Dating starlet ng Kamuning Network, sosyal na… SHUVEE, BAGONG ENDORSER NG LOUIS VUITTON

ni Erlinda Rapadas @Teka Nga | September 21, 2025

Photo: Shuvee Etrata - IG

Ngayon pa lamang ay may paalala na ang mga nagmamalasakit kay Shuvee Etrata na huwag siyang ma-fall kay Paolo Contis. 

Bukod kasi kay Dingdong Dantes ay kasama rin sa upcoming seryeng Master Cutter si Paolo kaya may warning na ang mga kaibigan ni Shuvee na mag-ingat at dumistansiya sa chickboy na aktor. 

Baka raw matulad siya kina LJ Reyes at Yen Santos na pinaibig at iniwan lang ni Paolo.

Ganunpaman, marami naman ang nagsasabing guarded si Shuvee ng kanyang manliligaw na si Anthony Constantino na isa ring Sparkle artist. Siya ang dreamboy ni Shuvee na TDH – tall, dark and handsome. 

Strong ang character ni Shuvee at ang priority ay ang kanyang pamilya. Siya ang breadwinner kaya hindi pa handa sa seryosong relasyon.

Samantala, sa kabila ng kanyang tinatamasang tagumpay ngayon, hinding-hindi malilimutan ni Shuvee ang kabaitan at kagandahan ng loob ng BFF niyang si Ashley Ortega. 

Nagkasama sila noon sa seryeng Hearts on Ice (HOI) ng GMA-7 kung saan si Ashley ang bida. At that time, walang permanenteng tirahan si Shuvee kaya inalok siya ni Ashley na tumira sa kanyang condo. 

Wala pa ring gaanong gamit noon si Shuvee kaya pinahihiram siya ni Ashley ng bag at sapatos.

Pero nasira ang Christian Dior shoes ni Ashley na kanyang ginamit kaya nang mag-show sila sa Japan at may nakita siyang shop ng Christian Dior, bumili siya ng sapatos para kay Ashley. 

Wala man siyang nabili para sa kanyang sarili, happy siya na may maibibigay siya sa BFF.

Bongga rin ang mga endorsements na dumarating ngayon kay Shuvee Etrata. Kasama siya sa mga selected endorsers ng Louis Vuitton. Sosyal na ang porma niya, hindi na siya ang dating starlet ng Kamuning Network.

---

HINDI na ikinagulat ng marami ang breakup nina Julia Barretto at Gerald Anderson kahit 6 na taon tumagal ang kanilang relasyon. 

Umpisa pa lamang ay tinaningan nang hindi magtatagal ang kanilang love story dahil may track record na kasi si Gerald na hindi nagtatagal sa kanyang pakikipagrelasyon.

Nasubaybayan ng publiko ang kanyang love life mula kina Kim Chiu, Maja Salvador, Bea Alonzo atbp.. Short-lived din ang romansa nila noon ni Pia Wurtzbach. 

Kaya, expected na ng lahat na mauuwi rin sa paghihiwalay ang relasyon nila ni Julia Barretto — na nangyari na nga.

Bagama’t hindi nila ipinaalam sa publiko ang dahilan ng kanilang paghihiwalay, hindi na rin pinag-interesan pang malaman ng publiko. May bagong babae na ngayon sa buhay ni Gerald, ang maganda at sikat na volleyball player ng Cignal HD Spikers na si Vanie Gandler.  

Tulad ng dati, hindi na ine-expect ng lahat na mauuwi sa kasalan ang relasyong Gerald-Vanie. At this point of his life, mahihirapan na si Gerald Anderson na makahanap ng babaeng kanyang pakakasalan.  Hindi pa rin kasi maalis ang kanyang image na chickboy.

---

NAG-VIRAL ang parody na ginawa ni Michael V. sa kontrobersiyal na lady contractor na si Sarah Discaya. 

“Ciala Dismaya” ang version ni Bitoy at maraming viewers ang aliw na aliw sa kanya. 

Maski ang ibang personalidad na involved sa hearing ng flood control projects ay binuhay din ang mga character sa Bubble Gang (BG).

Milyun-milyong viewers ang naitala sa episode 1 ng Ciala Dismaya Scandal, lalo na’t nasundan pa ito ng iba pang memes. Bagama’t parody lamang ang ginawa ni Michael V., maraming viewers ang nag-react at naaliw. Seryosong issue ito na sinusubaybayan ng sambayanang Pilipino.

