National boxers, sasanayin sa Thailand para sa Olympic Q'fying

ni Gerard Peter - @Sports | February 17, 2021

Target ng Association of Boxing Alliances in the Philippines (ABAP) na makalipad patungong bansang Thailand sa katapusan ng Pebrero o unang linggo ng Marso upang doon ipagpatuloy ang isinasagawang paghahanda at pagsasanay para sa nalalapit na World Olympic qualifying tournament sa Hunyo sa Paris, France.

Inihayag ni women’s national head coach Nolito “Boy” Velasco na patuloy na nakikipag-usap ang pamunuan ng ABAP, higit na si secretary-general Ed Picson sa mga opisyales ng boxing federation ng Thailand upang mahanapan ang mga national pugs ng mapagsasanayan, dahil aminado ang mga ito na maraming mga makaka-sparring ang mga boksingero sa naturang lugar.

“Ang gustong mangyari nila sir (Ed at Ricky Vargas, ABAP President) ay as soon as possible para makahabol kami du'n bago magkatapusan ng February or 1st week of March,” pahayag ni Velasco sa PSC Hour sa Radyo Pilipinas 2 noong Biyernes. “’Yun talaga ang plano, kaya wala namang tigil silang kaka-contact sa mga official du'n para matanggap tayo para pagdating natin doon, dahil alam naman natin na maraming proseso bago pa tayo makapag-training sa kanila eh.”

Inilahad din ni Velasco na unang plano ng ABAP na dalhin ang koponan sa Europa at U.S, ngunit dahil sa patuloy na pagtaas sa bilang ng mga kaso ng Covid-19, kabilang din umano ang matagal na quarantine at protocols na maaaring tumagal ng halos 1 buwan.

Ikinuwento rin ng national coach na maganda ang nagiging resulta ng pagsasanay na ginagawa ng mga boksingero sa loob ng bubble camp training sa Inspire Sports Academy sa Calamba, Laguna kabilang sina 2021 Tokyo Olympics-bound Irish Magno, hopefuls 2019 AIBA world champion Nesthy Petecio at SEAG medalist Riza Pasuit, kasama ang mga sparring partners na sina dating AIBA world titlist at 5-time SEAG gold medalists Josie Gabuco, biennial meet medalist Aira Villegas at Claudine Veloso.

Laro ng Gilas Pilipinas sa FIBA Asia Cup, kanselado

ni Gerard Peter / VA - @Sports | February 13, 2021

Bunsod ng patuloy na pagtaas sa kaso ng coronavirus disease (COVID-19) sa mga bansa sa Middle East, opisyal nang kinansela ang nakatakdang Doha bubble para sa third window ng 2021 Fiba Asia Cup qualifiers.

Nauna na ring naglabas ng mensahe ang Saudi Basketball Federation sa kanilang social media account na nagsasabing ikakansela na ang mga larong may kinalaman sa Saudi Arabia, Qatar, Syria at Iran na nasa Group E, base umano sa inilabas na paumanhin ng Qatari Federation hinggil sa kanilang hosting. The SBP is saddened by the development especially because we know the kind of work that our Gilas Pilipinas Men’s pool has done in Calamba,” wika ni Panlilio sa kanyang statement. “The players and coaching staff have all sacrificed so much in this process as they’ve been apart from their families to represent the Philippines against South Korea and Indonesia. We are looking forward to seeing them perform because we know that a lot of Filipinos draw inspporation from them as well during these difficult times,” dagdag ni Panlilio na tumatayo ring PLDT Chief Revenue Officer at Smart President and Chief Executive Officer.

Nito ring nagdaang Martes ay kinumpirma ng FIBA Regional Office Asia sa Beirut, Lebanon na ipagpapaliban na ang laban sa pagitan ng Hong Kong at Guam sa Bahrain, Manama sa Pebrero 19 at 21 dahil naman sa paghihigpit sa pagpapapasok ng Bahrain sa kanilang bansa. “FIBA Regional Office Asia has confirmed that the FIBA Asia Cup 2021 Qualifiers games between Hong Kong and Guam scheduled to take place in Manama, Bahrain on February 19 and 21 have been postponed due to restrictions imposed by the Bahrain authorities,” ayon sa FIBA website.

