Mamimili, protektahan laban sa manlolokong online seller

by Info @Editorial | August 29, 2025

Sa dami ng Pilipinong bumibili online, dumarami rin ang nabibiktima ng substandard o pekeng produkto. 

Maganda sa picture, pero ‘pag nai-deliver na, kung hindi sira, mababa ang kalidad, o minsan ay delikado pa.

Hindi ito simpleng isyu. Panlilinlang ito. Pera ang nilalabas ng tao — pera na pinaghirapan — pero ang kapalit, basura.

Nasaan ang proteksyon sa mamimili? Kulang ang aksyon mula sa mga online platform at sa gobyerno. 

Maraming seller ang paulit-ulit na nagbebenta ng peke o sirang produkto pero hindi agad napaparusahan. 

Kailangan na ng mas mahigpit na regulasyon. Kailangan ng mabilisang aksyon sa reklamo. At dapat, may parusa ang mga mapagsamantala at manlolokong seller.

Hindi sapat ang paalala. Kailangan ng konkretong aksyon.Pataasin ang standards. I-screen ang mga nagbebenta. Huwag nang hintayin pang may maperhuwisyo o masaktan bago kumilos.

Ang online shopping ay dapat magdala ng ginhawa, hindi sakit ng ulo. 

Panahon na para mas protektahan ang mamimili. 

Mga taga-gobyerno, magkusa nang umiwas sa sugal

by Info @Editorial | August 28, 2025

Sa kabila ng kawalan ng isang tiyak na batas na nagbabawal sa mga opisyal at empleyado ng gobyerno na magsugal, may mga lingkod-bayan na kusa namang umiiwas dito. 

Sa panahon ngayon kung kailan laganap ang mga bisyo at tukso, lalo na sa paligid ng mga may kapangyarihan at pera, ang disiplina ay mahalaga.

Hindi na kailangang sabihan pa o pilitin. Kusang loob nang iwasan ang pagsusugal — isang aktibidad na bagama’t legal sa ilang lugar, ay hindi angkop sa imahe ng isang lingkod-bayan. Bakit? Sapagkat ang sugal ay madalas na kaugnay ng katiwalian, pagkakautang, at kapabayaan sa tungkulin.

Kapag ang isang opisyal ay nakikita sa mga casino o babad sa online gambling, nabubuo agad ang duda ng publiko. “Saan kaya kinukuha ang ipinansusugal niya?” “Nakakapagtrabaho pa ba siya nang maayos?” Mga tanong na hindi na kailangang itanong kung sila ay kusa nang umiwas sa ganitong gawi.

Ipakita natin na may mga nananatiling tapat, mga lider at empleyadong inuuna ang tiwala ng publiko kaysa pansariling aliw.

Ang ganitong asal ay nagbibigay ng magandang halimbawa lalo na sa mga kabataan. Kung ang mga taong nasa gobyerno ay marunong umiwas sa sugal, bakit hindi natin kaya?

Ang pinakamahalagang pagbabago ay nagsisimula sa loob — sa konsensiya, prinsipyo, at sa malasakit sa bayan.

Pagdadala ng armas ng estudyante, nakakaalarma

by Info @Editorial | August 27, 2025

Isang estudyanteng may baril, nakabaril ng isa ring estudyante. Isang simpleng araw na naging trahedya. 

Gayunman, hindi simpleng isyu ang pagkakaroon ng baril ng isang estudyante. Isa itong alarmang dapat ikabahala ng buong komunidad. Nangangahulugan itong may maluwag na regulasyon sa pagkalat ng armas. Ibig sabihin, may mga kabataang nawawala na ang takot sa batas, sa buhay, at sa kanilang kapwa.

Ano ang nagtutulak sa kanila para magdala ng armas? Dahil ba sa bullying? Gang? Kawalan ng tiwala sa sistema?

Kailangan ng mas mahigpit na monitoring sa loob ng eskwelahan. Kailangan ng seryosong pag-uusap sa pagitan ng mga guro, magulang, at mismong mga estudyante.

Kailangan ng maayos na mental health program sa lahat ng antas ng edukasyon. At higit sa lahat, kailangang repasuhin at paigtingin ang mga batas sa armas — bakit napakadaling makakuha ng baril sa ating bansa?

Hindi natin dapat hayaan na ang kabataan, na siyang kinabukasan ng bayan, ay lumaking normal na ang karahasan.