Bagong labs ni Daniel, ibang-iba kay Kathryn na sunud-sunuran… KAILA, PALABAN, MAY 9 NA TATTOO SA KATAWAN

ni Erlinda Rapadas @Teka Nga | September 20, 2025

Photo: Kaila Estrada at Daniel Padilla - IG

Kung totoo man ang nababalitang relasyon nina Kaila Estrada at Daniel Padilla, ngayon pa lang ay masusubukan na si DJ kung kakayanin niyang rendahan o kontrolin ang anak nina Janice de Belen at John Estrada, tulad ng ginawa niya noon kay Kathryn Bernardo.

Sa mahigit 10 taon ng kanilang relasyon ni Kathryn, laging si Daniel ang nasusunod dahil pati pananamit ni Kath ay dinidiktahan ni DJ. 

Bawal ang magsuot ng mini skirt at short shorts. Bawal din ang sexy at revealing dress. Sobrang istrikto ni Daniel at seloso pa. Parang ibon na nakakulong sa hawla si Kathryn.

Pero may hangganan ang lahat. Hindi na natiis ni Kath ang lahat nang matuklasan niya na may ibang babae si DJ bukod sa kanya kaya tinapos niya ang pagiging martir. Tinapos ng aktres ang 11 years ng kanilang relasyon.

Samantala, si Kaila Estrada naman ay isang makabagong babae na malakas ang personalidad. Malaya niyang nagagawa ang gusto niya sa buhay. 

Pinayagan siya ng kanyang mom na si Janice na mamuhay nang nakabukod dahil may sarili itong disposisyon sa buhay.

Well, matatanggap ba ni Daniel na maging nobya ang isang babaeng may 9 na tattoo sa iba’t ibang parte ng katawan? 

For sure, hindi niya mapapasunod si Kaila Estrada sa mga bagay na gusto niya. Baka siya ang maging sunud-sunuran sa aktres. 

Let’s see…

---

Na-fake news na nag-dirty finger sa National Anthem… MGA KAPWA SENADOR NA NANLAIT KAY ROBIN, ‘DI NAG-SORRY

HINDI man lang daw humingi ng dispensa kay Sen. Robin Padilla ang mga kapwa senador matapos niyang patunayan at ipaliwanag na hindi niya binastos ang pagkanta ng Lupang Hinirang sa opening session ng Senado.

Unang naglabas ang Rappler ng kanilang paghingi ng apology kay Sen. Robin tungkol sa naisulat na fake news na diumano’y nag-dirty finger ang senador habang kumakanta ng Pambansang Awit. 

Naipaliwanag naman ni Sen. Robin ang pag-angat ng kanyang daliring hintuturo, at hindi dirty finger tulad ng inakala ng iba.

Ang pagpapalabas ng statement ng Rappler ay patunay na hindi binastos ni Sen. Padilla ang ating National Anthem. 

May ilang senador kasi ang agad na nanghusga kay Sen. Robin nang hindi muna inaalam ang tunay na istorya. Kaya, dismayado at masama ang loob ni Sen. Padilla dahil hindi man lang nag-sorry sa kanya ang mga senador na nanlait sa kanya.

---

MASAYANG-MASAYA ang Estrada–Ejercito Family dahil isa nang Wing Commander of the 5th Air Force Wing Reserve (AFWR) si Brigadier General Jude P. Ejercito, PAFR. 

Ang donning ceremony ay ginanap sa Malacañang Palace at dinaluhan nina dating Pangulong Joseph Estrada, Dra. Loi Estrada, Sen. Jinggoy Estrada at Jackie Ejercito.

Hindi sumabak sa pulitika si B.Gen. Jude Estrada, pero aktibo siya sa mga charity projects, lalo na noong pangulo ang kanyang amang si Joseph Estrada. 

Likas na tahimik at low profile si B.Gen. Jude. Bihira siyang dumalo sa mga social events, pero maaasahan siya kapag kailangang tumulong sa panahon ng kalamidad.

Si Jude Estrada ang bunsong anak ni ex-President Joseph Ejercito Estrada.

---

MARAMING fans ni Manilyn Reynes ang nagre-request sa GMA-7 na makapag-guest sa Pepito Manaloto (PM) sina Janno Gibbs at Keempee de Leon.

Ang dalawang aktor ay dating naka-love team ni Mane. Tiyak na riot kapag nag-reunion sina Manilyn, Janno at Keempee.

May selosan kayang magaganap sa PM kapag natuloy ang guesting nina Janno at Keempee? 

