9th gold, nasungkit ni De Los Santos sa e-katana

ni Gerard Peter - @Sports | March 17, 2021

Nakamit ni dating two-time Southeast Asian Games medalist Orencio James “OJ” De Los Santos ang kanyang ika-9th gold medal at personal best na 27 points sa nagdaang #2 Katana Intercontinental league Paris.

Dinaig ng 31-anyos na dating national team member si Matias Moreno Domont ng Karate-Do Biel-Bienne Switzerland sa iskor na 27.44-26.32 sa championship round ng e-kata individual Male Seniors match. “In the final round, I faced Switzerland and ended up winning my 9th gold, and first to ever score a 27. That’s a new personal record to me,” pahayag ni De Los Santos sa kanyang Facebook account.

Bago nito makamit ang tagumpay ay tinalo muna nito sa point elimination sina Remi Bonneau ng France (20.6), Alfredo Bustamante ng Estados Unidos (24.36) at David Brierly ng England (22.26), habang nakamit nito ng De La Salle University graduate ang 24.72 iskor. Sa kabilang banda, tinalo naman ni Matias sa elimination round na nakakuha ng highest point na 23.52 sina Fabien Rassaby ng France (21.52), Nejc Sternisa (22.58) at French Joel Carpin (22.24).

Ito na ang ika-45th titulo ng 8-time national games champion kasunod ng panalo sa 2nd leg ng Sportsdata e-tournament World series, Adidas US Karate Open E-Tournament noong isang buwan, habang nanalo rin ito ng gintong medalya sa Athlete’s E-Tournament Series #1, at Budva Winner-Aria Cup #1 eTournament, habang nakuha nito ang ang pinakamataas na puntos sa online-virtual competition sa 1st leg ng Katana International League.

Nakapagwagi na rin ng ginto ngayong taon ang multi-titlist ng Philippine National Games (PNG) sa E-Karate World Series 2021, 1st Inner Strength Martial Arts International eTournament at 2021 Sportsdata eTournament World Series #1 online competition.

Marvelous Hagler, pumanaw sa edad 66

ni Gerard Peter - @Sports | March 15, 2021

Sumakabilang-buhay na ang boxing legend na si undisputed middleweight champion Marvin Hagler, na itinuturing na isa sa mga pinakamatibay at pinaka-aabangang boksingero ng kanyang henerasyon sa edad na 66.

Kinumpirma ito ng kanyang kabiyak na si Kay sa kanyang post sa Facebook upang ihatid ang malungkot na balita sa kanyang mga tagahanga, bagaman, walang malinaw o opisyal na dahilan ng pagkasawi nito sa kanilang tahanan sa Bartlett, New Hampshire. “I am sorry to make a very sad announcement. Today unfortunately my beloved husband Marvelous Marvin passed away unexpectedly at his home here in New Hampshire,” ayon sa inilabas na liham ng kabiyak. “Our family requests that you respect our privacy during this difficult time.”

Naglabas din ng sarili nilang statement at pagkilala ang Top Rank Promotions ni Bob Arum hinggil sa pagkasawi ng ikatlong boksingero na may pinakamatagal na may hawak ng unified championship sa kasaysayan sa 12-title defenses. “Marvelous Marvin Hagler was among the greatest athletes that Top Rank ever promoted. He was a man of honor and a man of his word, and he performed in the ring with unparalleled determination. He was a true athlete and a true man. I will miss him greatly,” pahayag ni Arum.

Nagsimulang sumabak sa mundo ng boxing si Hagler simula noong 1973-1987 para sa kanyang kartada sa 62 wins 3 talo at 2 tabla, na may 52 panalo mula sa knockout. Ilan sa mga makasaysayang laban nito ay naganap noong 1985 matchup sa Caesars Palace sa Las Vegas, Nevada laban kay Thomas "Hitman" Hearns na binansagang “The War” dahil sa umaatikabong bakbakan nito.

Napanalunan ni Hagler ang World Boxing Council at World Boxing Association middleweight titles noong 1980 nang pigilan nito si Britain's Alan Minter sa ikatlong round sa Wembley Arena sa London, habang nakamit nito ang inaugural title na International Boxing Federation noong 1983.

