Flood control projects sablay, budget ibigay sa edukasyon

by Info @Editorial | August 21, 2025

Umarangkada na sa Senado ang imbestigasyon sa umano’y maanomalyang proyekto kontra-baha sa bansa.

Muli ring nabanggit na umaabot sa isang bilyong piso kada araw ang budget para sinasabing flood control. 

Pero ano ang resulta? Baha pa rin kahit kaunting ulan lang. Sayang ang pera ng bayan. Sana ay inilaan na lang sa ibang proyekto. 

Maraming eskwelahan ang kulang sa klasrum, pasilidad at kahit upuan.

Kung hindi kayang ayusin ang flood control, ilipat na lang ang badyet sa edukasyon.

Mas may silbi pa ang bawat pisong gagastusin kung ito’y mapupunta sa klasrum — sa pagpapagawa ng bagong silid, pagkuha ng guro, at pagbili ng gamit para sa pagtuturo.

Hindi natin sinasabing hindi mahalaga ang flood control. Pero kung palpak, huwag nang ipilit. Ayusin muna ang sistema bago magdagdag ng pondo. Sa ngayon, mas kailangan ng mga bata ang ligtas, maayos, at dekalidad na lugar para matuto.

Bukod sa nakakalulang gastos na hindi naman maramdaman ang magandang resulta, nabulgar din ang korupsiyon sa nakumpirmang ghost flood control projects. Lunod na naman sa kahihiyan ang gobyerno. Kailangang may managot. 

Ingat sa trabahong iniaalok online

by Info @Editorial | August 20, 2025

Mahigit 120 Pinoy ang kamakailan ay na-rescue mula sa human trafficking syndicates. 

Iisa ang kanilang kuwento — inalok ng trabaho online, dinala sa abroad, at doon pinilit na maging online scammer.Ito ang bagong mukha ng human trafficking.

Sa halip na trabaho, panloloko ang ipinagawa sa kanila. Kinuha ang kanilang mga pasaporte, ikinulong, tinakot, inabuso at ginamit ng mga sindikato para mambiktima.Bakit patuloy itong nangyayari? 

Maluwag pa rin ang online recruitment system sa Pilipinas. Tila wala ring sapat na babala o aksyon mula sa gobyerno para harangin ang ganitong modus.Kaugnay nito, nais ding linawin na hindi kriminal ang mga OFW na ito — biktima sila. Hindi nila ginusto ang panloloko kundi pinilit sila.

Panahon nang higpitan ang regulasyon sa online job offers, habulin ang mga recruiter, at tiyaking may proteksyon ang bawat Pilipino — bago pa sila malinlang at mapahamak sa ibang bansa.

Sa kabilang banda, habang hindi maayos ang mga ugat ng problema — kakulangan sa trabaho, korupsiyon, palpak na sistema — marami pa ring makikipagsapalaran sa ibang bansa kahit pa magsakripisyo o magbuwis ng buhay.

Delivery service, protektahan laban sa droga

by Info @Editorial | August 19, 2025

Duarami na ang kaso kung saan ginagamit ang mga delivery service sa pagpapakalat ng ilegal na droga. 

Walang kamalay-malay ang mga delivery rider na droga na pala ang kanilang dinadala. Ito ay malinaw na pagsasamantala sa sistema at sa mga manggagawang tapat na naghahanapbuhay.

Dahil dito, kailangang higpitan na ang regulasyon. Dapat tiyakin ng mga kumpanya na may malinaw na pagkakakilanlan ang sender at receiver.

Bawat package ay dapat dumaan sa tamang inspeksyon, lalo na kung kahina-hinala. Kung kinakailangan, magpatupad ng random checks at mas istriktong tracking ng deliveries.

Hindi rin sapat ang simpleng paalala. Kailangan ng konkretong polisiya at aktibong pakikipagtulungan ng mga delivery company sa mga awtoridad. 

Hindi puwedeng gawing daan ng droga ang isang sistemang dapat ay nakatutulong sa buhay ng tao. 

Kung hindi ito aaksyunan ngayon, mas lalala ang problema. Panahon na para maging mas mahigpit at mas maingat.