UST umusad sa semifinals, FEU vs. NU sa Men's finals

by Gerard Arce @Sports News | April 30, 2026

Photo: Todo-banat sa pag-atake si  Shaina Nitura ng Adamson Lady Falcons habang hindi naman nagawang pigilan sa depensa ng katunggaling si Lianne Penuliar ng UST Golden Tigresses sa unang bahagi ng laban sa Final 4 ng UAAP Women's Volleyball Tournament sa Araneta Coliseum kahapon. (Reymundo Nillama)

Mananatiling sasalo ng hambalos para sa UST Golden Tigresses si team captain at ace Libero Detdet Pepito matapos ilaglag ang Adamson Lady Falcons sa bisa ng 25-16, 25-18, 25-19 straight sets kahapon sa step-ladder quarterfinals ng women’s volleyball, habang finalist na sa rematch ang NU Bulldogs at FEU Tamaraws sa UAAP Season 88 volleyball tournament Final 4 kahapon sa Smart Araneta Coliseum.

Nagtala ang graduating floor defender ng kabuuang 16 excellent digs para sa 70% efficiency at umusad sa panibagong win-or-go-home match kontra defending champions NU Lady Bulldogs. “Talagang araw araw kinukulit ko si Lord na pahabain pa yung paglalaro ko sa UST, kase kahit papaano makakabawi pa next season ‘yung Adamson ako hindi na. Kaya thank you Lord, lalo’t pinaghirapan namin ito talaga,” pahayag ng 23-anyos na two-time UAAP Best Libero. 

Bumirada ng husto pagdating sa iskoring ang mga beteranong manlalaro sa pangunguna ni dating Rookie of the Year Angge Poyos sa 17 puntos. Nabalewala naman ang paghihirap ni presumptive league MVP Shaina Marie Nitura na tumapos ng double-double sa 13 puntos, 11 receptions at 7 digs. Nakaabang naman ang unbeaten De La Salle University kasunod ng 14-0 sweep sa eliminations.    

Nuns vs. St. John agawan sa Final 4 ng SGVIL-DLSU

by Gerard Arce @Sports News | April 29, 2026

Photo: Ang top 8 teams sa quarterfinals ng Shakey’s Super League GVIL Rising Stars Cup, sino ang mananaig para makatuntong sa finals? (fbpix) 

Itataya ng defending champion National University Nazareth School (NUNS) ang korona laban sa St. John’s Institute sa win-or-go-home final eight upang makapasok sa pinag-aagawang Final Four ngayong araw sa Shakey's Girls Volleyball League sa La Salle Green Hills Gym.

Pipilitin ng grupo nina Raine Alonzo, Bella Cruz at Alas Pilipinas Girls member Xyz Rayco na mapanatili ang unbeaten record sa pagsisimula ng mga aksyon bandang alas-10:00 ng umaga sa Court 1.

Mayroong malinis na kartada ang Lady Pullpups kasunod ng 4-game sweep sa Pool A na hanap ang maging kauna-unahang back-to-back champions ng pinakamalaking grassroots volleyball league na suportado ng Shakey’s Pizza Parlor at Peri-Peri Charcoal Chicken. 

Makikipagtagisan naman ang Pool C second place St. John’s na ilalaban nina high-scoring winger Caera Celis at Kristel Mirasol upang maitala ang malaking upset, habang ang last year runner ups na Bacolod Tay Tung ay nanatiling walang talo sa apat na laro na haharapin ang Season 2 champion Adamson University sa maituturing na rematch noong 2024 title showdown.

Ang Pool D queens na University of Santo Tomas ay makakaharap ang King’s Montessori School, habang ang unbeaten na FEU-Diliman ay makakaharap ang Immaculada Conception College sa Court 2.

Ang reigning Division 2 champion na Domuschola International School ay haharapin ang undefeated na University of Batangas High School sa quarterfinal meeting, habang ang UST-B at Bacolod Tay Tung-B ay bubuksan ang sagupaan sa Court 1, gayundin ang walang talong NUNS-B laban sa DLSU Green Hills, habang ang Corpus Christi School ay babanggain ang St. Jude sa Court 2.

Masisilayan ang quarterfinal matches sa best-of-3 sets format, habang ang semifinal at final ay gagawing best-of-five sets at winner-take-all matches, ayon sa pagkakasunod sa mga larong mapapanood at matutunghayan sa live at on-demand sa PusoP.com livestream at Solar Sports.

Phl women sprint team silver medalist sa ABG

by Gerard Arce @Sports News | April 27, 2026

Photo: Silver medalist ang  Philippine women’s relay team na sina multi-medalist Kristina Knott, Jessica Laurance, Shane Joy Ponce, at Lianne Diana Pama sa  4x60m relay sa 2026 Asian Beach Games kahapon sa Sanya, China. (pocmediapool)

Rumatsada sa ikatlong sunod na panalo ang women’s beach volleyball quartet upang makapasok sa quarterfinal round, habang lumista ng dagdag na silver medal ang women’s sprint team sa 4x60-meter relay kahapon sa 2026 Asian Beach Games sa Sanya, China.

Dinomina ng tambalan nina Khylem Progella at Sofia Pagara ang pares nina Yekaterina Ryukhova at Kristina Karimova ng Kazakhstan sa iskor na 21-11, 21-14 sa Tianya Haijiao Venue Cluster TNH Venue Cluster Court 1 sa round-of-16.

Sa kabilang pares, pinataob ng duo nina Southeast Asian Games champion Sunny Villapando at katuwang na si Grydelle Joanice Matibag ang samahan nina Shehani Wattelage at Ktl Alawaththage ng Sri Lanka sa bisa  naman ng 21-15, 21-13.

“We started a little bit shaky towards the end, but the persistence and the willingness for us to come and to make good movement gave us the lead,” wika ni Matibag, na suportado nina Philippine Olympic Committee President Abraham “Bambol” Tolentino at Philippine Sports Commission chairman Patrick “Pato” Gregorio

Nakahirit ng silver medal ang grupo nina Jessica Rose Laurance, Shane Joy Ponce, Lianne Diana Pama at Olympian Kristina Marie Knott sa 4x60-meter relay sa Phoenix Island ng tumapos ng 29.73 seconds, na kinapos lang ng katiting na milliseconds sa likod ng Thailand na nakuha ang ginto sa bisa ng 29.46 seconds, habang ang host nation China ay nakuntento sa bronze medal sa 30.42 seconds.

Kasalukuyang may 3 ginto, at tig-2 pilak at tanso ang Pilipinas sa third spot sa likod ng host country China na may 13-11-4 (gold-silver-bronze) medals, habang malayong segunda ang Thailand sa 4-5-3. Nagmula ang tatlong ginto ng bansa mula kina 3-time Asian Beach Games jiu-jitsu gold medalist Annie Ramirez, Alex Enriquez sa women’s under-63kgs division ng jiu-jitsu at Leonard Grospe sa men’s high jump.