Gov’t. employees, no. 1 pasaway sa EDSA busway — MMDA

ni Gina Pleñago | July 13, 2020

Numero uno umanong lumalabag sa EDSA busway ang mga government employees, ayon sa Metro Manila Development Authority (MMDA).

Sa pahayag ni MMDA Spokesman Celine Pialago, mula nang ipatupad ang EDSA busway noong Hunyo 1, pumalo sa 1,200 ang nahuling lumalabag dito.

Aniya, kalahati sa mga pasaway ay pawang mga empleyado ng gobyerno.

Napag-alaman na aabot sa 30 sasakyan ang nahuhuli kada araw ng MMDA, traffic personnel o Inter-Agency Council for Traffic at Highway Patrol Group.

Ang EDSA busway ay ang innermost lane na inilaan para lamang sa mga bus.

Baon sa utang sa bumbay… Misis nagbenta ng shabu, kulong

ni Gina Pleñago | July 6, 2020

Arestado ang isang ginang ng mga tauhan ng Philippine Drug Enforcement Agency (PDEA) dahil sa pagbebenta ng kalahating kilong shabu na may halagang P3.4 milyon sa Taguig City, Linggo ng hapon.

Kinilala ni Director General Wilkins Villanueva, ang suspek na si Saida Kadilon y Sandigan, walang trabaho ng Bgy. Maharlika, Taguig City.

Base sa inisyal na ulat, nakipagkita ang suspek sa poseur-buyer ng PDEA sa parking lot ng isang mall sa Western Bicutan, Taguig City, ala-1:19 ng hapon at dito siya nahuli kung saan nakuha sa pag-iingat nito ang 500 gramo ng shabu sa 8 sachets na isinilid sa paper bag.

Ang operasyon ay pinangunahan ng PDEA 4-A, PDEA Special Enforcement Service, PDEA National Capital Region at PDEA Bangsamoro Autonomous Region in Muslim Mindanao sa pakikipagtulungan ng Taguig City Police.

Katwiran ng suspek, hindi niya kilala ang nagpabenta sa kanya ng ilegal na droga at napilitan siyang pasukin ang pagbebenta dahil sa pagkakabaon niya sa utang sa Bumbay.

Mga pulitikong ayaw sa Anti-Terror Law, takot — LIPI

ni Gina Pleñago | July 5, 2020

Ipinagbunyi ng multi-sector group na Liga Independencia Pilipinas (LIPI) ang pagiging ganap na batas ng Anti-Terrorism Bill.

Naniniwala si LIPI Secretary General Jose Antonio ‘Ka Pep’ Goitia na mapoprotektahan ng batas ang mga Pilipino at ang bansa laban sa mga terorista.

Sinisigurado rin ni Goitia sa publiko na mayroong mga probisyon ang batas na mangangalaga kontra sa mga paglabag sa mga karapatang pantao.

“Ito ay isang batas na magpapalaya sa ating lahat sa banta ng lahat ng uri ng terorismo dito sa bansa. Ang mga humahadlang at ayaw dito ay nu’ng una pa man balakid at kritiko na sa mga magagandang plano ng Administrasyong Duterte para sa totoong pagbabago at ikabubuti ng lahat at hindi ng iilang sektor lamang ng lipunan. Kaya batid natin na hindi na bago ang kanilang pagtutol dito at ang iba naman ay nagsasawalang kibo lang sa magandang batas na naipasa dahil takot sila sa kahihinatnan ng kanilang pulitikal na ambisyon dahil nga sa tingin nila ay hindi ito popular sa ibang sektor na magagamit nila sa darating na halalan,” ani Goitia.

Ang Liga Independencia Pilipinas ay koalisyon na kinabibilangan ng 48 organisasyon mula sa iba’t ibàng panig ng bansa.