Kaya super rich na… P5 M, TF DAW NI VICE GANDA SA 2 KANTA LANG

ni Janiz Navida @Showbiz Special | May 21, 2026

Photo: IG _teamviceph

Grabeee, as in grabe!!! 

Parang bigla kaming naging Mathematician at panay ang compute sa aming utak habang isa-isa naming pinapanood ang mga nagpe-perform na naglalakihang artista-singers sa katatapos lang na Bingo Plus Night 2026 na ginanap sa Marriott Hotel sa Pasay last Tuesday.

Si Darren Espanto ang opening number na tila nag-mini-concert sa kanyang 3 to 4 songs yata.

Sinundan siya ni Kim Chiu (na endorser ng Bingo Plus) na sing and dance naman ang ginawa at sandali pang bumaba sa audience para aliwin ang kanyang mga fans.

After Kim, si Bamboo naman ang bumulaga na bumaba rin sa stage at lumapit sa mga guests ng event kaya tuwang-tuwa ang mga tao na nakakita sa kanya nang up close and personal.

Sumunod na nag-perform ang magaling na aktor na si Anthony Jennings na hindi man nakilalang singer ay nakakakanta rin naman pala. In fairness, ang kaguwapuhan niya ang nagdala sa kanya. Hahaha!

Nu’ng bumaba siya sa audience, may narinig kaming nagtanong kung sila pa ba ni Maris Racal. Awww!

Mic, nawalan ng sound habang kumakanta…

JULIE ANNE, PINILIT BUMIRIT KAHIT PAOS

Mala-Broadway naman ang performance ni Julie Anne San Jose kung saan habang kumakanta siya ay may mag-partner na dancers na nag-i-interpret ng kanyang song na itinataas-taas pa sa stage at ang galing-galing ng kanilang mga palambi-lambitin moves. Kami ang natatakot para sa kanila dahil baka isang wrong move, eh, bumagsak sila sa stage. Pero thank God, natapos ang song ni Julie Anne na safe naman ang dalawang ballet dancers.

Maraming nakapansin na hindi maibirit ni Julie Anne nang todo ang kanyang boses at medyo mababa ang timbre nito sa nakasanayan na sa kanya. ‘Yun pala, namamaos nu’ng gabing ‘yun si Julie Anne.

May part pang nawala ang sound ng kanyang microphone, pero hindi na-distract ang magaling na singer-actress, “the show must go on” pa rin, ‘ika nga!

Parang ibinawi naman si Julie Anne ng sumunod sa kanyang nag-perform na si Yeng Constantino na super-birit that night kaya napapanganga na lang ang mga guests na nanonood.

Pagkatapos ni Yeng, ang Soul Siren namang si Nina ang bumirit at nag-whistle pa sa kantang Foolish Heart kaya palakpakan ang mga guests.

2 babaeng kinuha, game na game, Neri…  

CHITO, NAKIPAG-‘BAGSAKAN’ SA MGA GUESTS SA SOSYAL NA PARTY

Magtu-12 midnight na nang sumalang ang Parokya ni Edgar at talaga namang binuhay nang bonggang-bongga ni Chito Miranda na bokalista ng banda ang mga guests dahil pinalapit niya ang mga ito sa stage na para bang ginawa niyang concert ground ang ballroom ng Marriott Hotel.

Game na game na nakipag-duet kay Chito ang ilang babaeng guests, kesehodang naka-black gown ang mga ito, nakipagrakrakan sila kay Chito lalo na sa ‘Bagsakan’ portion. Dalawang babae ang nagtodo-rap pa at nakipagsabayan sa mister ni Neri Naig.

Ang alam namin, isa rin si Ely Buendia sa mga performers that night at nakita rin siyang dumaan sa red carpet, pero ewan at bakit hindi yata namin siya napansing nag-perform. 

Baka maaga siyang kumanta, at dahil paumpisa na ng show nu’ng dumating kami, kaya hindi namin siya nakita.

Well, of course, ang finale ng Bingo Plus Night 2026 ay ang kanilang No. 1 endorser na si Vice Ganda.

In fairness kay Vice, ang tagal naghintay bago ang kanyang finale number. Ang aga niya kasing dumating sa venue pero past midnight na nga siya nakakanta.

