City mula Agosto 1 hanggang 15. General Community Quarantine with Heightened Restrictions naman ang 20 iba pang lugar.

Sa totoo lang, litung-lito na ang mga kababayan natin sa iba’t ibang klasipikasyon ng kuwarentina sa bansa. Sabi nga ng isang nakausap natin, parang nililito na lang daw tayo sa kung anu-anong letra ng alpabeto.

Sa laki ng panganib na dala ng Delta variant na nakita nating nagpahirap nang husto sa India at Indonesia, nagpasya ang pamahalaan na mag-lockdown para iwasan ang pagkalat pa ng COVID-19. Ito ang hakbang na inirekomenda para iwasang bumagsak ang ating healthcare system sakaling magkapunuan na naman ang mga ospital.

Gayunman, kailangang bago pa mag-lockdown, maibigay na ang ayuda para sa ating mamamayan sa mga lugar na isinailalim sa ECQ. Hindi natin palalabasin ang mga kababayan natin, maliban na lang sa mga Authorized Person Outside of Residence (APOR); paano naman sila kakain at mabubuhay? Kailangan ng mabilis at maagap na pamimigay sa ating mga kababayan ng kanilang pantawid-buhay sa dalawang linggong hindi sila makahahanap ng kanilang ikabubuhay.

Walang nasisiyahan sa lockdown pero ngayong naririyan na, gawin natin ang ating parte para hindi na ito magkaroon ng ekstensiyon. Manatili sa loob ng ating mga tahanan kung hindi naman kailangang lumabas. Huwag munang magpatuloy ng bisita sa ating mga bahay, at huwag muna ring mandayo ng kumustahan. Alalahanin natin, mas mabilis kumalat ang variant na ito. Ang masaklap, kahit mga bata, apektado nito.

Hindi lang COVID-19 ang kalaban natin ngayong pandemya kundi gutom. Bigyan natin ng maagap at sagap na ayuda ang ating mga kababayan para hindi na sila makipagsapalaran sa labas.

Sakuna at kalamidad, puwedeng paghandaan

ni Grace Poe - @Poesible | July 26, 2021

Parang sinusubok talaga ang tatag ng loob nating mga Pilipino. Sa gitna ng paglaban natin sa COVID-19, nag-alboroto ang Bulkang Taal, nagsanib-puwersa ang bagyo at habagat kaya umulan nang pagkalakas-lakas na nagdulot ng matinding pagbaha sa maraming lugar sa Kamaynilaan at Luzon, lumindol pa. Quotang-quota na tayo sa problema, Hulyo pa lang, mga bes!

Ang mga sakuna at kalamidad, bagama't likha ng kalikasan ay napaghahandaan. Alam na natin ang sitwasyon ng Pilipinas sa Pacific Ring of Fire, kaya karaniwan ang pagputok ng bulkan at pagkakaroon ng lindol. Tanggap na rin nating nasa landas tayo ng bagyo, at halos 20 ang tumatama sa atin kada taon. Kailangan ng palaging paghahanda para mabawasan ang bigat at peligro tuwing darating ang mga kalamidad sa ating bansa.

Nakahain sa Senado ang ating panukalang-batas na Senate Bill 124 para sa paglikha ng Department of Disaster Resilience and Emergency Assistance and Management. Magiging tungkulin ng nasabing kagawaran na magbigay ng kinakailangang pamumuno na may pananagutan at magtimon sa iba’t ibang sektor para makalikha ng disaster-resilient na bansa.

Panahon na para umalpas tayo sa pagbibigay ng relief goods. Bagama’t mahalaga ang koordinasyon ng mga ahensiya pagkatapos ng kalamidad, kailangan natin ng inklusibo at mas buong pagpaplano para mabawasan ang lakas ng tama ng mga ito sa atin. Kailangan nating magbuo ng mga komunidad na handa at kayang tumindig sa gitna ng mga kalamidad.

Hindi natin maipagkakaila ang epekto ng climate change sa ating bansa. Sa anumang pagpaplano ng mga sektor, kailangan itong bigyan ng konsiderasyon.

Sa laki ng trabaho at sa patuloy na pangangailangan para sa disaster resilience and management, kailangan ng dedikadong ahensiya na ito lamang ang tatrabahuhin. Inaasahan nating sa nalalabing isang taon ng Kongresong ito bago magpalit ng administrasyon, maipasa ang mahalagang batas tungo sa mas ligtas at maayos na Pilipinas.

◘◘◘

Balik-General Community Quarantine with Heightened Restrictions ang National Capital Region (NCR), kabilang ang mga lalawigan ng Ilocos Norte, Ilocos Sur, Davao de Oro, at Davao del Norte hanggang katapusan ng buwan. Bunsod ito ng panganib na dala ng Delta variant ng COVID-19 na sumalanta sa India at Indonesia.

Marami tayong kababayang labas na labas na dahil mahigit isang taon nang nakakulong sa bahay. Mga bes, hindi ito ang panahon para magliwaliw. Kung hindi lang din kailangang-kailangan, tulad ng para sa trabaho o gawaing esensyal, manatili muna tayo sa kaligtasan ng ating mga tahanan. Hindi biro na ang bilis kumalat ng variant.

Hinihimok natin ang mga kababayan nating may pagkakataong magpabakuna. Malaking bagay ito para maiwasan ang hospitalisasyon at kamatayan dahil sa COVID-19. Gawin natin ito hindi lamang para sa ating sarili kundi para na rin sa ating mga mahal sa buhay.

Gayunman, ipagpatuloy ang pag-iingat kahit nabakunahan na. Proteksiyon natin ang facemasks, palaging paghuhugas ng mga kamay at paggamit ng hand sanitizers, at social distancing sa lahat ng pagkakataon.

Manatiling ligtas, mga bes.