Huwag gawing normal ang pagtitiis sa sirang paaralan

by Info @Editorial | June 9, 2026

Sa pagbubukas ng klase, muling nasusukat hindi lamang ang kahandaan ng mga estudyante at guro, kundi pati ang kakayahan ng pamahalaan na tiyaking ligtas, maayos, at angkop sa pagkatuto ang mga paaralan.

Taun-taon, inuulit ang parehong problema: kulang na silid-aralan, sira-sirang upuan, sirang banyo, mahihinang bentilasyon, kakulangan sa tubig, at mga gusaling nangangailangan ng agarang pagkukumpuni. 

May mga paaralang nagsisimula ang klase sa makeshift classrooms, may shifting schedules, o may pasilidad na hindi dapat pinagtitiisan ng mga bata.

Hindi sapat na sabihing “nakasanayan na.” Ang paaralan ay hindi lamang lugar ng pagtuturo. Ito rin ay dapat maging ligtas na espasyo para sa mga mag-aaral. Kapag sira

ang pasilidad, apektado ang pagkatuto, kalusugan at seguridad ng mga bata at guro.

Habang nagsisimula pa lamang ang school year, dapat nang bilisan ng Department of Education, local government units, at iba pang kaukulang ahensya ang inspeksyon at agarang aksyon sa mga natitirang problema sa school facilities. Hindi dapat hintayin na may estudyanteng masaktan, may klaseng maantala, o may gurong muling mapilitang magturo sa hindi maayos na silid bago kumilos.

Dapat ding pakinggan ang mismong mga school heads, guro, magulang, at estudyante dahil sila ang unang nakararanas ng mga kakulangan sa loob ng paaralan.

Kung tunay na prayoridad ang edukasyon, hindi dapat maging normal ang pagtitiis sa mga sirang pasilidad. 

Huwag hintayin ang trahedya bago kumilos para sa OFWs

by Info @Editorial | June 8, 2026

Nakababahala ang balitang tatlong Pilipino ang nasugatan matapos bombahin ang paliparan sa Kuwait. 

Bagama’t agad silang nabigyan ng tulong, ipinapakita ng insidenteng ito na tunay na nanganganib ang kaligtasan ng ating mga kababayan sa mga bansang apektado ng kaguluhan at digmaan.

Dahil dito, dapat tiyakin ng pamahalaan na mahigpit at tuluy-tuloy ang pagmo-monitor sa kalagayan ng mga OFW. 

Hindi sapat ang paghihintay na may mangyaring sakuna muna bago kumilos. Kailangang may malinaw na plano para sa agarang komunikasyon, paglikas, at pagbibigay ng tulong sa mga Pilipinong maaaring maipit sa labanan.

Marami sa ating mga kababayan ang nasa ibang bansa upang maghanapbuhay at suportahan ang kanilang pamilya. Nararapat lamang na mabigyan sila ng sapat na proteksiyon lalo na kung nasa lugar silang may banta ng giyera. 

Ang nangyari sa tatlong OFW sa Kuwait ay paalala na anumang oras ay maaaring malagay sa panganib ang kanilang buhay.

Kaya naman, mas paigtingin ng gobyerno ang pagbabantay at paghahanda para sa kaligtasan ng ating mga kababayan sa ibang bansa. 

Huwag magpabiktima sa fake news

by Info @Editorial | June 7, 2026

Sa gitna ng kaguluhang nagaganap ngayon sa Senado—ang sigalot sa liderato, mga alegasyon ng “coup,” usapin ng impeachment, at mga kontrobersiyang kinasasangkutan ng ilang opisyal—kailangang maging mas mapanuri sa mga impormasyong nakikita online.

Nagbabala na rin ang Cybercrime Investigation and Coordinating Center (CICC) laban sa pagkalat ng mga hindi beripikadong balita, maling impormasyon, at mga post na maaaring magdulot ng kalituhan sa mamamayan.

Hindi maikakaila na mainit ang sitwasyon sa Senado. Nagkaroon ng matinding hidwaan sa pagitan ng mga paksyon ng mga senador na nauwi sa pagkaantala ng mga sesyon at pagtatalo kung sino ang may lehitimong kapangyarihan sa liderato ng kapulungan. Kasabay nito, umuugong sa social media ang samu’t saring bersyon ng mga pangyayari, marami rito ay walang sapat na ebidensya o konteksto.

Ang problema, mas mabilis kumalat ang haka-haka kaysa sa katotohanan. Sa bawat viral post, edited video, o mapanlinlang na caption, may posibilidad na mas lumala ang pagkakahati-hati ng publiko.

Kapag ang opinyon ay ipinapasa bilang katotohanan at ang tsismis ay itinuturing na balita, nawawala ang tiwala ng mamamayan sa mga institusyon ng gobyerno.

Ang kasalukuyang krisis sa Senado ay hindi dapat gawing dahilan upang basta paniwalaan ang anumang lumalabas online. Sa halip, dapat suriin kung saan nanggaling ang impormasyon, kung may opisyal na pahayag, at kung ito ay iniulat ng mapagkakatiwalaang media.

Habang nagpapatuloy ang mga tensiyon at tunggalian sa Senado, ang pinakamabisang depensa ng mamamayan laban sa panlilinlang ay hindi galit o pagkampi agad sa isang panig, kundi ang pagkakaroon ng kritikal na pag-iisip.