Medyo nabitin din ang mga guests sa kanya dahil 2 kanta lang ang ginawa ni Vice at wala na rin siyang mga comedy spiels na siyempre ay inaabangan sa kanya dahil du’n nga siya kilala.

May tinanungan kaming isang close kay Vice kung magkano kaya ang talent fee niya sa dalawang kantang ‘yun at ang chika sa amin, nagre-range raw sa P2M to P5M ang TF ni Vice for two songs, pero depende siyempre ‘yun sa location, sa kung ano’ng gagawin niya at ilan pang mga kondisyones.

Oh, ‘di ba? Grabe ang inilabas na budget ng Bingo Plus para sa kanilang 4th anniversary. 

Bukod nga sa mga ginastos nila sa mga performers that night, sa mga bonggang-bonggang pagkain, eh, may charity project pa sila kung saan 6 na letter senders ang kanilang napili para i-grant ang wish, ha?

At take note, nagpa-raffle rin ng BMW that night ang Bingo Plus, kaya sobrang suwerte talaga kung sinuman ang naging winner!

---

ENGAGED na ang aktres na si Cristine Reyes sa kanyang lawyer boyfriend na si Atty. Gio Tiongson.

Sa kanyang Facebook account, ipinost kagabi ni Cristine ang mga pictures nila ng BF – now fiance – na si Atty. Gio habang sila ay nagbabakasyon sa Hong Kong. 

Simpleng-simple lang ang ayos ni Cristine na parang naka-kamison lang. ‘Yung tipong woke up like this tapos ay namasyal na sa HK. Hahaha! Naku, eh, ‘yan talaga yata ang usong OOTD ngayon, ‘no!

Anyway, hindi na ipinakita ni Cristine kung paano nag-propose si Atty. Gio. Basta ifinlex na lang niya ang kanyang kamay sa isang photo nila habang suot ang kanyang engagement ring.

Well, maraming natuwa at nag-congrats kina Cristine at Atty. Gio at todo-asang matutuloy ang kasal at hindi raw matulad kay Bea Alonzo na balitang na-cancel nga ang wedding kay Vincent Co.

Oh, well, abangan na lang natin kung kelan ang kasal! 

Congrats!

Pang-forever na?! JAKE AT RABIYA, TANGGAP NA NG PAMILYA NG ISA’T ISA

ni Reggee Bonoan @Sheet Matters | May 21, 2026

Photo: IG _juancarloscuenca

Suportado ni Jake Cuenca ang girlfriend niyang si Rabiya Mateo sa medical school nito kaya naman bago ang pasukan sa Agosto 7 ay nagliliwaliw muna sila, at ang latest ay sa Hong Kong.

Sobrang proud si Jake sa girlfriend niya dahil itutuloy nito ang matagal nang pangarap na maging doktor tulad ng amang Indian-American na si Syed Mohammed Hashmi.

Natapos ni Rabiya ang kursong Bachelor of Science in Physical Therapy, cum laude sa Iloilo Doctors College noong 2018, at sa parehong taon ay naipasa niya ang board exam.

Gusto niyang ituloy ang medisina at sa katunayan ay siya ang nanguna sa buong bansa sa pagsusulit ng National Medical Admission Test o NMAT sa gradong 741. Naudlot lang ito dahil sumabak siya sa beauty contest at siya ang nag-represent ng Pilipinas sa 69th Miss Universe (MU) Competition na ginanap sa Florida, USA.

Going back to Jake, bago pala naging magkarelasyon ang dalawa ay plano nang ituloy ni Rabiya ang pagdodoktor at sa katunayan ay hindi na siya nag-renew ng kontrata sa GMA Network.

“Ayaw na n’yang mag-artista, hanggang hosting na lang, ayaw na n’yang mag-taping or shooting kasi nga magiging abala sa pag-aaral n’ya,” kuwento ng taong malapit sa dalaga.

Sa pagkakakilala namin kay Jake ay mukhang si Rabiya na ang gusto niyang makasama sa buhay dahil talagang suportado niya ang dalaga at willing to wait siyang makatapos ito ng pag-aaral.