Samantala, marami naman ang nagtatanong kung sino’ng female star ang pinagselosan ng misis ni Michael V. na si Carol. At bakit kaya siya nagselos, eh, good boy naman in real life si Bitoy?

Aktor, oks lang na may mga anak ang ipinalit kay Barbie… KYLIE AT JAK, OBYUS NA MAY RELASYON NA

ni Erlinda Rapadas @Teka Nga | September 14, 2025

Photo: Jak Roberto at Kylie Padilla - IG, My Fathers Wife

Marami ang nakakapansin na may “something” na nagaganap kina Kylie Padilla at Jak Roberto. Halatang-halata sa kanilang mga kilos na may namumuong relasyon sa kanilang dalawa. 

Maging ang kanilang mga co-stars sa seryeng My Father’s Wife (MFW) ay madalas na rin silang tinutukso sa isa’t isa.

Kita kay Kylie na may spark sa kanyang mga mata at kinikilig kapag magkasama sila ni Jak. Ganoon din si Jak na may kakaibang ngiti kapag nakikita si Kylie. 

Kapag may nagsasabi sa aktor na may mga anak na si Kylie, ang tanging sagot daw nito ay, “I love kids!”

So, posible nga na may romansa nang namumuo kina Kylie at Jak. Pareho naman silang single ngayon at open naman ang aktres na magmahal muli kung makakatagpo ng lalaking mamahalin at tatanggapin ang kanyang mga anak. 

Payag din ang mga fans ni Jak at ni Kylie na mabuo ang tambalang JakLie (Jak Roberto at Kylie Padilla).

---

Bentang-benta sa madlang pipol…

SARAH DISCAYA, ‘DI RAW NATUWA SA PANGGAGAYA NI MICHAEL V.

TRENDING sa social media ang ginawang parody ni Michael V. (Bitoy) sa kontrobersiyal na lady contractor na si Sarah Discaya. Milyon ang mga viewers na natuwa sa panggagaya ni Bitoy sa hitsura nito na tinawag niyang “Ciala Dismaya”.

Kopyang-kopya ni Michael V. si Sarah, pati na ang nunal at British accent nito kapag nagsasalita.

Tunay na henyo si Bitoy sa kanyang mga ideya at brand of comedy. Marami na siyang personalidad na ginaya na nagustuhan ng mga manonood ng Bubble Gang (BG). 

At ngayong gabi, ipapakilala ni Bitoy sa mga viewers si Ciala Dismaya, kasama ang ilang personalidad na dawit sa flood control projects scandal. Haharap sa hearing si Ciala Dismaya.

Samantala, may balitang hindi nagustuhan ni Sarah Discaya ang pagkopya sa kanya ni Michael V. Nakakasira raw iyon sa kanyang reputasyon. Ganunpaman, maraming viewers ng BG ang tuwang-tuwa at pumupuri sa spoof ni Michael V. kay Sarah Discaya na usap-usapan ngayon sa buong Pilipinas.

---

AYON sa ilang netizens, mukhang overexposed na si Shuvee Etrata at baka pagsawaan na ng publiko. She’s everywhere, halos lahat ay gusto siyang imbitahin para mag-show. 

Marami ring bagong beauty products ang gustong kunin siya bilang endorser.

Nauna nang nag-endorse si Shuvee ng ilang malalaking produkto ng clothing line, fastfood at online shop.. Pinag-aagawan siya ngayon ng mga may-ari ng mga bagong produkto na gustong maging bahagi ng kanyang kasikatan.

Pero nag-aalala ang ilang mga fans at supporters na baka maumay at pagsawaan agad siya.

dapat daw ay i-build-up muna nang husto ng GMA-7 si Shuvee. 

Malaking break para sa kanya ang makapareha ang Primetime King na si Dingdong Dantes sa upcoming seryeng Master Cutter (MC). Hindi lahat ng baguhan ay nabibigyan ng ganitong kagandang oportunidad. Siguradong lalo siyang kaiinggitan ng ibang Kapuso stars.

Pero deserve naman talaga ni Shuvee ang tinatamasa niyang popularidad ngayon. Hindi rin siya masisisi kung tinatanggap niya ang mga product endorsements na dumarating sa kanya.

Gusto ni Shuvee Etrata na bigyan ng maginhawang buhay ang kanyang mga magulang at mga kapatid. Pangarap niyang ipagpagawa ng malaking bahay ang kanyang pamilya sa Bantayan, Cebu. Nais niya na magkaroon ng sariling kuwarto ang lahat ng kanyang 8 kapatid sa ipatatayo niyang bahay.