Sablay pagtalaga ni PBBM kay Laurel sa DA, itlog lang hindi pa magawang pababain ang presyo

ni Pablo Hernandez @Prangkahan | Feb. 16, 2025

WALANG IBANG DAPAT SISIHIN SA SANGKATERBANG PARTYLIST NG MGA POLITICAL DYNASTY, NEGOSYANTE AT KONTRATISTA, KUNDI ANG COMELEC -- Ibinulgar ng Kontra-Daya na sa 156 partylist na tumatakbo ngayong halalan ay 86 dito ang hindi mula sa marginalized sector, at kabilang daw dito ang 40 na mula sa political dynasty, habang 25 ay partylist ng mga negosyante at kontratista.

Sa totoo lang, wala namang ibang dapat sisihin diyan kundi ang Commission on Elections (Comelec) kung bakit tinanggap nila at pinayagan nilang kumandidato ang mga partylist na iyan, pwe!

XXX

MARAMING PARTYLIST ANG HINDI PINAYAGAN NG COMELEC NA KUMANDIDATO KAYA’T ANG TANONG: BAKIT PARTYLIST NG MGA POLITICAL DYNASTY PINAYAGANG KUMANDIDATO? -- Ang ikinatuwiran ng Comelec ay wala raw silang magawa dahil may desisyon daw ang Supreme Court (SC) na payagang kumandidato ang mga partylist na hindi mula sa marginalized sector.

Kahit may desisyong ganyan ang SC, ay nasa Comelec pa rin ang pagpapasya kung papayagan ang partylist na kumandidato o hindi.

Nasabi natin ito kasi may mga partylist naman na dinidiskuwalipika ng Comelec, hindi nila pinapayagang kumandidato, kaya’t nakapagtataka talaga kung bakit pinahintulutan ng komisyon na kumandidato ang partylist ng mga “Kamag-Anak Inc.”, mga negosyante at kontratista, tsk!

XXX

SP CHIZ ESCUDERO, TAKOT BA SA PAMILYA DUTERTE? -- Sa kabila na lumalakas na ang panawagan ng mamamayan na gawin na ng Senado ang tungkulin nitong magsagawa ng impeachment trial kay Vice Pres. Sara Duterte-Carpio, ay dedma pa rin si Senate Pres. Chiz Escudero, talagang naninindigang sa July 2025 na raw sila magsasagawa ng pagdinig sa mga impeachment case na inihain ng Kamara laban sa bise presidente sa Senado.

Dahil ayaw pang umpisahan ang impeachment trial, napuputakti tuloy ng batikos si SP Escudero, na ayon sa netizens, kaya raw ayaw pang umpisahan ang impeachment trial ay dahil malaki raw ang takot nito sa pamilya Duterte, boom!

XXX

ITLOG LANG HINDI MAGAWA NI SEC. LAUREL, PABABAIN ANG PRESYO -- Ubod na pala ng mahal ang presyo ng itlog sa merkado. Isa iyan sa patunay na sablay ang pagtalaga ni Pres. Bongbong Marcos (PBBM) kay Sec. Francisco Tiu Laurel bilang kalihim ng Dept. of Agriculture (DA).

Nasabi nating sablay, kasi mantakin n’yo, itlog na nga lang, hindi pa magawang pababain ang presyo, tsk!

Pagdiriwang ng ika-30 taong anibersaryo ng PhilHealth

ni Fely Ng @Bulgarific | Feb. 16, 2025

Hello, Bulgarians! Ang newly-appointed President at CEO ng PhilHealth na si Dr. Edwin M. Mercado, kasama ang 9,000 opisyal at empleyado mula sa buong bansa ay ipinagdiwang ang ika-30 taong anibersaryo ng state insurer sa isang solemn Eucharistic Mass noong Pebrero 14 at si Father Jerry Orbos, SVD, ang nangasiwa nito.