Kung tama ang timeline namin ay nasambit noon ni Jake na magse-settle na siya sa edad na 30 hanggang sa naurong at naging 35, at ngayon ay magti-39 na siya sa December 30.

Ilang taon ang hihintayin ni Jake, lima o anim na taon?

“Eh, malamang nasa 43 years old na s’ya. Okey lang naman sa lalaki na ru’n pa lang s’ya magsisimula ng pamilya, at si Rabiya (29 yrs. old ngayon), nasa 35? Puwede na, financially stable naman na si Jake kaya kahit late na s’yang mag-asawa, okay lang,” kuwento naman ng kampo ng aktor.

Isa pang nalaman namin ay ipinakilala na ni Rabiya si Jake sa pamilya niya at sobrang natuwa ang aktor dahil ‘idol’ ang tawag sa kanya ng kapatid ng dalaga.

Pagdating naman sa pamilya ni Jake, tanggap din nila si Rabiya at nagkaroon na ng maayos na pag-uusap na hindi binanggit kung tungkol saan.

Ang mga katangiang nagustuhan ni Jake Cuenca kay Rabiya Mateo ay ang pagiging simpleng babae nito, hindi gumigimik o mahilig lumabas maliban kung trabaho, marunong sa bahay, at higit sa lahat ay matalino.

---

SAGOT ng ABS-CBN ang pagiging homesick ng mga Kapamilya.

Manatiling ‘together forever’ at konektado sa mga mahal sa buhay sa sabay-sabay na panonood ng minamahal na ABS-CBN shows sa Kapamilya Online Live at iWant, na nae-enjoy ang 24/7 online viewing saanman sa mundo.

Naglunsad ang ABS-CBN ng bagong nakakaantig na video tampok ang mga overseas Filipino workers at kung paano tila nagagamot ang kanilang pagiging homesick dahil nakakanood sila ng Kapamilya shows sa Kapamilya Online Live sa YouTube (YT) at sa iWant kasabay ng mga mahal nila sa buhay na nasa Pilipinas.

Ang naturang video ay parte ng ‘Together Forever’ campaign bilang pasasalamat sa walang hanggang suporta ng mga Kapamilya sa mga programa at artista ng ABS-CBN.

Napapanood ang Kapamilya Online Live sa ABS-CBN Entertainment YT, ang most-subscribed media and entertainment channel sa Southeast Asia na may 54.8 milyong subscribers. Handog nito ang mas pinasayang libreng panonood ng kasalukuyang umeereng mga programa ng ABS-CBN, pati na rin ang classic shows na maaaring i-replay.

Ilan sa mga napapanood dito ay ang Blood vs. Duty (BVD), The Alibi (TA), It’s Showtime (IS), at TV Patrol (TVP), kabilang din ang paboritong weekend game shows na Kapamilya Deal or No Deal (KDOND) kasama si Luis Manzano at Everybody, Sing! (ES) kasama si Vice Ganda.

Mapapanood din ngayong taon sa Kapamilya Online Live ang inaabangang primetime action series na Coco Martin’s Sigabo na pagbibidahan nina Coco Martin at Julia Montes.

Hindi rin mahuhuli sa chikahan sa Kapamilya Online Live dahil puwedeng makipag-usap sa iba pang Kapamilya saanman sa mundo habang sabay na nakatutok sa panonood sa pamamagitan ng live chat box.

Damang-dama rin ang aksiyon, drama, at kilig sa panonood sa iWant na may pinakamalaking koleksiyon ng Filipino feels. 

Bukod sa live programming ng ABS-CBN at full episodes ng primetime shows, available rin dito ang classic teleserye, blockbuster movies, at mga bagong iWant Original kabilang ang mga microdrama.

Mapagpipilian ang mga bagong palabas tulad ng The Secrets of Hotel 88 (TSOH88), kung saan available ang episodes pitong araw bago ipalabas sa TV, at ang microdrama na The Chambermaid’s Daughter (TCD). 

Dapat namang abangan ang iba pang Originals tulad ng Miss Behave (MS) at Nurse the Dead (NTD).

Tumutok sa Kapamilya Online Live at mag-subscribe sa ABS-CBN Entertainment YT channel. 

