Converted isolation facilities, epektib vs. COVID

ni Gina Pleñago | June 24, 2020

Sa puspusang pagtugon ng Las Piñas Government sa mga kaso ng COVID-19, naitala kahapon ang 41 na pasyenteng gumaling sa virus, ang pinakamalaking bilang ng recovery cases sa lungsod.

Ibinahagi ni Mayor Imelda 'Mel' Aguilar ang panibagong pagkakatala ng mga pasyenteng gumaling sa sakit kung saan umabot na aniya sa kabuuang 275 recoveries sa buong siyudad.

Ang mga nakikita umanong dahilan kaya mabilis ang pagbuti ng lagay ng COVID cases ay dahil sa mga inilatag na health protocols kasama na rito ang paglalagay ng mga converted isolation facilities kaya agad naihihiwalay ang mga nagpositibo at mga nagpakita ng sintomas ng sakit, binibigyan sila ng masusustansiyang pagkain, gamot at wastong pangangalaga habang naka-quarantine, paglilipat sa tertiary hospital kung may iba pang sakit ang pasyente at ang tuluy-tuloy na Expanded Targeted Testing na isinasagawa sa lungsod.

Inihayag ni Las Piñas City Health Office (LPCHO) Chief, Dr. Ferdinand Eusebio, malaking tulong din ang mas maigting na screening at contact tracing sa mga residenteng posibleng nakasalamuha o na-expose sa mga pasyenteng nagpositibo sa COVID-19.

Nagpapatuloy din ang rapid at swab testing sa mga suspected COVID cases sa lungsod.

163 preso, nabigyan ng parole

ni Gina Pleñago | June 24, 2020

Walang high profile inmates sa 163 na nakatakdang lumaya mula sa iba't ibang penal colony sa bansa.

Kinumpirma ng Bureau of Correction (BuCor) na ready to release na ang 163 inmates mula sa iba't ibang penal colony sa bansa.

Paglilinaw ni BuCor Chief Director General Usec. Gerald Bantag, walang napasama na high profile inmates na nabigyan ng parole.

Ayon kay Bantag sa nasabing bilang, 94 ang mula sa New Bilibid Prison (NBP) sa minimum security compound, ang iba ay mula sa Leyte Davao penal colony at Sablayan penal colony.

Maaari pa umanong ma-rebook ang parole ng mga inmates kung may gagawing paglabag sa patakaran na ipinagkaloob ng Bureau of pardon and parole sa ilalim ng Department of Justice (DOJ).

Handa na rin umanong humarap sa lipunan sa kanilang paglaya ang mga inmates matapos silang sumailalim sa debriefing at documentation at ang iba sa kanila ay nakapag-aral pa sa loob ng NBP.

PNP official, todas sa riding-in-tandem

ni Gina Pleñago | June 23, 2020

Nasawi ang isang police official habang sugatan ang isa sa mga tauhan nito nang makaengkuwentro ng riding-in-tandem na kanilang sinita dahil walang suot na helmet kung saan napatay din ang isa sa mga suspek sa Parañaque City.

Binawian ng buhay alas-12:15 ng hatinggabi sa San Juan De Dios Hospital sanhi ng ilang tama ng bala sa iba't ibang bahagi ng katawan ang biktimang si P/Lt. Armand Melad, 41, ng Camarin Caloocan City.

Ginagamot naman ang tauhan nitong si P/Cpl. Allan Baltazar, 31, kapwa nakatalaga sa PCP-1.

Hindi naman umabot ng buhay sa Ospital ng Parañaque ang isa sa mga suspek na si Moamar Sarif, 31, ng Bgy. Baclaran, na nabaril sa kaliwang bahagi ng ulo.

Nagsasagawa na ng follow-up operation laban sa kasama nito.

Base sa report na natanggap ng Southern Police District, nangyari ang barilan alas-9:45 kamakalawa ng gabi sa panulukan ng Unida at Dimasalang Sts., Bgy Baclaran.

Habang nagpapatupad ng GCQ sa nabanggit na lugar, nakatanggap ng tawag ang PCP-1 mula sa 911 dahil sa reklamong maingay sanhi ng videoke.

Nagresponde naman agad sina P/Lt. Melad at P/Cpl. Baltazar sakay ng mobile car at dito namataan ang dalawang suspek na magkaangkas sa motorsiklo na walang suot na helmet kaya sinita ang mga ito.

Sa halip na tumigil, bumunot ng baril ang isa sa suspek at pinutukan ang mga pulis kung saan tinamaan ang dalawa.

Gumanti ng putok ang isa sa mga pulis na si P/Ssgt. Lenard Quindo at tinamaan ang suspek na si Sarif at ang kasama nito ay dali-daling tumakas.

Nang tingnan ng mga imbestigador ang bag na dala ng suspek, nakita rito ang ilang plastic sachet na hinihinalang shabu.