Upang masunod ang direktiba ni Pangulong Ferdinand “Bongbong” Marcos, Jr., sa pagtiyak na walang hadlang na mga serbisyo, ang misa ay nasundan ng isang board meeting na pinamunuan ni Health Secretary Teodoro Herbosa. Tinalakay ang mga isyu sa critical policy, na tumutugon sa parehong mga pangangailangan ng mga provider at miyembro.

“Nais nating tapatan ng buong pusong paglilingkod ang mainit na pagtanggap ng ating stakeholders, public health and medical communities, at lalung-lalo na ng mga kawani ng PhilHealth na siyang katuwang natin upang mas palawigin pa ang ating serbisyo,” pahayag ni Mercado.

Tatlumpung taon mula nang mabuo, ang PhilHealth ay nananatiling nakatuon sa paghahatid ng de-kalidad at mas tumutugon sa pangangalagang pangkalusugan para sa lahat ng Pilipino.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Kung ang Feb. 14, Araw ng mga Puso, sa May 12 naman, ‘Araw ng mga Walang Utak’!

ni Pablo Hernandez @Prangkahan | Feb. 14, 2025

FEB. 14, ARAW NG MGA PUSO, AT SA MAY 12 ELECTION DAY, ‘ARAW NG MGA WALANG UTAK’ -- Ngayong araw na ito, Feb. 14, 2025 ay Araw ng mga Puso o Valentine’s Day. Sa May 12, 2025, election day puwede itong matawag na “Araw ng mga Walang Utak” kasi sigurado, maraming bobotante ang maghahalal na naman sa mga kandidatong trapo, kurakot at ‘Kamag-anak Inc.’, period!

XXX

PBBM, PRESIDENTENG MINSAN NAGIGING KOMEDYANTE -- Maraming netizens ang nag-haha reactions sa sinabi ni Pres. Bongbong Marcos (PBBM) na ang lahat daw ng 12 candidates niya sa pagka-senador ay may “clean record.”

Aba’y marami talagang matatawa kasi hindi naman kapani-paniwala ang sinabi ng Presidente na malinis ang pagkatao ng kanyang mga senatorial candidate.

Iyan si PBBM, ang presidenteng minsan nagiging komedyante, boom!

XXX

KAYA SIGURO WALANG SENADOR NA KINASUHAN SINA ALVAREZ BAKA MAGALIT, IMBES ‘NO,’ MAG-‘YES’ VOTES ANG MGA ITO SA IMPEACHMENT KAY VP SARA -- Ipinagtaka nina 1Rider partylist Rep. Rodge Gutierrez at Taguig City Rep. Amparo Zamora kung bakit sina Speaker Martin Romualdez, Majority Floor Leader, Zamboanga City Rep. Mannix Dalipe at Ako Bicol partylist Rep. Zaldy Co, dating chairman ng House Committee on Appropriations lang ang sinampahan ng grupo ni Zamboanga del Norte Rep. Pantaleon Alvarez ng mga kasong graft, ang criminal cases na may kaugnayan sa sinasabing insertions sa 2025 General Appropriations Act (GAA), gayong may mga senador din daw na miyembro ng Bicameral Conference Committee na nagsaayos ng 2020 national budget.

Siguro, kaya walang isinamang senador sa kinasuhan ay dahil ayaw ng kampo ni Alvarez na magtanim ng galit ang sinumang senador na makakasuhan, na ‘ika nga, baka sa impeachment trial kay VP Sara ay imbes “no” ang maging boto ay maging “yes” para ma-impeach ang bise presidente, period!

XXX

MAKALAYA KAYA SA PANAHON NG MARCOS ADMIN ANG PORK BARREL QUEEN? -- Inabsuwelto ng Sandiganbayan ang binansagang pork barrel queen na si Janet Napoles kasama ang dating Agusan del Sur Rep. Rodolfo Plaza at iba pa sa P27.5 million graft case na may kaugnayan sa pork barrel scam.

Iyang sunud-sunod na pagkakaabsuwelto ni Napoles sa mga kasong plunder at graft na isinampa sa kanya ay nakikita na natin na sa panahon ng Marcos administration, lalaya ang pork barrel queen, boom!