Gayunpaman, itutuloy pa rin umano ang nakatakdang laban sa pagitan ng New Zealand at Australia sa Pebrero 20 sa Cairns, Australia. “The other Group C game between New Zealand and Australia will take place as scheduled on February 20 in Cairns Australia. The status of those games will be decided at a later stage.

Isa rin sa mga koponang nakatakda sanang magtungo ng Doha ang Gilas Pilipinas para maglaro sa huling yugto ng qualifiers sa Pebrero 18 - 23 na magtatalaga kung sinu-sino ang mga makakapasok sa continental tilt sa Agosto. Sa darating na Sabado na ang nakatakdang pag-alis ng Philippine men's basketball team ngunit hanggang noong isang araw habang sinusulat ang balitang ito ay wala pa silang natatanggap na komunikasyon mula sa FIBA kung tutuloy pa sila o hindi. Pero kahapon ay kinumpirma na ito ng Samahang Basketbol ng Pilipinas.

Inilahad na ang official statement mula sa FIBA hinggil sa estado ng nasabing 3rd window games. Ang kanselasyon sa Doha bubble ay nakaapekto sa tatlong grupo sa qualifiers. Ang mga ito ay ang Group A na kinabibilangan ng Gilas, Korea, Thailand at Indonesia; ang Group B, na binubuo ng China, Japan, Chinese Taipei at Malaysia at ang Group E na kinabibilangan ng Iran, Syria, Saudi Arabia, at ng host Qatar.

Nauna rito, nagsabi ng hindi makakalaro ang Chinese Taipei at Malaysia dahil pinag-iingatan nila ang kalusugan ng kanilang teams.

E-karateka pandemic gold champ De Los Santos, naka-ginto uli

ni Gerard Peter - @Sports | February 12, 2021

Muling sumipa ng panibagong gintong medalya si dating national karateka Orencio James “OJ” De Los Santos sa katatapos lang na 1st Inner Strength Martial Arts International eTournament, habang humataw ng kambal na titulo si Fatima A-Isha Lim Hamsain sa parehong torneo.

Bumanat ang 30-anyos na dating 2017 Southeast Asian Games Individual kata bronze medalist ng ikalawang gintong medalya ngayong taon laban sa mga katunggali mula sa United Kingdom, Switzerland at Slovenia.

Sinibak ng De La Salle University graduate si George Phillips ng United Kingdom sa bisa ng 25-22.4 sa quarterfinal round at sunod na natakasan si Matias Moreno Domont ng Switzerland sa pamamagitan ng 24.7-24 sa semifinals, habang tinapos nito ang laban kay Nejc Sternisa ng Slovenia sa championship 25.4-24.6

Naibulsa ni Hamsain ang magkahiwalay na kampeonato sa Female under-16 at under-18 category ng talunin nito sa unang kategorya si Jelizaveta Vasiljeva ng Latvia, 24.1-23.8 sa finals, habang kinalawit nito ang titulo sa mas mataas na kategorya ng takasan si Marie Zinecker ng Germany, 24-23.5 sa championship round.

“I'm very happy to win my second gold for this year, and also proud to see Fatima taking a challenge on herself by joining the older age categories, and ends up winning double gold in the process,” pahayag ni De Los Santos sa panayam ng Bulgar sa online interview. “This will further boost our position in the eKata world rankings and I'm also excited that they will be giving actual medals for this e-tournament. I'm very thankful for the support given to us,” dagdag ni De Lo santos.

Bago matapos ang buwan ng Enero ay ibinulsa ng dating Philippine National Games multi-titlist ang kanyang kauna-unahang gintong medalya ngayon taon sa 2021 Sportsdata eTournament World Series #1 online competition, upang mas lalong pang patibayin ni De Los Santos ang kanyang pamumuno sa world rankings.