Pac-May 2 inilipat sa Setyembre sa MGM Grand

by Gerard Arce @Sports News | May 11, 2026

Photo: Netflix

Matapos ianunsyo ang paglayo sa The Sphere sa Las Vegas ng inaantabayanang makasaysayang rematch sa pagitan nina unbeaten Floyd “Money” Mayweather at nag-iisang eight-division titlist Manny “Pacman” Pacquiao, panibagong petsa naman sa Setyembre 26 ang nakikitang paggaganapan sa ilalim pa rin ng Netflix.

Ayon sa report na inilabas ng Boxingscene, inihayag ng dalawang opisyal na malapit sa negosasyon, na nakikita nilang gaganapin ang malaking rematch sa pinagganapan sa unang paghaharap sa MGM Grand Garden Arena, mismo pa rin sa Las Vegas, Nevada. “Both camps had agreed already on all the conditions,” ayon sa isang opisyales sa panayam ng Boxingscene.

Mayroong nakalatag na concert sa The Sphere, na pagmamay-ari ng Madison Squarer Garden, sa Setyembre 19 na katatampukan ng legendary band na Eagles, kaya’t ito ang isa sa naging dahilan upang ilipat ang laban, kung saan unang nakalatag ang bakbakan sa parehong petsa.

Isa pa sa mga tinitingnang kadahilanan ay ang maitulak ang karagdagan pag-aalok ng mga pakete ng tiket sa mga high-roller na manunugal sa maraming property nito sa kahabaan ng The Strip, ang MGM ay regular na nagsasagawa ng mga fight-week event para sa madalas nitong pagtakbo ng mga high-profile boxing card tulad ng Cinco de Mayo weekend card na ginanap sa T-Mobile Arena.

Mahigit 11- taong inabangan ang malaking rematch na naunang nasilayan nung Mayo 2, 2015 na binansagang “Battle for Greatness” o “Fight of the Century” na ginanap sa jampacked na MGM Grand, kung saan lumikha ng kasaysayan pagdating sa pay-per-view at kabuuang kinita sa pandaigdigang kinita.

Nagawang magbalik sa professional bout si Pacquiao, matapos magretiro nung Agosto 2021, para magbalik laban para sa World Boxing Council (WBC) welterweight title kontra Mario “El Azteca” Barrios na nauwi naman sa majority draw nung Hulyo 20, 2025 sa sold-out na MGM Grand sa Las Vegas.

DLSU Lady Spikers champ, perpekto sa 13th crown

by Gerard Arce @Sports News | May 10, 2026

Photo: Ang mga individual awardees na sina (mula kaliwa) Shevana Laput-Best Opposite spiker, Amie Provido ng DLSU - Best 1st Middle Blocker, Nina Ytang -2nd Best Middle Blocker, Angel Canino DLSU- Best 2nd Outside Spiker, Shaina Nitura Adamson - MVP/1st Best Outside spiker, Felicity Sagaysay - Best setter, Shaira Jardio - Best Libero at Samantha Cantada- Rookie of the year habang Most Valuable Player si Nitura sa UAAP 88 Women's Volleyball na ginanap kahapon sa MOA Arena, Pasay City. (Reymundo Nillama)

Nakamit ng De La Salle University ang perpektong season upang makamit ang Lucky No. 13 na kampeonato kasunod ng pambihirang triple-double ni dating Rookie/MVP Angel Anne Canino para tuluyang patalsikin ang dating kampeon na National University Lady Bulldogs sa bisa ng 25-22, 25-16, 25-16 straight sets, habang nakumpleto ng NU Bulldogs ang ika-anim na sunod na korona matapos walisin ang Far Eastern University Tamaraws sa iskor na 26-24, 25-22, 25-22, kahapon sa dobleng selebrasyon na tampok sa UAAP season 88 volleyball tournament kahapon sa SM Mall of Asia Arena sa Pasay City.

Tinuldukan ng La Salle ang tatlong taong title drought sa harap ng 17,596 manonood para walisin ang buong season kasunod ng 16-0 rekord sa preliminary round hanggang finals, habang nakabawi sa Lady Bulldogs na tumibag sa kanila noong isang taon.

Nasundan din ng La Salle ang ginawa noong 67^th season para kumpletuhin ang dominasyon ngayong season, matapos walisin sa Game One ang NU kasunod na kinubra ni Canino sa 11 puntos, 10 excellent digs at 10 excellent receptions, habang bumida naman sa puntusan si Shevana Laput sa 20 puntos mula sa 14 atake at anim blocks kasama ang walong digs.

Nag-ambag din sina Mary Shane Reterta sa 8pts at 9 receptions, Lilay del Castillo sa walo at Amie Provido sa siyam, gayundin si rookie setter Eshana Nunag sa 17 excellent sets at floor defense ni Lyka De Leon sa 10 digs at 7 receptions.

Nakuntento sa silver medal ang NU Lady Bulldogs matapos pagreynahan ang dalawang nagdaang season, na pinagbidahan ni Vange Alinsug sa 14 puntos at tig-4 na digs at receives, habang sinundan ni Sam Cantada sa 8 pts at 8 receptions, Chams Maaya sa anim at Arah Panique sa pito.

OCA at 'Pinas ihahanda ang Cebu sa Asian Beach Games

by Gerard Arce @Sports News | May 8, 2026

Photo: File / Olympic Council of Asia (OCA)

Nakipagpulong si Olympic Council of Asia (OCA) president Sheikh Joaan bin Hamad Al-Thani kay Pangulong Ferdinand “Bong Bong” Marcos Jr. upang iparating ang pahintulot sa hosting ng bansa sa Seventh Cebu Asian Beach Games (ABG) sa 2028 sa isinagawang courtesy call sa Malacañang.

Ito ang kauna-unahang pagkakataon na maisagawa ang mahalagang pagpupulong sa pagitan ng pinuno ng OCA at ng isang pangulo ng Pilipinas sa Palasyo, kasama sina Philippine Olympic Committee president Abraham “Bambol” Tolentino at Philippine Sports Commission chairman Patrick “Pato” Gregorio.

“Sheik Al Thani discussed with the President [Marcos] the importance of sports cooperation on top of the support on the hosting of the ABG in 2028,” wika ni Tolentino, na matagumpay na tinanggap ang hosting ng bansa matapos iwinagayway ang bandila ng OCA sa closing ceremony noong nakaraang linggo.

Pagkakataon muli ng bansa na maging punong-abala sa isang event ng OCA na nagpapakita ng malawig at papataas na estado ng pampalakasan kasunod ng 3 gintong medalya na nakuha ng bansa sa huling dalawang Summer Olympic Games.

Naging makatotohanan ang pagpupulong matapos na iabot ni Sheik Al Thani, na siya ring presidente ng Qatar National Olympic Committee, ang bandila ng ABG bilang pagpapatunay ng hosting ng Pilipinas para maging punong-abala sa multi-sports games sa pagtatapos ng Sixth ABG sa Sanya, China.

Nakatakdang simulan ang hosting ng bansa mula Marso 7-16, 2028, kung saan opisyal na tatayong presidente at CEO ng Cebu ABG Organizing Committee, o CABGOC si Ramon “Tats” Suzara matapos italaga ng POC at PSC.

“Sheik Al Thani also discussed with the President how to strengthen cooperation in sports development, including athlete training, institutional collaboration and opportunities for the Philippines to host future regional and international competitions,” pahayag ni Tolentino.