'D Incredible Dy, mabigat ang hamon laban kay Malignaggi

by Gerard Arce @Sports News | May 8, 2026

Photo: File / Dy vs Malignaggi

Mabigat na depensa ang kahaharapin ni World bare-knuckle champion Rolando “D-Incredible” Dy laban sa dating 2-time world boxing titlists Paulie “Magic Man” Malignaggi para depensahan ang Bare Knuckle Boxing (BKB) Police Gazette World super-welterweight title sa BKB 54: Mayhem sa Manchester sa Linggo ng umaga (oras sa Pilipinas) sa AO Arena sa Manchester, United Kingdom.  

Bagaman aminadong mas marami ng karanasan pagdating sa fist-fighting matches ang 34-anyos na dating Mixed Martial Arts titlists, nananatiling mataas ang respeto at pagkilala kontra beteranong boxer mula Brooklyn, New York. “Tingin ko kasi I fought better bareknuckle boxers kaysa sa kanya. I was tested sa BKB eh. Siya hindi pa. Pero I still don't underestimate him. Two-time world champion pa rin ng boxing yun,” pahayag ni Dy sa mensahe nito sa Bulgar Sports.

Binira ni Dy ang ikatlong sunod na panalo ang unang kampeonato sa Bare Knuckle kontra Liam Rees ng United Kingdom sa bisa ng 6-round unanimous decision noong Dis. 5, 2025 sa BKB 49: “Dance of the Dragons” sa Vale Arena sa Cardiff, Wales, UK sa bisa ng 59-54 at 58-55 sa mga hurado.

Dahil sa panalo ay naiangat ng Pinoy fighter ang kanyang kartada sa 5-1 rekord kasama ang tatlong panalo mula sa knockouts, kabilang ang pagpapabagsak sa anak ni boxing legend Roberto Duran na si Roberto Jr. noong Mayo 31, 2025 sa BKB 41: Brawl in Duval 2 sa bisa ng third round.

Kaugnay ng nalalapit na laban kontra sa dating world super-lightweight boxing champion na si Malignaggi, na sasabak sa kanyang ikatlong bira sa bare-knuckle bout, sisiguraduhin ng dating UAE Warriors Featherweight titlists na gagamiting diskarte nito ang kanyang karanasan sa MMA at iiwasang magamit ng bentahe ni Malignaggi ang kanyang malawak na kaalaman sa boxing. 

Canino ng Lady Spikers at Buddin ng NU, birador ng Game 1 finals

by Gerard Arce @Sports News | May 7, 2026

Photo: Mabilis na umatake ng bola si National University Lady Bulldogs team captain Vange Alinsug laban sa dobleng depensa nina Shevana Laput at Katrina Del Castillo ng De La Salle University Lady Spikers sa paghaharap nila sa UAAP Season 88 Women’s Volleyball Tournament championship Game 1 finals sa MOA Arena, Pasay City. (Reymundo Nillama)

Mga laro sa Sabado

(MOA Arena)

11 a.m. - Men's Awarding Ceremony

12 p.m. - NU vs FEU (Men's Finals)

4 p.m. - Women's Awarding Ceremony

5 p.m. - NU vs DLSU (Women's Finals) 

Tinudla ng De La Salle University Lady Spikers ang kumbinsidong panalo mula sa pagbida ni dating Rookie/MVP Angel Anne Canino upang dalhin ang koponan sa 25-23, 25-18, 25-18 straight sets kontra sa mahigpit na karibal na defending champions National University Lady Bulldogs, habang lumapit naman sa ika-anim sunod na kampeonato ang NU Bulldogs nang itala ang come-from-behind panalo laban sa top seed Far Eastern University Tamaraws sa 21-25, 25-19, 21-25, 25-20, 15-8 sa Game 1 ng men’s volleyball finals sa dobleng championship aksyon kahapon sa UAAP volleyball tournament sa MOA Arena sa Pasay City.

Lumapit sa ika-13 kampeonato ang green-and-white lady squads na ipinakita ang matinding pagnanais na mabawian ang Lady Bulldogs na nagpataob sa kanila noong nagdaang season, tangan ang mahigpit na determinasyon upang mapanatiling undefeated sapol nung preliminary round sa pagkuha ng 14-0 tungo sa awtomatikong pagpasok sa best-of-three finals.

Nanguna ang tubong Bacolod City spiker sa kabuuang 17 puntos. “I guess yung turning point yung reminder ni coach (Ramil De Jesus), kase medyo tense kami sa simula, and ni-remind lang kami kung ano yung mga pinaghirapan at pinag-aralan namain during trainings. Malaking bagay yung ginising kami ni coach,” pahayag ng 22-anyos na outside hitter, sa kanyang ika-apat na taon sa liga. 

Kinapos naman para sa NU Lady Bulldogs si Arah Panique sa 18 puntos. Naging pangunahing birador para sa NU Bulldogs sina Alas Pilipinas members Michaelo Buddin, Jade Disquitado, at Leo Ordiales para ihataw ang mga krusyal na atake upang pagbidahan ang defending champions para hanapin ang panibagong kampeonato. Umiskor si Buddin ng 20 puntos.

WBC Champ Jerusalem planong pataubin si Kuse

by Gerard Arce @Sports News | May 6, 2026

Photo: File / Circulated

Hindi inaalis ng kampo ni reigning World Boxing Council (WBC) minimumweight champion Melvin “El Gringo” Jerusalem ang peligrosong hatid ng pagdayo sa South Africa para idepensa ang korona sa ikalawang pagkakataon laban kay challenger Siyakholwa Kuse sa Sabado ng gabi sa Emperor’s Palace, Kempton Park, sa Johannesburg, South Africa.

Subalit, handang-handa umano ang 2-time world champion sa anumang labang ipakikita ng hometown bet na minsan na niyang tinalo sa main event bout ng Manny Pacquiao Presents: Blow-by-Blow “Thrilla in Manila II” noong Oktubre 2025 sa Smart Araneta Coliseum sa bisa ng 12-round unanimous decision sa iskor na 115-113, at dalawang 116-112 sa mga hurado, kung saan inamin ni Jerusalem na hindi siya kumbinsido sa panalo.

“Kung sa negative side, yes risky siya, pero positive kami ni Melvin kaya walang problema,” pahayag ni 2-time Trainer of the Year Michael Domingo sa mensahe nito sa Bulgar Sports kahapon na nagawa pang magbiro, na kahit sa harap pa mismo ng bahay ni Kuse.

“Kailangang magawa lang ni Melvin yung game plan namin, na hindi niya masyadong nagawa last fight, kaya mas magiging madali itong laban kung magagawa ni Melvin yung plano.”

Tatlong linggo bago ang laban ay dumating sa South Africa sina Domingo at Jerusalem upang ipagpatuloy ang paghahanda at ang kanyang kabuuang siyento-por-siyento na kondisyon at preparasyon sa laban.

Bagaman mapanganib ang naturang hakbang sa ikaapat na title defense ni Jerusalem (25-3, 12KOs) siniguro ni Sanman Promotions promoter Jim Claude Manangquil na mangagaling ang mga hurado at referee mula sa neutral na bansa. “Melvin has a tough opponent and a decent fighter, but Melvin gives a good fight. Nag-perform naman siya abroad and outside of the country. He just took care of the jetlag and high-altitude kaya maaga sila dun,” saad ni Manangquil sa panayam ng Bulgar Sports sa telepono kasunod ng mataas na lugar ng South Africa na may 6,000 talampakang taas.