Online bentahan ng illegal vapes, droga, wakasan na

by Info @Editorial | August 18, 2025

Marami na ang nagbebenta ng mga bawal na produkto online — lalo na ang ilegal na vape at droga. 

Sa social media at online shopping apps, madaling makahanap ng mga vape na hindi aprubado ng gobyerno at droga na delikado sa kalusugan. Kadalasan, mga kabataan pa ang naaakit dito.Ito ay seryosong problema. Hindi na lang ito tungkol sa negosyo kundi kalusugan at kaligtasan ng tao, lalo na ng kabataan.

Nasaan ang gobyerno? Ito ang tanong ng iba. May mga batas na, pero tila kulang ang aksyon. Dapat higpitan ang pagbabantay sa online platforms at parusahan ang mga nagbebenta ng ilegal.

Kailangan ding makipagtulungan ang mga social media company para matigil ang ganitong gawain.Bukod dito, mahalaga ang edukasyon. Kailangang turuan ang kabataan tungkol sa masamang epekto ng paggamit ng ilegal na vape at droga. 

Hindi lang ito trabaho ng pulis, kundi ng buong komunidad.

Panahon na para kumilos. Huwag nating hayaang maging lugar ng bisyo ang internet. Dapat magtulungan ang gobyerno, paaralan, magulang, at mga kumpanya upang wakasan ang online bentahan ng ilegal na produkto.

Mandatory at regular na drug testing sa gobyerno

by Info @Editorial | August 17, 2025

Sa gitna ng isyu na may kaugnayan sa ilegal na droga, panawagan ngayon ang pagpapatupad ng mandatory at regular na drug testing partikular sa lahat ng kawani at opisyal ng pamahalaan. 

Simple lang umano ang dahilan: Paano magtitiwala sa mga tagapagpatupad ng batas kung sila mismo ay gumagamit ng ilegal na droga?

Ang mga lingkod-bayan ay may tungkuling magsilbi nang tapat at may integridad. Kung ang mga ordinaryong empleyado sa pribadong sektor ay kailangang sumailalim sa drug test, mas nararapat ito sa mga nasa gobyerno. Hindi sapat ang iisang drug test sa simula ng trabaho. Kailangan itong gawing regular upang matiyak na nananatiling malinis ang bawat kawani.

Hindi ito panghihimasok sa personal na buhay. Ito ay bahagi ng pagiging isang responsableng lingkod-bayan. Ang pagtutol dito ay nagtataas naman ng tanong: May itinatago ba?

Kung may mahuli sa drug test, dapat may malinaw na aksyon — rehabilitasyon, suspensyon, o pagtanggal sa serbisyo, depende sa kaso. Pero dapat din tiyaking patas ang proseso. Walang dapat gamitin ang drug testing sa paninira sa pulitika o personal na interes.

Ang gobyerno ang dapat maging ehemplo sa laban kontra-droga. Kaya kung seryoso tayo sa pagbabagong gusto nating makita, magsimula tayo sa mga nasa loob ng sistema.

Malinaw na aksyon vs. online gambling, dapat tuluy-tuloy

by Info @Editorial | August 16, 2025

Ang kautusan ng Bangko Sentral ng Pilipinas (BSP) na i-unlink ang e-wallets mula sa online gambling platforms ay isang hakbang sa tamang direksyon. 

Sa wakas, may malinaw nang aksyon laban sa isang bisyong tahimik ngunit matindi ang epekto sa pamilyang Pilipino. 

Sa rami ng kuwento ng mga nasira ang buhay at naubos ang kabuhayan dahil sa sugal sa internet, matagal nang hiling ng Simbahan, civic groups, at concerned citizens ang mas mahigpit na regulasyon.

Ngunit dapat nating aminin na hindi sapat ang unang hakbang. Ang pagbigay ng 48 oras para alisin ang mga link sa e-wallet apps ay maaaring makatulong, ngunit hindi nito agad mapuputol ang mismong transaksyon. Kahit walang in-app links, kung may paraan pa rin para magbayad direkta sa mga gambling sites gamit ang e-wallets, mananatiling bukas ang pinto para sa adiksyon.

Nauunawaan ang posisyon ng ilan na ang total ban ay maaaring magtulak sa underground gambling. Pero kung patuloy na pahihintulutan ang online gambling sa maluwag na regulasyon, mas maraming Pilipino ang mababaon sa utang at depresyon.

Ang usapin ay hindi lamang ekonomiya, kundi moralidad at kaligtasan ng mamamayan.

Mahalagang maging malinaw at buo ang plano ng pamahalaan. Kung papayagan man ito, dapat may mahigpit na identity verification, spending limits, at monitoring para maiwasan ang pagsasamantala. 

Kung ipagbabawal naman, dapat mas matindi ang enforcement laban sa mga ilegal na operator. Hindi maaaring manatili sa gitna dahil habang nag-aalangan ang gobyerno, patuloy ang operasyon ng mga sugal na sumisira sa mga pamilya.

Ang laban sa online gambling ay hindi matatapos sa pag-unlink ng e-wallets. Ito ay dapat magsimula pa lang ng serye ng mga reporma sa batas, pagpapatupad, hanggang sa edukasyon ng publiko.