Isa si Hagler sa tinaguriang “The Four Kings” ng Dekada 80 kasama sina Hearns, "Sugar" Ray Leonard at Roberto Duran.Sa isang dekada mula 1976 hanggang 1986, ay hindi nabahiran ng pagkatalo si Hagler para sa 36 sunod na panalo at isang tabla, para hirangin itong Fighter of the Year noong 1983 at 1985 ng Boxing Writers Association of America, habang binigyang parangal din ito bilang Fighter of the Decade nppng 1980s ng Boxing Illustrated.

Pasok sa Hall of Fame: Jawo, Velasco, Alcantara at Muros

ni Gerard Peter - @Sports | March 14, 2021

Pamumunuan ng tinaguriang the Living Legend ng Philippine basketball Robert “Sonny” Jaworski at Olympic medalists Leopoldo Serrantes at Roel Velasco ng boxing ang listahan ng ika-4th na batch ng Philippine Sports Hall of Fame (PSHOF) kasunod ng masusing pag-aaral at pananaliksik ng mga selection committee noong Biyernes.

Base sa nakasaad sa Republic Act 8757 or the Philippine Sports Hall of Fame Act, pipiliin ang mga sports legends at personalities na nag-ambag at nakapagbigay ng malaking tagumpay para sa bansa sa mga pandaigdigang kompetisyon at naging inspirasyon ng sambayanan sa pagtataguyod ng pampalakasan sa bansa.

Bukod sa basketball icon at dating Philippine Senator na si Jaworski at kina 1988 Seoul Olympics bronze medalist sa men’s light-flyweight na si Serrantes at 1992 Barcelona Olympics men’s light-flyweight third placer at kasalukuyang national boxing coach na si Velasco, parte rin ng 10-man Hall of Famers sina 2-time Olympian at 15-time SEAG at Asian Games gold medalist at “Long Jump Queen” ng Pilipinas na si Elma Muros-Posadas, dating PSC chairman at SEA Games best swimmer Eric Buhain, basketball coach at national football member Dionisio Calvo, World Championships at 1986 Asian Games gold medalist Arianne Cerdena ng Bowling, football legend and great Paulino Alcantara, Olympian swimmer Gertrudes Lozada; at Olympian sprinter at 1962 Asian Games champion Rogelio Onofre.

“It’s been a pleasure. Na-apreciate ko ang review committee, malaking tulong. Salamat sa inyong recommendation. I am glad that a new batch of people who fought for the country and sacrificed a lot will be given recognition to inspire the new generation of sports heroes,” pahayag ni Games and Amusement Board Chairman Abraham “Baham” Mitra sa malaking tulong na ibinigay ng review committee, na sina Philippine Sports Commission (PSC) Chairman William Ramirez, Philippine Olympic Committee (POC) President Abraham Tolentino bilang vice chairperson, kabilang sina Philippine Football Federation SecGen Atty. Ed Gastanes at Philcycling SecGen Atty. Billy Sumagui bilang NSA representatives, Philippine Olympians Association President Akiko Guevara at UAAP Executive Director Atty. Rene Andrei Saguisag Jr bilang private group representatives.

Nagpasasalamat si Muros-Posadas sa nakalipas na TOPS: Usapang Sports webcast nitong Huwebes, bago pa man ianunsyo ang pagkakasama sa kanya sa 10 Hall of Famer. “Sa aking palagay ay tatanawin kong isang malaking karangalan na mapabilang sa listahan ng Hall of Famers. Matanda na rin ako pero di ako nagsasawa sa pag-develop ng mga player. Bilang stepping stone sa grassroots, nakaka-inspire ang parangal na ito (kung ako may mapipili), kahit iba ay napupunuan namin ang mga hindi magawa ng mga teachers,” paliwanag ni Muros-Posadas.

Makakatanggap ng tig-P200,000 ang 10-man members ng 4th batch ng HOF, kasama ang PSHOF trophy. Planong isagawa ng kumite ang seremonya ng mas maaga sa Mayo 29.