Sanib-puwersa na… COCO AT DINGDONG, MAY GAGAWING PROJECT PARA SA MGA TAGA-SHOWBIZ

ni Vinia Vivar @Frankly Speaking | May 21, 2026

Photo: IG _cocomartin_ph

Opisyal nang inanunsiyo ng aktor na si Dingdong Dantes ang pagsapi ni Coco Martin sa AKTOR – League of Filipino Actors.

Sa kanyang Facebook (FB) at Instagram (IG) account ay nagbahagi si Dong ng mga larawan sa katatapos lang na general assembly ng naturang organisasyon ng mga aktor kung saan ay nanumpa si Coco bilang miyembro.

Makikita rin sa larawan si Charo Santos-Concio na isa rin sa mga importanteng figures sa AKTOR, ang kasalukuyang presidente na si Iza Calzado, gayundin ang iba pang miyembro tulad nina Cherry Pie Picache, Agot Isidro at iba pa.

Sa caption ay ikinuwento ni Dingdong na nagsimula ang usapan ng pagsapi ni Coco sa AKTOR nang pumunta silang dalawa sa bahay ni Ma’am Charo noong nakaraang taon.

“Last year, nagkaroon kami ng isang importanteng usapan sa bahay ni Ma’am Charo, kaming tatlo ni Coco,” simula ni Dong.

“Nauwi ang kuwentuhan sa mga hangarin namin para sa industriya, para sa sektor ng mga artista, at para sa komunidad na patuloy naming sinusubukang palakasin,” patuloy niya.

Ipinahayag din ng founding chairman ng AKTOR ang kanyang kasiyahan na makasama ang mga taong may malasakit sa industriya.

“At siguro, ‘pag may mga taong kasama kang may parehong malasakit para sa kapwa-aktor, mas lalo mong naiintindihan kung bakit mo ginagawa ang lahat ng ‘to. Mas nararamdaman mong posible pala ang mga bagay na dati’y parang ang hirap abutin basta may mga taong handang makiisa at tumulong sa atin,” aniya.

Kasunod nito ay inanunsiyo rin ni Dingdong na mayroon silang ilulunsad na ‘solid and concrete’ project na pamumunuan ni Coco.

“Nakakatuwang isipin na ang usapang ‘yun ay magiging isang solid at konkretong proyekto very soon, na ilulunsad namin kasama si Coco, na siya rin mismo ang mamumuno nito sa ilalim ng AKTOR,” aniya.

“Welcome to AKTOR, Coco Martin! At salamat po, Ma’am Charo,” ang mensahe ni Dingdong.

Ngayon pa lang ay excited na ang mga fans kung ano ang major collaboration na magaganap sa dalawang itinuturing na mga showbiz royalties ng industriya.

---

ARAL o iskandalo? Ano ba talaga ang hinahanap ng manonood sa primetime?

Sa mga TV series, alam nating pinakamabenta pa rin ngayon ang mga seryeng punumpuno ng iskandalo, krimen, pagtataksil, rebelasyon, at kung ano pang mas nagdaragdag ng thrill at hook sa istorya.

Pero may lumalakas ding ibang klase ng istorya na kinahihiligan ng mga viewers – mga kuwentong hindi lang nagpapagulat kundi nagpaparamdam. Isang example nito ang My Bespren Emman ng TV5, na kuwento ng isang taong nagkamali, nasira, pero gustong bumawi. Hindi siya perpekto. At siguro, doon siya nagiging totoo.

Kaya maraming viewers ang nakaka-relate — hindi dahil sa laki ng eksena, kundi dahil sa lalim ng emosyon. 

Sa panahon ngayon, marami ang pagod, marami ang may pinagdaraanan, at hindi lahat, gusto ng mas matinding gulo sa TV.

Minsan, gusto lang nila ng kuwentong magsasabing, “Hindi ka pa tapos.”

Hindi ibig sabihin, mawawala ang iskandalo. Nandiyan pa rin ‘yan — at may audience pa rin. Pero unti-unting lumalakas ang puwang para sa kuwentong may puso.

Dahil sa dulo, hindi lang ingay ang hinahanap ng tao kundi koneksiyon.